立場新聞 Stand News

全因為黃蓉,每個男人心裏其實都想成為郭靖

2017/6/6 — 19:14

《射鵰英雄傳》宣傳照

《射鵰英雄傳》宣傳照

【文:白駝山少主】

近期熱播《射鵰英雄傳》,令到射鵰再次成為城中熱話,雖然射鵰已翻拍咗好多次,但每次播出都會令人睇到目不轉睛。原因係因為除左可以睇到眾多接近超能力嘅武術外,更引人注目嘅必定係男女主角,郭靖同黃蓉兩人嘅經歷。

廣告

我敢肯定你去問大部分男人都想做「郭大俠」。當中原因不外乎可以學到絕世武術,而且為國為民、行俠仗義,滿足到一眾男性心中嘅英雄主義心理,但更重要嘅係郭靖身邊有一位對佢不離不棄,甚至處處為郭靖着想嘅好女友。無錯,就係講緊黃蓉。

雖然郭靖天資魯鈍(雖然我一啲都唔覺,佢應該係將人生點數加曬係武術、運氣同識女仔到),但運氣絕佳。一生中在武術上不斷遇到好師父教佢絕世,在愛情路上也一樣遇上絕世好女友黃蓉。

廣告

之所以話黃蓉係絕世好女友,並唔係完全因為佢靚女或者可愛。雖然外貌係有一定嘅關係,但性格同平日嘅所作所為更大程度令佢實至名歸。如果剩係講靚就係絕世女朋友,咁好多其他角色都係,但有好多嘢畀外貌更為重要。

黄蓉聰慧機靈,每當郭靖或佢自己有危難嘅時候,佢總會有用佢嘅小聰明去逢凶化吉,若然郭靖冇咗黃蓉嘅幫助,恐怕早就已經不在人世。而且佢不但冇因自己擁有小聰明而睇唔起郭靖,鬧佢咁蠢唔識得上進,反而識得欣賞佢嘅忠厚正義,亦鼓勵佢去做佢想做嘅事,直頭瞓身支持郭靖。男人有時在遇到困難時,最需要嘅可能就係身邊嗰一位嘅支持同鼓勵。

佢更會全心全意對待郭靖,事事為郭靖着想。佢會花盡心機去教郭靖不同嘅文化,而且更令洪七公教郭靖降龍十八掌,希望郭靖能夠武術更上一層樓,可以和她一起進步成長。

係咪就咁睇下以上嘅優點都覺得蓉兒真係無得頂呢?但以下呢樣嘢我覺得先係男士想成為郭靖嘅最重要理由。

呢樣嘢就係佢同郭靖之間嘅愛情嗰種完滿且平穩嘅幸福。郭黃兩人的愛情雖然冇楊過同小龍女般轟烈。相對起其他角色兩人並無經歷過大嘅風浪,但兩人嘅愛情卻係平穩之中帶住無窮嘅幸福,係現實中有好多人就係希望追求佢地個份至死不渝嘅愛。

至於佢地相處方式係坦言相對,中意個樣就講中意,唔中意就講唔中意,對住大家唔會要玩啲咩心計,唔會去計較邊個付出多啲,邊個愛邊個多啲。呢樣看似非常簡單嘅相處方式,係現實上要實現係無比困難,可以講係愛情嘅烏托邦。

郭黃兩人嘅愛情之所以受到咁多人嘅羨慕,係因為佢地兩人嘅故事都可以算係另類嘅童話故事。係現實中,往往都會因為好多唔同因素令到一段感情而結束或難以開始,加上現今速食文化盛行。要搵一個兩情相悅而且要過得平穩嘅愛情實在不易,有人可能附出了無數嘅時間,甚至一生也未可以搵到一個可以付託終身。

即使找到了亦可能係因為金錢、可能係因為時間、可能係因為價值觀等等而令到此情不再或不能萌芽。除此之外,係現實女嘅可能遇不到或錯過咗一個似郭靖忠厚老實嘅男人;男嘅亦可能遇不到或錯過咗一個似黃蓉溫柔賢惠嘅女人,所以呢啲就係世人羨慕呢個另類童話故事嘅原因。

我知肯定有人會講黃蓉到左後期變成左怪獸家長,做某啲事亦唔討好。但留意一點,佢做呢啲事情大部分都係為咗郭靖好。或者黃蓉唔能夠成為百分百似郭靖一樣嘅忠直嘅女俠,但佢絕對係百分百嘅絕世好伴侶。

睇到呢到係咪覺得若得女友如黃蓉,此生不再遺憾呢?虛擬故事當然美好,但現實往往係殘酷,恐怕係現實黃姑娘只會揀歐陽克或楊康之流嘅二世祖,郭大俠只能繼續獨自做冇上進心嘅傻小子(洋名:James)。

所以我地最緊要係唔好將虛擬同現實混為一談,若不然我地同某d人睇完韓劇就以戲中主角準則去追求現實中嘅伴侶一樣咁不切實際。

 

作者 facebook;作者 IG

發表意見