立場新聞 Stand News

問心嗰句,今年書展你記得啲乜?

2015/7/23 — 12:30

(圖:維基百科)

(圖:維基百科)

仲講書展?你 out 唔 out 啲啊?好 out 咩?其實咁大壇文化盛事,星期二先啱啱完,但大家好快又已經進入咗念念不忘、耿耿於懷嘅麥浚龍時代。

網媒有網媒傳,紙媒其實都有紙媒嘅 focus。呢幾日,枕住都有唔同專欄作家,做緊書展回顧。開幕之前,貿發局以為今年入場人次可以再破紀錄,結果 fail 咗,但大家似乎對於大約 100 萬嘅人流,同銷情都幾滿意,白卷、黑紙都話賣得唔錯。香港就係咁,好鍾意鬥數字,玩大細,數大就贏。如果撇開數據,用 impressive marking,你問心,今年書展你記得啲乜?

楊鎧凝、羅霖、陳珍妮、李歐梵。無論你有冇入場,我諗(希望)你多少都應該聽過以上啲人名,同今年書展有關。從幼齒到老模寫真,幾乎日日新鮮鑊鑊金,吹足七日展期。未開展,爆出李碧華拒絕梁振英,所以唔願意做書展年度作家,李教授先有得做,但講咗一日唔夠,好快就 die down。羅霖第一日都係威係勢,甚至有外國傳媒關注,風頭一時無倆。仲有前 TBB 主播陳珍妮出書數臭舊老闆,都係一炮而紅(咗幾日)。最巴閉,一定係四個入面年紀最細嘅楊鎧凝。

廣告

我嘗試用 Google search 呢四個人名,係書展展期期間嘅新聞數量,得出以下結果:

楊鎧凝(203 篇 8 頁)

羅霖(77 篇 8 頁)

李歐梵(63 篇 3 頁)

陳珍妮(2 頁)

廣告

鍾意鬥數字嘛,咁樣就高下立見(我指數量上)喇!貿發局其實都幾慘,辛辛苦苦搞成 600 場文化活動。當中好多名人大師,又有幾多人關心?話題呢家嘢,又真係難估過六合彩。老老實實,你 facebook 條 timeline 見到楊鎧凝定李歐梵多丫?怕且有啲人連老教授個名都未聽過,甚至讀都唔識讀。雖然阿妹妹個名都係蹺口杉手,但大家都識得講一句:美心妹妹,或者六歲嗰個啊?

數字係死嘅,人係生嘅。年年大家最興奮嘅,通常都唔係又成功打破咗啲乜乜乜紀錄,或者有咩名人講咗啲咩好啟發性嘅嘢,而係啲花邊新聞。自從𡃁模落場玩埋一份之後,我就冇再去書展喇。或者咁講,我再搵唔到入場嘅理由。

香港書展開足七日,好似好勁,成個石屎森林好似突然好有文化氣息咁。但你入場睇吓就知,賣書嘅人減價求售,買書嘅人唔係追星攞簽名,就係貪平入定貨,但一年都唔知睇唔睇到十本(十本都好似要求太高?)。我真心睇唔透,書展啲書好平咩?樓上書店長年做緊 7 至 9 折不等啦,唔介意二手平到 10 蚊 8 蚊都有,做乜鬼嘢要嗰幾日同全世界嘅人迫?

搞書展嘅好似香港咁,日日 B2C 我真係唔多覺有。你睇同一個月開嘅東京書展,或者年頭搞嘅台北書展,又或者再遠啲歐洲嘅法蘭克福書展,人哋雖然都有公眾時段,但主要都係俾業界交流。香港書展呢?B2C 好似好快見到效果,展覽(展銷會)好多人嚟啊,啲書好多人買啊。講到尾,咪即係當書係貨咁燒。作為文化商品,點可能同杯杯碟碟一樣咁賣法?

成日話,香港書業冇得撈喇,出版又難,書店又難,乜 Q 都難。如果政府真係有心做,就唔該佢源頭減廢,書展搞啲 B2B 嘅嘢,等香港嘅書業,真係可以透過書展望到世界,而唔係追住個大餅。不過,係賺錢大過天嘅香港,咁樣咁簡單嘅願望,可能都係一種奢求,唉!

發表意見