立場新聞 Stand News

你買書,我埋單

2015/10/30 — 14:48

資料圖片

資料圖片

【前言】

香港嘅樓上書店、小書店難做到嘔。我已經唔想研究係乜嘢原因-租貴、閱讀風氣差、某一兩個作者啲書太多錯別字令人無意慾買書……

為咗鼓勵後生仔去樓上書店買書,而家你去買書、我課金畀你。

廣告

呢個活動嘅主旨,一嚟想培養返佢哋嘅讀書興趣(起碼知道呢個世界有樣嘢叫樓上書店)、二嚟係想大家支持下啲小書店。

廣告

【領取資格及課金】

-呢個活動只限25歲或以下人士領取。25歲以上嘅人,有一定經濟能力,呢少少錢就算罷啦

-收取嘅課金以每張單計算,每人每單$50

-每人每月限領課金一次、活動期內限領課金兩次

【適用書籍及書店】

-先買書,後領便當......呀係領課金

-可以購買任何書(除旅遊天書、教科書、精讀);中、英文書皆可;書籍不能轉售

-買嘅書只可以喺2014年或以前出版(以初版計算)

-呢個係用嚟支持樓上書店/小書店,本書必須喺小書店購買。即唔可以喺三X、商X、中X、誠X等大型或連鎖書店。個列表不能盡錄,唔該使用你嘅判斷力。

你中意咪去大書店買囉,不過冇得拎課金之嘛!

-大家可以喺呢個貼tag你所認識嘅小書店

要申請同了解其他詳情,請用呢張form

───

早幾星期有報導話銅鑼灣開益會執,我已經諗到呢個campaign。不過好多嘢忙,而家先正式推出。

呢個campaign暫時玩三個月左右,總資助上限係$20,000(有$5,000來自捐條毛做善事、$3,000來自前排hktvmall入code個event;hktvmall個event另外$3,000收到錢會捐去無國界)。餘數應該由我自資。

我唔係純粹出於好心。前排收到稅單,對我打擊好大……與其交稅畀689,不如拎啲錢玩下嘢,平衡下個心理。再者,我兩本書喺某一兩間樓上書店特別好賣(特別係旺角同老銅嘅開益),佢哋有乜咸魚白菜,對我都有影響。

如果未夠三個月就爆quota,好事嚟,到時我會再搵啲大孖沙注資。

───

嚟緊一段時間,我會請一班朋友提供佢哋嘅心水書單。大家中意嘅,咪睇住個書單去買書。

至於我自己呢……我其實係唔睇書嘅,所以我窮盡腦汁先諗到以下幾本值得推介嘅書:

-《賣桔者言》,張五常:祖師爺親撰,最好睇、最少廢話嘅經濟書,將經濟學日常生活化,好易入口。

-《動物農莊》(Animal Farm, George Orwell):神書。反烏托邦、反共產黨、反獨裁主義的諷刺小說。深入淺出。同樣題材嘅有《Road to Serfdom》,Friedrich von Hayek,不過後者好難明,堅難明。

-《挪威的森林》,村上春樹:呢本書要睇幾次,由十八歲重複睇廿八歲,你先知村上春樹想表達啲乜。呢本唔係村上寫得最好嗰本,但呢本有一個優點:短。

-《那些年,我們一起追的女孩》,九把刀:賣青春回憶同共鳴,小說中的九把刀才接近人類,電影與事實不乎地痴情。

-《A Complain Free World: How to stop complaining and start enjoying the life you always want》,Will Bowen。教你點樣唔好麻怨同投訴。This is a book that changes my life significantly.

-《FBI教你讀心術》(What Every BODY is Saying: An Ex-FBI Agent's Guide to Speed-Reading People, Joe Navarro):萬能插蘇嚟,由溝女到談判都用得著,值得一睇再睇、甚至背晒佢。

-《婚姻這種邪教》,史兄:講笑啫。同埋呢本書斷咗貨啦,咁易買咩。

-《李天命的思考藝術》。唔好理佢而家講啲嘢嘅豬o翕程度係咪等同長頭髮嗰個天命,呢個本將哲學喺香港普及化,應記一功。

滄海遺書:
《Black Swan》(Nassim Nicholas Taleb, 唔係Natalie Portman嗰套戲)《武道狂之詩》,喬靖夫(睇咗四期好睇到爆)
《超人間失格》,月巴氏

──────────────────

關於個買書回水計劃,你有乜嘢問題,可以喺專頁或個人戶口發訊息問我。

畀你問渣喎,我無話答你。哈哈哈哈哈。

要申請同了解其他詳情,請用呢張form

──────────────────

另看立場新聞〈香港獨立書店地圖〉

 

香港獨立書店地圖:http://bit.ly/1GAhFVZ香港出版業和書店向來經營不易,近日有關傘運書籍消息,讓大眾再次注意到三聯、中華、商務書局三大中資書店在香港書籍零售市場的壟斷局面。面對「三中商」封殺和租金壓力,撐獨立出版、撐獨立書店,需要集體行動。《立場新聞》整理香港獨立書店最新資料,如有遺漏、錯誤、過時,請讀者指正, 我們會持續更新。#獨立書店 #樓上書店 #立場新聞 #上書局

Posted by Stand News 立場新聞 on Monday, 9 March 2015

原刊於作者 facebook page

發表意見