立場新聞 Stand News

《春嬌救志明》

2017/5/2 — 12:34

《春嬌救志明》宣傳照。(圖片來源:《春嬌救志明》facebook)

《春嬌救志明》宣傳照。(圖片來源:《春嬌救志明》facebook)

劇透......我講緊第三,第四同第五集。
.
.
.
.
.
here we go...
.
.
.
以系列第三集計,《春嬌救志明》算保持得唔錯。劇情、剪接、音樂有水準,撇除楊千嬅煩膠角色,抱住娛樂心態入場,呢套戲無令人失望。你要深度就麻煩睇《天堂小屋》、或者睇多次同樣由余文樂主演嘅《一念無明》。

不過......最令我唔滿意嘅係,《春嬌救志明》中兩次-係兩次-直接指出兩個人一唔一齊到係講運氣同彩數(一次係楊千嬅玩屋企嘅畫鬼腳、一次係外星人講)。現實中兩個人一齊,梗係講彩數;只係(1)你將運氣彩數變成片中主角能否一齊嘅決定因數同(2)兩次用呢個論點,以電影嚟講係好差。更重要係,志明同春嬌都唔係迷信嘅人。

如果要講彩數,成套戲前前後後幾十分鐘,一嘢剪撚咗佢。因為最終都係講運。

廣告

套戲當然有啲沙石(屹屹怪一段戲不合理地長;片尾嘅CG打怪獸,只能令我想到彭導演係為咗用下啲中國資金益下香港製作單位),彭浩翔喺合拍片中,能夠以春嬌、志明嘅品牌爭取到保留最大嘅香港特色,算好。(可惜鄒凱光喺第一集嘅角色係市狗,唔係差人。真正嘅差人係王宗堯。如果連王宗堯都有份,咁彭導就真正成功)

其實,我最欣賞嘅係彭導/編劇識得用一首歌、一個笑位掩蓋咗「張志明乜嘢實質嘢都無做到但連續兩集遇上危機都可以同返余春嬌一齊」呢個劇情。第二集係王馨平嘅《別問我是誰》,第三集係五月天嘅《志明與春嬌》廣東話版,兩集手法一 · 模 · 一 · 樣。

廣告

************

第四集講乜?

如無意外,志明春嬌系列肯定有第四集。回顧下一二三集講乜:

第一集:兩個人一齊
第二集:余文樂有外遇
第三集:楊千嬅有自我懷疑

第四集,如果照時序推進,而楊千嬅仲上到粉嘅話,志明春嬌應該差唔多踏入七年之癢,兼要舉辦婚事。

劇情就圍繞婚禮。因應第三集結局,張志明終於肯努力工作,為咗升職,成日周圍飛,婚事畀晒大住肚嘅春嬌搞(二人當然有嗌交同衝突)。然後終極大佬-志明喺加拿大嘅老竇老母出場,就婚禮安排同春嬌嘈,兼佢老過志明又上唔到粉。

春嬌有次喺志明公事包搵到避孕套,叫志明解釋,點知志明要趕上機/同客開會唔得閒理,春嬌發脾氣之下搞搞下小產咗,之後喺醫院識到外遇-一個好關心佢嘅中年失婚靚仔(例如金城武。不過係陳奕迅更加有說服力-佢以前溝過楊千嬅)。然後各人角力嗌交中女們又出嚟搞事,臨成功拯救感情張志明又收到長駐北京嘅工作,不過春嬌想喺香港生活,唔想離開。

不過,任憑過程係點,志明春嬌兩個人最終都會結到婚,ok?正如無論敵人嘅絕招係幾咁勁、戰鬥力係幾咁高,星矢同孫悟空等一眾主角都唔會輸,明唔明?

再去第五集,故事講到志明春嬌結婚生咗細路,如果千嬅仲上到粉,春嬌變咗做怪獸家長(楊千嬅做返自己),志明喺公司已經去到管理層,然後就同女下屬搞埋一齊......可以想像余春嬌成日叫張志明長大啲,結果長大後嘅志明升咗職,好自然就玩女下屬.......你話係咪自己攞嚟。

然後志明春嬌就變咗陰陽路、黃飛鴻,再唔係就係日漫《島耕作》系列(《課長島耕作》(共十七冊)、《部長島耕作》(共十三冊)、《董事島耕作》(共八冊)、《青年島耕作》(共四冊)、《主任島耕作》(共四冊)、《常務島耕作》(共六冊)、《專務島耕作》(共五冊)、《社長島耕作》(共十六冊)、《會長島耕作》(連載中)及《學生島耕作》(連載中)(依作品出版順序))。

《春嬌志明》系列拍咗七年,余文樂由得一個表情-食咗酸梅乾眼耳口鼻哪埋一注嗰個不耐煩表情-去到有兩個(請入場留意),楊千嬅個樣越嚟越似邵音音,搵佢哋演兩母女真係一流。其實,我上面提咗幾次楊千嬅上唔到粉,係想講志明同春嬌已經結埋婚,見好就收好重要,係時候搵下一對志明春嬌咧。

如果要拍結婚,彭導拍本人本鉅著《婚姻這種邪教》OK ? 個版權平讓畀你。(本文重點)

 

-完-

作者 facebook

發表意見