立場新聞 Stand News

好睇過《寒戰》的《拆彈專家》

2017/4/24 — 19:06

《拆彈專家》宣傳照

《拆彈專家》宣傳照

利申:資深華迷一名,不喜勿進。

有時會覺得劉華好傻好執着,細佢一截嘅謝檸檬都不過拋吓鑊鏟、晾下意粉扮廚神,劉華仍然搏晒命,想拍一套中港都接受嘅警匪大製作,於是有呢部佢監製嘅「拆彈專家」。

場面絕對逼真,交足功課,娛樂性都OK,買飛入場起碼不算「中伏」,演員除咗醜到不行嘅女主角之外,其他配角都揀得唔錯,黑仔繼續大勇,吳唱K表現都恰如其份。

廣告

美中不足之處,同大部份港產片一樣,都係劇本欠佳。拆彈又好、寒戰又好、竊聽系列也好,總令我諗起黑旋風殺蟲水廣告:「殺曱甴唔使用劍嘅,用黑旋風咪得囉!」即係寒戰班人想造王揀特首,根本唔使見血;竊聽要炒股票啫,亦唔使殺人;拆彈個奸角炸彈狂徒想復仇啫,好似N年前套生死時速咁,挾持一架巴士已經足夠,唔使挾持五百幾人,封鎖條紅隧三日。如果真係有咁大鑊嘢,解放軍12小時內要出動啦,全港停市、停課,戒嚴架啦!除咗炸彈狂徒外,幕後重有個老細,原來想逼政府回購西隧,順便炒高控制西隧間上市公司嘅股票。二、三百億港紙,大陸佬買兩塊地都唔止啦,使乜搞到癱瘓成個香港咁誇?

廣告

主題講炸彈,上半截講劉華拆彈嗰幾場戲,節奏掌握得比較好,後半截紅隧部份,反而忘記咗炸彈戲,令觀眾最緊張嘅一點,就係時間性,計時炸彈緊張之處在於計時,你一拖,拖足三日,中間重可以去救一救嗰條核突到無倫嘅女主角,邊有炸彈爭分奪秒,隨時死人嘅緊張感架,所以後段咪拖咯。

另外,喪屍片也好,戰爭片也好,警匪片也好,記住,千萬人皆可死,但要有一個核心嘅團夥,觀眾會好緊張佢地嘅安危,千萬人死晒,佢地都逢凶化吉嘅,史大林話齋,死一個係死,死一千人就係數字。(類似咁上下意思),隧道有五百人唔會令我好緊張,因為入面冇一個角色係會令觀眾緊張佢安危嘅,咁唔夠入戲,咪會開始挑剔你D細節位咯。例如網上過數,點過十億呀!媽咪,編劇個李敏有冇用過e-banking?

Baby John死嗰一場戲,就做到少少觀眾會替佢可惜,之後劇情應該繼續集中講隧道入面眾生相,而唔係無啦啦去咗救條女!

不過我絕對唔係話唔好睇,我個人覺得好睇過寒戰,亦睇得開心過一念無明。各位記住買飛唷!

 

作者 facebook

發表意見