立場新聞 Stand News

【我又睇咗啲乜】乳你童路賣乜廣告?!

2019/3/11 — 15:00

正所謂一百歲唔死都有新聞。生活在香港地,真係日日都有視覺驚喜!今次又係海報,寫住「乳你童路」,無獎問答遊戲,估吓咩葫蘆賣咩藥?

估你唔到,竟然係「中學生短片創作比賽」!衛生署主辦,話要「提高中學生持續母乳餵哺重要性的了解,以及推動他們支持母乳餵哺」。先唔討論點解要「由細入手」,中學生拖都唔准拍,就要支持母乳餵哺,張 poster 真係 bad taste 到一個點。一堆 BB 相,由上至下,由左至右,整齊排列好已經夠曬 leung。更加刺激嘅係,poster 正中央嘅一對心心。黃底紅心,成雙成對,仲唔係 lin 頭?!咦!媽咪話唔睇得呢啲嘢㗎!(再提醒一次:target audience 係純純的中學生哦!)

老豆見到張 poster 更加嘩咗一聲。佢話個名十足八十年代啲咸片,即係「豐乳童露」啲 friend~ 露點位置貼心心或者星星,簡直要勾起當年睇咸碟的人嘅集體回憶。(老豆千叮萬囑叫我記得寫:佢話佢只係行碟舖見到,佢從來無租過無買過。)點都好,小妹不禁慨嘆一句,出世得太遲,讀唔懂呢個 poster 背後嘅時代韻味。

廣告

嗱,必須利申,小妹我支持媽媽應該俾最好嘅小朋友,support 母乳餵哺係最好嘅。正因為咁,見到張咁嘅 poster 更加令人火滾!好好一件事,點解會搞到咁低俗?!香港設計到底要沉淪到幾時?

廣告

 

發表意見