立場新聞 Stand News

港產爛片雜談:我阿媽發仔瘟

2016/12/27 — 13:44

年份:2005
片種:喜劇
導演: 鄭偉文
演員: 孔慶翔(William Hung)、薛家燕、田啟文、林子聰、陳國坤、恬妞、利嘉兒、蒙嘉慧、韓君婷、黃一飛、吳文忻

官方劇情簡介:

話說江南名城中一處煙花之地,花街柳巷不夜天,夜夜笙歌,酒樓樂坊,三步一閣,五步一樓;其中「尋歡樂坊」更是遠近馳名,晚晚座無虛席,它有一種特殊的吸引力,只此一家,賓客們無論進門時多麼心煩、焦躁、憂慮、緊張,光顧過後必定精神煥發,勁頭十足,心情暢快地離開。這種魅力令達官貴族、雅士才子無不趨之若鶩,都要來「尋歡樂坊」尋找精神慰藉。

廣告

這一晚,幔帳掀開,音樂響起,仙樂飄飄,「十二金釵」出場,每位美人手執一件樂器,婀娜擺動石榴裙,忘情地奏出醉人樂韻。這「十二金釵」位位絕色,詩、畫、舞、樂,樣樣皆精,是樂妓中的極點。五花八門,觀眾又能載歌載舞,「十二金釵」以各種各樣的姿勢,加上歡媽獨門的靚湯,迎得賓客精神煥發,銀兩花得十分豪爽。歡媽又教導「十二釵」女兒當自強,樂妓雖然在社會制度上身份卑賤,但是憑著一己所長自力更生,自尊自立,必能夠擺脫命運的悲劇。她最希望看見的是,十二個女兒最終都找到好歸宿,快快樂樂地生活……

***文章有劇透***

廣告

《我阿媽發仔瘟》嘅電影公司同宣傳部,應該好慶幸2005年嗰陣未有《商品說明條例》,因為套戲嘅內容,同上面嘅官方簡介,係兩回事嚟:顧名思義,《我阿媽發仔瘟》係講薛家燕好想搵返失散咗廿年嘅親生仔,同乜嘢「十二金釵」一啲關係都冇,不論係劇情、人物、主題都同上述嘅官方簡介截然不同。

為咗寫呢篇文,我第一次睇呢套戲。套戲由薛家燕主演,重點推介係貌似智力有缺陷嘅William Hung,再加一眾高級配角,睇陣容就知瀨硬嘢,所以睇之前已經將對呢套戲嘅預期壓到低無可低。點知佢最終都超越咗我嘅預期,比想像中更「爛」。

《我阿媽發仔瘟》爛嘅原因,就係作為一套喜劇,毫不搞笑,90分鐘內連令我笑半下嘅能力都冇(反而套戲完咗我笑鳩自己傻仔);劇情仲會令人步入婦女更年期-心煩、討厭、疲憊、沮喪,不斷睇套戲有幾耐會完。一套喜劇淪落如此,無話可說。如果一套日本咸片,唔單止挑唔起你性慾,倒轉頭似一盤又一盤冰水咁淋熄你嘅慾火,女優同導演可以拎去將軍澳堆填了。

套戲係唔係粗製濫造,根本無打算引你笑?非也。孔慶翔、薛家燕、田啟文、林子聰、陳國坤、黃一山,分明係搞笑能手;戲中亦有大量場面想引你笑,例如薛家燕著住黃色李小龍緊身衣扮Uma Thurman,重演Kill Bill嘅場面;又扮《英雄》,睇得出係落本之作,絕對唔係濫竽充數。

問題就係薛家燕好、田啟文好、林子聰好、黃一山好,全部只係非常稱職嘅配角綠葉,擔唔到大旗,你要家燕媽媽喺一段戲用三分鐘引你笑,可以(例如食神嘅角色,佢玩到2016年賣月餅都仲用緊);一眾少林足球演員,傍住周星馳,錦上添花(又係周星馳)。要佢哋做90分鐘主角,吃力不討好(註)。於是導演、演員都好努力,投資者都畀咗好多錢落去拍,可惜出嚟嘅客觀效果係:

「屌你老母,好撚胡鬧呀!快撚啲完啦!!」

揀William Hung,亦犯上同樣嘅致命錯誤。你喺youtube睇William Hung唱Ricky Martin 嘅She Bangs唱到似雞叫,條片一兩分鐘,你會喪笑,更加可以返睇一兩次。你笑,係恥笑佢個人本身,加上佢滑稽笨拙嘅動作;而唔係本身內容有幽默感。但叫你畀錢入場睇佢做戲?are you fucking serious?免費飛都浪費我時間。(註)

遺憾嘅係,你一心入場想睇William Hung,佢其實只係路人甲!William Hung唔係主角嚟!佢嘅戲份嘅戲份少得可憐,全數集中喺戲嘅前半部,比起少林足球三傻更少。最搞笑係,薛家燕好想搵返失散咗廿年嘅親生仔,並唔係William Hung!成件事極度驚奇!你用William Hung但佢居然唔係主角,真係奇人奇事。更驚奇嘅係,薛家燕嘅親生仔實質係另一個演員,完全係無名小卒,無交代過佢叫乜名!!

雖然戲少,William Hung依然難頂。佢唔靚仔、唱歌唔好聽、演技仲衰過《導火新聞線》嘅莊思敏(莊思敏成為技演差嘅完美示範)。佢可能係得罪咗導演定編劇,將佢首本(同唯一)名曲“She Bangs”改編咗做“燒餅”:

燒餅 燒餅 含有豐富營養 隨即可開餐

認真快靚正 燒餅 燒餅 陪我一起成長

產於家鄉 這份情誼長

啲歌詞完全唔撚好笑,胡鬧到核爆,再配合埋William Hung柒姑碌嘅樣同笨拙嘅舞步,簡直殺人。佢嘅角色仲要演一個好聰明又有計仔嘅後生仔……大佬,佢點睇都唔似囉。

更慘係十五分鐘內,William Hung已經喺兩幕分別唱咗一次“燒餅”,盡情強姦你嘅聽覺。第二次喺「尋歡樂坊」表演,眾人(被迫)同William Hung一齊跳舞。明知柒,大家都盡力交戲,笑口噬噬,除咗一個人:女主角蒙嘉慧!

