立場新聞 Stand News

我點解肯義務幫《點五步》歌曲填詞?

2016/8/25 — 22:15

電影《點五步》預告片段截圖

電影《點五步》預告片段截圖

【文:陳心遙(《點五步》電影歌曲〈沙燕之歌〉作詞人、《狂舞派》及《哪一天我們會飛》監製、編劇)】

本來唔想加把嘴,不過一來有人嘅回應開咗我名,二來我又唔忍心。

首先,《點五步》嘅創作同製作,同我完全冇關,我唯一嘅參與,就係寫咗《沙燕之歌》嘅歌詞,義務嘅。

廣告

其實認識我嘅唱片監製都知我寫詞唔會唔收錢,因為出道嘅時候同大家一樣被騙太多。但係當阿Day戴偉打俾我想我出手幫嘅時候,我一口應承,嗰陣我都未認識柯星沛(編按:《點五步》監製),更加唔知邊個係陳志發(《點五步》導演)

點解肯做?唔係因為覺得《點五步》好熱血好拚博,而係我覺得呢件事實在太荒謬:

廣告

《首輪劇情片計劃》政府好似好豪咁出二百萬,講明要人拍一部「商業片」,仲要批俾一部擺明講80年代同體育有關嘅戲,仲要唔准人喺出面搵額外注資。監製經驗話我知,成件事根本就係一個笑話。政府請運動員嚟做幾日Show都七百萬啦。

然後,學生組嘅設計,就係一定要一間有電影相關課程嘅大專院校認投,背後邏輯好清楚,就係「理論上」想借一部商業長片,嚟「培訓」電影不同崗位嘅人才。

好似好合理,但二百萬呢個數字呢?

我同黃修平(與作者合作多時的《狂舞派》、《哪一天我們會飛》導演)喺餐廳拗咗兩個鐘呢個問題。

我嘅立場係,如果係獨立電影,呢個數真係發達,Compare 一下鮮浪潮就知。但如果係商業片,即係意圖「拍出大眾娛樂口味,同各項技術如攝影、音效、視效、調色等等都要達專業水準」嘅電影,二百萬根本係黐XX。結果係點?就係要主創,特別係監製一舖碌盡半世影壇生涯嘅人情卡,去成就呢件事,而後來我喺一個場合認識柯星沛,亦都證實咗真係咁。

兩位發功嘅網友都在我Facebook Friend List之上,首先我要為佢哋辯護,我唔相信兩位係打手,同埋我係非常同意佢哋嘅觀點:「學生慣性無償工作,最後會害死成個工業。」至於當中製作團隊有冇壓榨,BU有冇用學分嚟威脅學生幫手,呢啲我諗無謂跟車太貼,希望盡快可以搵到真相。

至於有位Crew嘅朋友,一時衝動聲言要封殺指控嘅人,我理解佢嘅不忿,但對唔住,我未能苟同,相反應該誓死捍衛佢哋發表言論嘅自由。當事人出發點可能都係為學生同成個影業著想。我相信真理越辯越明,越打壓反彈越大呢個道理,最近咪有個人辦俾你睇囉?

講返,因為件事嘅荒謬,我決定出一點點綿力,花咗唔少時間去寫好首主題曲,去幫呢部好大機會會蝕錢嘅戲。遠嘅唔講,淨係講2015年全年同2016頭半年嘅「非合拍」純港片,票房成績只可以用「慘烈」兩個字去形容,長此下去,過多幾年好可能再冇「廣東話」嘅電影主題曲俾我寫。

作為電影製作人,冇得抵賴,一定要拍好啲戲,去吸引香港人再支持返香港電影。眼前現實係:戲院因為租金太貴,導致戲票越嚟越貴,一般觀眾係會傾向先選擇滿足眼球嘅荷李活大片。有一次,有機會同我尊敬嘅前輩蕭若元先生攀談幾句,佢話我哋呢代做港片都唔容易,形勢同佢哋嗰代相反:以前,港片只要係大製作同有大明星,票房就有一定保證,西片係小眾之選。而家啱啱相反。

荷李活製作費以十億計嘅大片,只要臨上畫前兩個禮拜谷行地鐵同Bus Shelter宣傳,開畫日票房一定係一百萬以上起跳,相反製作費一千萬樓下,兼冇大陸市場嘅中小型純港產片,開畫得幾十個場次,觀眾要等埋口碑,再諗諗吓係咪唔等DVD唔等Download先去買飛入場,仲要口碑累積,可以快得過俾戲院Cut場嘅速度,埋單五百萬已經好叻。

計計片商實收四份一左右,根本差唔多等如拍一部蝕一部,為乜?

產業北移嘅惡果,受害嘅首先係想入行嘅年輕人,佢哋連由低做起嘅機會都冇,跟住係年輕演員,冇足夠嘅本地製作,佢哋何來累積經驗,呢幾年香港嚴重缺乏年輕而有知名度嘅演員,最終輸嘅就係成個香港電影業。更準確嘅講法係,冇咗粵語為主體嘅港產片,輸嘅係七百萬香港人。

如果電影真係有濫用學生嘅熱血去謀利,咁絕對值得譴責同追究。我贊成如果電影賺到錢(唉⋯⋯),製作團隊用合理嘅方法補償返出過力嘅同學,呢個係應有之義。我支持心懷不滿嘅同學可以挺身而出,同製作團隊搞清楚誤會;我亦支持路見不平嘅朋友繼續發聲,去一齊推動影圈嘅健康發展同進步;純食緊花生嘅,言辭唔使去到咁盡嘅⋯⋯

我仍然係唔會叫大家去撐本土爛片;我亦都會虛心反省同檢討每一個對自己電影嘅批評同指教,呢個係我嘅Promise。但係,如果真係有一部勾起大家興趣嘅港產片,真心希望大家唔好等DVD或等Download,入戲院支持,如果部戲好睇,就推介俾朋友欣賞。香港嘅「文化」,而家係正在抗衡緊一對睇唔見嘅「命運之手」,我唔忍心佢死喺我哋呢一代手上:「贏就一齊贏,輸就一齊輸」。

最後多謝你咁好耐性睇完。作為一個局外人,我仍然想衷心多謝每一位出過力嘅浸會大學學生成就咗《點五步》呢齣電影,希望您哋每一位將來都有機會再圓一個又一個嘅電影夢,在香港呢一個地方。

「願你知每步每步和誰奮鬪;別再憂未能動搖命運之手⋯⋯」

 

#贏就一齊贏輸就一齊輸 #點五步 #沙燕之歌 #多謝浸會大學同學

(標題為編輯所擬;原刊於作者 facebook

發表意見