立場新聞 Stand News

《大樂師 · 為愛配樂》— 我不介意劇情荒誕,但 ...

2018/3/23 — 16:10

《大樂師·為愛配樂》電影宣傳照

《大樂師·為愛配樂》電影宣傳照

我唔介意一部電影劇情荒誕,如果你一早個設定話俾觀眾聽係荒誕嘅話。但用呢個方法講音樂有治療作用,可以帶人進入另一世界,坦白講,作為耳仔比較敏感嘅人,《大樂師·為愛配樂》好難令我進入導演嘅想像。

(含劇透)

人質與綁匪發生感情,之前都有拍過,我都可以接受呢個情節,合理化個有耳仔嘅綁匪幫手搵部琴返黎、同佢錄歌,同養聲上台演繹首歌;作作下野突然靈感到,抓狂咁要搵野記低,我都理解;但係呢個緊張狀態,見到黑白間條毛巾,然後聯想係鋼琴係上面彈住搵音,會唔會有點作狀?(如果個狀態唔係咁intense,而係海上冇野做,帶點詩意咁聯想,我係接受嘅)

廣告

《大樂師·為愛配樂》電影宣傳照

《大樂師·為愛配樂》電影宣傳照

廣告

另外,好多位都係因為「劇情需要」而做出黎,冇乜說服力。例如到男主角坐完監搭的士,咁啱的士司機以前跛腳,因為幾年前聽完佢唱歌令對腳郁得返;警察睇唔過眼,係女主角面前爆佢男朋友同第二個人過夜,令佢地「劇情需要」而分手;女主角同佢男朋友條感情線又冇點發展(更唔好講人物塑造),去布拉格取景,係咪有點浪費?

另外,既然套戲同音樂咁密切,即管講下聲音處理。Mixing 不嬲都係你做得好唔多覺,做得唔好會好容易留意到嘅地方。可能導演想設定一個比較虛嘅世界,好多地方用左好重reverb,例如Cherry係海上哼歌。可能技術上好難現場收音,有風聲,點都要後期去studio錄,但要突顯女主角音華嘅才華,同埋美妙嘅歌喉,眼見係海景大頭shot,聽到係studio般出黎嘅重reverb靚聲,幾對口型都好唔真實。

《大樂師·為愛配樂》電影宣傳照

《大樂師·為愛配樂》電影宣傳照

有朋友話睇左個trailer覺得好cheesy,係嘅,可能商業考慮,港產片嘅電影音樂點都要做一首有人唱嘅主題曲,雖然金培達都係一個我欣賞嘅前輩之一,但坦白講我覺得可以多點變奏,係咁聽住同一個key同一個tune,耳仔有d攰。(又可能關製作時間事)

有時唔係個觀眾有冇想像力,有冇丁點浪漫,而係電影有冇營造個空間俾人想像到。咁音樂同犯罪情節係咪永遠扯唔埋?唔係,上年嘅Baby Driver 係一套好好睇嘅商業片,仲要將兩者扣連得好好。(觀眾聽嘅野係從主角聽覺出發,呢個idea都唔太關budget事)

睇訪問見到顏卓靈對大樂師入座人數不忿,其實唔關演員事,佢地係個本上做得唔錯,但一部戲咁多成分決定成敗,演員只係其中之一。而加我覺得係因為較真實嘅綁匪情節同講音樂比較虛嘅事放埋一齊,導演未拿捏到應點執行,以致劇情唔make sense。人物性格上除左綁匪同男女主角,其他人刻劃唔多,最後好多位好hard sell音樂嘅魔力,怕觀眾唔知呢部戲同音樂有關。用力過度,自然事倍功半。

《大樂師·為愛配樂》電影宣傳照

《大樂師·為愛配樂》電影宣傳照

雖然唔係好鍾意呢套戲,但我仲期待之後上嘅港產片。聽聞將會有:《中英街一號》、《黃金花》、《非同凡響》、《逆流大叔》、《葉問外傳張天志》、《大師兄》、《熱血合唱團》、《無雙》、《逆向誘枴》、《翠絲》、《脫皮爸爸》、《獅子山上》、《某日某月》等等。大家密切留意。

(文本無題,題為編輯所擬)

發表意見