立場新聞 Stand News

「梁振英下台!梁振英坐監!」 我只是想人知道 佢哋唔係文化藝術界

2016/9/10 — 2:39

今天的現場情形是咁的:我們在台前,一堆「嘉賓」上台,奏完國歌,先是霍震霆致詞,跟住到梁振英,佢致詞完畢返埋位時我大喊了幾次「梁振英下台、梁振英坐監」,然後旁邊的阿叔們就開始嚟料,喺度鬧我、推撞我、扯我手袋咁,好快保安就埋到嚟,話基於安全理由要請我離場。初頭我係話唔走的,但之後混亂下都係柒下柒下咁行咗出去,離開時班「嘉賓」在我身後好得戚咁鼓掌。出去後保安問我介唔介意俾啲資料佢,問我點入到場,我答佢「我介意」,佢就冇理我由得我走。

期間梁振英進入鳩笑mode,保安見慣大場面笑笑口,但是班「文化藝術界」阿叔阿嬸就好激動,有啲叫人捉走我,有啲叫我去做雞,諸如此類。

好多朋友問我是即興定有預謀,呢度一次過答。呢壇白痴酒會我是收到了邀請函,不過初頭冇諗住去,都冇用自己名義報名,後來覺得都可以去睇下究竟乜嘢人會去「慶祝中華人民共和國成立XX周年」(嘔),於是就去咗,而且是光明正大碌入去的。由於是第一次受邀,完全不知程序,也唔知有咩嘉賓,以為只有馬逢國,都有諗過嗌下「馬逢國不代表我」,入到去才見到原來二世祖霍震霆、垃圾桶劉江華、學生殺手唔得掂、財爺同689都有出席。所以簡單嚟講係冇諗定要做咩,因為我都唔知會見到689。加上又不是什麼社運人士、示威常客,真係好冇經驗,諗返其實應該拉隊報名去參加,應該打斷689個speech,應該企喺度賴死唔走,睇下啲保安會用咩理由郁我...不過算啦,有早知冇乞兒。

廣告

離場時冇預到要被傳媒扑咪(係,我乜都冇預到...),記者問點解要在儀式上叫佢下台,我唔知噏咗啲咩,其實答案好簡單,人在現場,梁振英企喺你十步之外,有乜可能唔叫佢落台?望住呢壇打住「文化藝術界」旗號粉飾太平、慶祝殺人政權成立幾多年的典禮,除咗搞亂檔仲會做咩呢,唔通企喺度拍手掌?

今日見到咁多愛國文藝撚,真是眼界大開,佢哋真係真心愛國,唱國歌唱得好投入,我叫梁振英下台,冇講過粗口,佢哋嬲到好似我問候佢屋企人咁。最搞笑有條友話「你都係共產黨俾飯你食」,我呸,共產黨幾時俾過飯我食,佢哋真係自己搖頭擺尾向老共乞食就以為全宇宙都同佢一樣,黐線。立場條片影到我鬧佢哋全部係共產黨走狗,真係由心而發的。事後屋企人打俾我,話啲阿叔咁衰、話我咩咩(做雞),好唔好搵律師告佢。其實我唔覺得俾人叫做雞有幾侮辱,做雞都是勞動,而且我相信唔少妓女的人格都俾呢班老屎忽高尚。佢侮辱的只是自己的人格,兼暴露了自己幾咁冇文化。

廣告

最後想講,好多朋友私訊和留言讚我好勇、係俠女,其實大家過獎了,我只是嗌咗幾句大家年中都嗌唔少的口號,如果咁就算英雄,咁英雄兩個字也未免太便宜了。我只是想人知道,佢哋呢個唔係文化藝術界,我所知的文化藝術界,唔係咁無恥同自私自利的,唔會對住一個破壞香港廉潔、公然與民為敵的冚家鏟仲一味拍爛手掌。現場得我一把聲,但我知道其實係有好多好多冇出席的人企喺我身後的。多謝大家的關心,不過真係唔使再tag我同讚我了,可以留意返朱凱廸同其他重要的事。

PS.雖然俾阿叔推撞拉扯咗幾下,但佢哋好廢,我沒受傷。

(編按:事件片段如下)

發表意見