立場新聞 Stand News

我武功不及他!殺不了他!

2017/2/6 — 12:35

作者提供圖片

作者提供圖片

舊著龍虎門係其中一套影響我好深嘅港漫(其他包括海虎II、中華英雄、古惑仔)。除咗通天教金庫一幕,龍虎門喺山洞呢幕我印象尤其深刻。

要講少少人物背景:

-老祖宗(圖中面有疤痕之金髮老嘢)係全漫畫最好打嘅角色,近乎不死身。人渣仆街嚟,為咗拎紫河車成仙飛升,無端端殺咗王小虎老死石黑龍嘅老婆。老祖宗嘅性格,同電視劇嘅丁蟹相若,總之佢(以為)佢啱晒。

-王小虎(圖中粗眉面闊黑頭髮嗰個),漫畫主角,正義之師,怒目金剛再世。因為自己兄弟石黑龍嘅老婆畀老宗祖殺死,對老祖宗根之入骨,成日想報仇。

-文殊天尊(原貌為圖右上角、其他嗰樣熔熔爛爛,五官不全嗰個都係佢)。

廣告

*   *   *

圖中山洞呢幕戲,係講文殊天尊因為愛人美姬移情別戀,中意咗老祖宗,一怒之下將佢先姦後殺。老祖宗捉到文殊之後,將佢瘋狂虐待-留意圖中佢左手同右腳已經無咗,仲要餵佢食補藥,吊住佢條命唔畀佢死。

廣告

文殊首先想激嬲老祖宗,等佢一怒之下殺咗自己,免受長期痛苦;老祖宗睇穿咗佢,講到明要陪佢慢慢玩,仲叫佢「小朋友,螻蟻尚且偷生,堅強點呀」。

然後文殊想搵人陪落地獄,轉移向王小虎入手,對小虎講:

「王小虎,你助紂為虐,老祖宗何嗜不是殺了銀鈴。

仇人就在眼前,你怎麼不報仇?」

的而且確,由老祖宗殺咗銀鈴開始,每次王小虎見到老祖宗,一定拳來腳往,招招攞命,成千期龍虎門(現實中足足廿年,由我小學到大學),只得呢幕係王小虎企喺老祖宗隔離而毫無戰意。

王小虎與老祖宗四目交投。

然後王小虎答文殊:

「文殊,你說得對!我很想殺老祖宗,為所有無辜報仇,但--

我武功不及他!殺不了他!」

呢幕顯示出舊著王小虎係一個堅有智慧、能屈能伸嘅人,唔係淨係得個勇字喺心口。佢好憎老祖宗,但佢同時知道,呢一刻自己同佢開波,莫講話自己有傷,就連十足狀態都最多頂到三個回合。未等到救兵石黑龍同蚩尤嚟到(蚩尤係石黑龍老婆嘅阿哥),王小虎肯定已經死咗。

王小虎想唔想報仇?佢恨不得將老祖宗千刀萬剮,煎皮拆骨,拎佢春袋BBQ,奈何形勢比人強,留得青山在,好戲在後頭。呢幾句對白,王小虎講得好型,但要壓住內心嘅悲忿,真係拍手叫好。

然後隨劇情發展,王小虎不斷增加功力、創出新招式,每次見到老祖宗都開佢波:

由全部隊友全力只係得蚩尤打到老祖宗一兩招、到後尾王小虎同石黑龍兩個人就同老祖宗勢均力敵,仲要殺死咗佢(不過後嚟又復活返),一步一步希望報一個仇。

比較遺憾嘅係,老祖宗最後被殺,並非死喺王小虎石黑龍嘅手上。不過,如果喺山洞呢一幕,王小虎唔係扮矮仔、無腰骨咁認低威,肯定早過文殊見上帝。

死,對王小虎嚟講或者無乜大所謂,但要死得有意義。逞一時之強,有骨氣有義氣,對事實未必有幫助;尋找、等候真正嘅機會,不斷自強,希望能真止覆個仆街桌。

*   *   *

十幾廿年,每次遇到類似無可奈何嘅情況,我都會諗起呢一幕同王小虎呢幾句對白。

呢個世界太多人以為自己啱晒、自己最聰明,人哋一定係乜都轉個頭就唔記得之無能小人、或者係趨炎附勢,毫無骨氣之輩。我從來無忘記初衷,總有一日,I will get you pay.

你要唔鍾意一個人,大聲講句「我就係唔撚中意佢」,省卻好多所謂分析,點睇都簡單直接得多。

 

作者 facebook page

發表意見