立場新聞 Stand News

倪匡睇完《冒險王衛斯理》會吐血嗎?

2018/4/25 — 12:26

《冒險王衛斯理》劇照

《冒險王衛斯理》劇照

2017年倪匡曾在蘋果訪問中批評香港電視台,「一個電視台做到自己係白痴唔緊要,但唔可以當觀眾係白痴㗎嘛。」唔知佢睇完愛奇藝嘅《冒險王衛斯理》會否吐血,因為呢套嘢正正就係當觀眾白痴。(後補:Sorry,上網睇到倪生講過,賣咗出去嘅版權就等於嫁咗出去嘅女同潑咗出去嘅水,所以佢根本唔會理,哈哈哈~)

原來《冒險王衛斯理》共有3季36集,故事分別係「支離人」、「藍血人」及「無名髮」,「藍血人」係Janice Man,「無名髮」更有倉田保昭演出。但睇咗三集「支離人」已忍唔住棄劇,其實我真係好想睇衛斯理,可惜首集一開波王晶客串做大食外星人,其特技及不合理情節已肉酸到令人患上尷尬癌,我以為睇緊大嘥鬼做戲(大嘥鬼仲可愛啲)。之後兩集加插大量難頂感情戲,好嬲,我想睇冒險同科幻橋段呀喂!衛斯理個角色設定又衰到離譜,明知人哋有危險都係要最後一刻先講,搞到槍戰死人,做咩啫您?

《冒險王衛斯理》劇照

《冒險王衛斯理》劇照

廣告

唯一要讚套劇拍到余文樂超型,佢啲衫佛系得來剪裁得宜,眼鏡又靚(由The Warehouse Optical贊助),又有改裝電單車同古怪小道具,成個國產007咁款。唯二再讚嗰個機械人管家,上身係人下身係機械腳轆來轆去,咪就係《賭城風雲》管家傻強2.0,正呀喂~唯三讚埋任達華林家棟,劇本點樣都唔會影響佢哋嘅演出水準,根基紮實。

廣告

《冒險王衛斯理》劇照

《冒險王衛斯理》劇照

睇睇下突然醒起,倪匡一向以反共見稱,甚至堅持唔返大陸,點解會俾愛奇藝拍衛斯理系列?沈西城雖然指倪生愛財,但佢亦寫文指80年代時,當時新華社社長許家屯請倪匡到北京遊覽,倪生認真地指自己「要用『反共作家』的名義回去。」唔通倪老都要搵內地水喉?

《冒險王衛斯理》劇照

《冒險王衛斯理》劇照

諗極唔明,上網一查,原來早在2006年, 衛斯理系列合共逾200本小說嘅全球永久改編權,已落入勤+緣媒體服務有限公司手中,而《冒險王衛斯理》片尾就大大隻字寫住衛斯理系列,現時全球永久權利人係「一壹勤緣文化傳媒(北京)有限公司」,可能係有間叫一壹嘅公司,同勤+緣合資搞咗檔新嘢?再查,原來2017年9月,內地嘅一壹傳媒集團成立咗一間「IP版權銀行」,目前持有金庸嘅《神鵰俠侶》同倪匡衛斯理系列版權(仲有其他但香港人未必識)。徐克會拍《神鵰俠侶》電影三部曲,好可能用 Angela Yuen 做小龍女;衛斯理就拍劇。佢哋仲用8 億人民幣搞咗「一壹勤緣文創基金」,公開衛斯理系列版權,等全球青年華人作家都可以續寫。

咁明嘞,依家套劇應該就係續寫咗,所以白老大都由江湖中人變成國際刑警。同奶奶討論時佢話:「嘻~黑社會都變白社會~」出色。其實倪匡近一兩年前已講話不再反共,「每個黨員身家千萬億萬,子女在外國周身名牌,在大集團當高層,個個都變成資本家了,哪裏再有共產黨?」

唔知《原振俠》版權喺邊個度呢?反正都係,拍埋佢啦,多一套唔多,少一套唔少,IP焦土。

發表意見