立場新聞 Stand News

【專訪・有片】「粗口月餅」店主Naomi:香港人對生活好多不滿先咁鍾意

2018/8/14 — 18:12

講粗口或有損個人形像,不宜太多;但吃得下的粗口,又會否令你放心盡情狠狠咬下去,把所有不快不滿,吞下兼徹底消化?

近日社交媒體上流傳一張「粗口月餅」照片,月餅表面壓上一句含有粗口字眼的句子「屌你咩哈哈」。該月餅來自西營盤餅華爾登餅店。餅店店主 Naomi 接受《立場新聞》訪問,指此月餅最初純粹想送贈友人,怎料放到社交平台後,不少人想落單訂製。連日來社交平台和手機短訊查詢不絕,Naomi 笑言:「真係覆訊息覆到燥!睇嚟大家對生活真係好多不滿,先至咁鍾意粗口月餅!」

廣告

位於西環第二街的華爾登餅店,門口掛著 Naomi 的畫作。餅房門口放著草間彌生的 Postcard,寫著「堅持自己的夢想」。記者逗留間,見不少街坊前往幫襯,與店家有傾有講。有客人對 Naomi 說﹕「你紅咗喎﹗」Naomi 答﹕「唉,太遲了。做唔切﹗」

華爾登餅店與西環街坊的關係,不是一朝一夕。餅店自 1970 年代已於西環開業,至今已三十二年,所售賣的麵包和糕餅全由人手製作。餅店最初由 Naomi 父母經營,她從小在店內幫忙和打理;2015 年遷到新址後,她正式接手,由媽媽和做包師博從旁協助。

廣告

此後 Naomi 開始改革餅店出品。她一方面保留傳統包點製作,另一方面則設計新款的蛋糕和曲奇,接受客人自製曲奇,親手在曲奇上寫字畫公仔。至於每年中秋,Naomi 則會自行訂製新款餅模。

「我會用新訂嘅餅模整月餅,志在送畀朋友、舊同事。之前餅模嘅設計內容都好正面。不過今年發覺,自己同朋友都講多咗『嗰一句粗口』(屌你咩哈哈),就諗吓不如整呢款模。」

起初 Naomi 對生產月餅有保留,擔心粗口予人負面想法,但朋友提議她不妨從玩味角度想,當大家看到粗口月餅,笑笑無妨,也吃得開心。

「始終係月餅,傳統嘢嚟,怕會有影響。但其實放開心態諗,我又唔一定要以此做生意,just for fun!」

上周六(11 日),Naomi 把粗口月餅分享到餅店的社交平台,帖文指還會多設計五個粗口系列﹕「打七你寶寶 」、「心好累仆街」、「好撚正呀喂」、「屌你咩哈哈」、「痴膠線親親」及「係愛呀哈利」。餡料則分別有蛋黃白蓮蓉、日本紫薯蛋黃及日本綠茶豆沙蛋黃。結果網民反應超乎預期,截至 14 日下午,該帖文已錄得 1300 多個 like、 近 460 則留言和 330 多次轉發。訂單湧至之餘,不少網民亦留言向餅店提議更多粗言字句或地道用語,如「睇路呀你!」、「係窮呀,DLKH」等。

月餅由人手製造,「粗口」真正由心而發。

月餅由人手製造,「粗口」真正由心而發。

另類月餅,也衍生另類銷售形式,因為大家習以為常的「以禮待客」,來到粗口月餅時不太合用。

「熟客同朋友,都知道我有時會有一兩句粗口,當然太過份、太粗俗嘅我都唔會講;但同客人搞月餅訂單時,素未謀面嘅客人,都會用粗口同我對答,哈哈!」有客人發 whatsapp 給 Naomi 時整個訊息都是粗口,又有客人直稱 Naomi 為「仆街」。買賣雙方,粗口橫飛,同時又好受落。無論言者有意或無意,為開玩笑還是真心不滿,粗口於聽者一律變成有趣的「惡搞」,大家藉此放輕鬆、減減壓。

「昨晚凌晨兩點,我收到一位熟客向我落訂單。佢係一位媽媽,我從來無聽過佢講粗口,但佢竟然同我講話要訂十盒!我覺得好有趣!」

 粗口入文,句句能引經據典,其實可以無傷大雅; 粗口入口,吃得到的粗鄙和趣味,志在提醒大家:放鬆下啦,香港人。

「我沒想過要賣幾多個月餅或要賺幾多錢,而家我都驚做唔切要截單。有人唔鍾意粗口月餅,可以不買;鍾意嘅,就可以向我訂。我做生意都係咁諗,鍾意就幫襯我囉。如果有人覺得我賣嘅曲奇餅貴,咁你可以幫襯你覺得合理嘅餅店。我覺得只須要做我想做嘅餅。」

華爾登餅店有賣手繪曲奇,由Naomi 繪畫。

華爾登餅店有賣手繪曲奇,由Naomi 繪畫。

這種藝術家脾氣,可能源於 Naomi 藝術專科的學歷。當年她主修抽象畫。「我做餅舖做咗六年啦。我係鍾意畫畫,但係香港全身投入做藝術,搵唔到食啊!藝術創作做興趣就好。」她把畫畫的技能轉換到餅上,把餅皮化成畫布。如果說藝術是情感的表現,粗口月餅當然也是藝術。

而你始終嫌粗口不能出大場面?Naomi 說,餅店最出名其實是曲奇。她會為客人做手繪曲奇,許多客人會訂來做「散水餅」。

「手繪曲奇一塊我賣三十蚊架!的確唔平。但我喜歡做,鍾意寫字,而且咁樣嘅散水餅更加有心思。」

逐塊手寫,一塊一心意。(相片由受訪者提供)

逐塊手寫,一塊一心意。(相片由受訪者提供)

「早排,有位客人向我訂散水曲奇,一共三十幾塊。每塊寫嘅字句都唔同,內容都係圍繞佢同同事嘅對話。其中有一塊係畀佢老闆,寫上『懷著樂觀總有轉機』。我一邊寫,一邊眼濕濕。個 Farewell Party(歡送會)一定好感動!」

Naomi說,她也會被客人訂製的心意而感動。(相片由受訪者提供)

Naomi說,她也會被客人訂製的心意而感動。(相片由受訪者提供)

無論造餅或吃餅,搞笑又得,感動亦得。大大咬一口,得咗,無得彈。

店主Naomi

店主Naomi



文 / 蔡寶賢

_ _ 

華爾登餅店
營業時間:上午8時至晚上9時 
地址:西環第二街120-126號仁福大廈地舖

發表意見