蒙嘉慧喺呢一幕面如死灰,塊面黑過墨豆,打靶咁嘅樣,好似叫佢食屎嘅款(https://youtu.be/FX_N0832lP0?t=31m53s)。呢幕實在令我好驚奇,好驚訝,因為全人類都喺度敬業樂業嗰陣,得蒙嘉慧閪撚晒面。呢幕令我翻睇咗三四次,笑咗出嚟。

原來,

我已經pathetic到要喺一套笑片度搵一個演員閪面嘅片段嚟笑。

呢幕總結成套戲嘅精髓,絕對值得一睇。

倒返轉頭講,《我阿媽發仔瘟》嘅劇情,真係好似你星期日瞓醒唔想落街買嘢食,打開雪櫃見到乜就拎晒出嚟炒埋一碟咁,乜都有啲:有溫情有打鬥有搞笑有劇情有歌舞。90分鐘塞晒落去,就變得無頭無尾,無從理解,我睇完講得出主旨係薛家燕想搵仔,已經好難得。唔好講乜嘢伏線,連基本故事都無交待(邊個當初拎走薛家燕個仔?點解?)。最後作為捕快嘅利嘉兒話係因為暗戀無名氏男主角所以要一路追住佢,繼而轉移目標中意William Hung,我都覺得唔驚訝。

最後,2005年可以話係港產爛片豐收嘅一年,因為除咗上次套《阿嫂》,今次嘅《我阿媽發仔瘟》亦係喺呢年上影。另外,呢年仲有《喜馬拉亞星》、《無極》(合拍片)、《情癲大聖》、《雀聖1 and 2》呢堆片-上次已經畀好多朋友指出話係爛片。只能講句,2004-2005年,香港經濟處於復蘇階段,百業待興,導演監製同製片都《發片瘟》,點都要開部戲,燒下銀紙,振興下經濟咁。淨係呢年嘅爛片都可以睇死你。

養份時間:如何翻拍《我阿媽發仔瘟》

上次寫《阿嫂》,畀偉大嘅責任主編、即係我女友,話我浪費時間同墨水喺爛片度,寫埋啲無益無趣無營養無貢獻嘅文章(其實何止文章,我活咗三十幾年,對世界都係無益無貢獻)。我敷衍佢話下次爛片會加少少肥填料等佢有少少養份。

唔變主角(薛家燕)、唔改戲名,我會將《我阿媽發仔瘟》拍一套主旨為「唔理你變成點嘅仔女,阿爸阿媽一樣會咁愛你」嘅戲。劇本講

-薛家燕後生做捕快捉人,仇家偷偷哋捉咗佢個仔再將佢變性,洗埋佢腦,儲兵十年,報仇一天(好撚戇鳩哋幫人養埋便宜仔);

-前半部講薛家燕搵仔嘅笑料(可以假設薛家燕好有錢,好多人想扮係佢個仔);

-之後仇家同薛家燕再遇,個女殺咗薛家燕身邊嘅朋友。薛家燕以為呢條女係仇家個女,根本無為意有可能係自己個仔;

-個女暗啞底知道自己係薛家燕嘅仔,但仇家先係養母又怕自己變咗女兒身唔敢相認,再加上自己殺咗薛家燕嘅朋友,只好立下心腸弒母;

-最後決戰:女對薛家燕,薛家燕慘敗,個女正要出絕招之際殺薛家燕之際,仇家出手暗算佢,仲講出事實(養大人哋個仔去報仇-好撚偉大);

-個女同仇家講一早就知事實,念在養育之恩,會視對方為父親,點知對方鐵石心腸,十幾年投資都唔撚要;

-仇家出超必解決個女,薛家燕為佢擋一刀,話早就知個仔變咗女人,但唔緊要blah blah blah,媽媽點都咁愛你,二人相擁哭成淚人(下刪一億字);

-仇家原本想二人含恨含悔,偏偏母子情深。自己反而深深不忿,一生都冇人冇物,逐放棄報仇念頭。

由喜劇變悲劇,聽到都感動。

(主編按:有人港漫中毒)

(唔知幾時再連載,下次應該係《女人本色》)

───

《詹瑞文現象》

好多喜劇演員,喺套戲客串三幾分鐘,表現發光發亮,啲戲超搶,令部電影錦上添花,甚至乎你睇完套戲淨係記得佢;但呢啲演員自己一擔大旗,就會顯得吃力不討好,失去咗客串嘅色彩,變得好平凡。

云云眾生,詹瑞文係呢個現象嘅佼佼者。記得佢喺《買兇拍人》用鍾sir語氣講出尋找他鄉的故事嗰幕(「究竟喺薩拉熱窩呢個華人青少年,點樣用砵仔糕嚟醫陽萎呢?」),我睇咗十幾次,次次笑到收唔到聲;《大丈夫》做網吧經理、二次創作謝金燕首嗶嗶嗶,三幾分鐘,你畀一個位佢表演,一定掂。但一孭飛叫佢90分鐘做同樣嘅嘢,仆硬街-睇佢嘅個人楝篤笑真係笑唔出,悶到嘔,完全唔幽默。

我叫呢個做《詹瑞文現象》。

───

爛片系列

《阿嫂》

作者facebook專頁

發表意見