立場新聞 Stand News

新華社「一國兩制」神曲 其實反宣傳搞對抗?

2017/6/28 — 13:11

圖片來源:新華社片段截圖

圖片來源:新華社片段截圖

今朝至知有首咁嘅神曲!本來唔想 share,但諗深一層,睇得呢個 post 嘅朋友都應該唔會咁易俾佢洗腦,甚至忍唔住笑。再者,我懷疑製作首歌嘅,根本係搞對抗,放入大量「反宣傳」嘅音樂元素,令聽者不單只唔會感到欣慰,更會悲從中來,例如:

一)Rap 或 hip-hop(雖然呢首唔算 hip-hop)類型嘅曲風,本身已有反政府或反叛嘅意味;揀呢種曲風,已充滿隱喻。

二)前奏部份,係個不完整嘅 E Blue Cycle。入正歌時,又不斷重複 E 和 A7 嘅 chord sequence。到個男人快速 rap 時,音樂又去咗個不完整嘅 C# Blue Cycle。總之首歌 Blues 味甚濃。Blues 即怨曲,怨也;呢個「怨」,係指香港人對回歸所感到嘅「淒怨」還是「怨氣」?

廣告

三)到 chorus 部份(即「紅色的底」嗰 part),又突然去返 E key,但風格極 pop,甚至有啲低能,同之前嘅部份格格不入,十足提醒我哋回歸已來所感受到種種外來而跟我哋生活習慣/認知/價值觀格格不入嘅嘢(如拖喼、隨街大小便、人大釋法、政改落閘、銅鑼灣書店、以至最近劉曉波事件等)。

四)男人 rap 嘅部份,正正係基本法教育嘅部份,但速度明顯經電腦加快,正常人應 rap 唔到呢種速度。呢種加快,彷彿又提醒我哋「五十年不變」走樣變形嘅速度,係明顯又不正常地加快,快得令人覺得突兀。

廣告

五)最後,如要洗腦,易記係必要,而歌詞押韻係其中一個常用方法。但係 rap 嘅部份,尤其係男人 rap 嗰啲,又係最重要嘅基本法教育嗰 part,竟然係冇句押韻,叫人點記?還是歌曲監製根本唔想人記得首歌講乜?

(文本無題,題為編輯所擬)

發表意見