立場新聞 Stand News

港產爛片雜談:阿嫂

2016/11/10 — 12:07

人生不幸地睇過唔少爛片,當中又要港產片為主。現寫一個系列,介紹下港產爛片中嘅經典。

1. 何謂「爛」?

爛片通常有晒以下五個原素,同五行嘅金木水火土一樣,缺一不可:

廣告

(i) 套戲超級唔好睇
(ii) 同預期相差太大
(iii) 團隊(特別係導演)眼高手低/掛羊頭賣狗肉
(iv) 劇情不知所謂
(v) 中途有想離場、完場有想界櫈嘅感覺。

當中最最要嘅係「劇情不知所謂」。劇情不知所謂,又可分為三個層次:

廣告

-低級:劇本無頭無尾,以跳躍式進行,前言不對後語,無從理解,邏輯紊亂,又或是劇本毫無主旨、主線,令人摸不着頭腦。一路睇,你越會覺得劇本係編劇狂灌咳藥水+大量迷幻藥後用十五分鐘創作出嚟咁。例如,《女人本色》(梁詠琪、薛凱琪)嘅後半部,完全係暴走;《蝙蝠俠對超人》,一樣係令人拗撚晒頭。

-中級:無病呻吟、無的放矢、無中生有,懶有嘢、扮晒高深、只求營造「你睇唔明係你無深度」/「睇得明先係識睇戲」嘅感覺。例如:《吳清源》(張震)。唔係852嘅《游清源》,係捉圍棋嘅《吳清源》。

-高級:all of the above。例如:呢篇文講嘅《阿嫂》。

「爛」,乃一個相對嘅概念,係套戲本身嘅水平同你預期水平之間嘅差距。有時候套戲唔係太差,但你對套戲預期好正,結果套戲都會變成爛片。當然,更多時候係你對套戲已經毫無期望,佢都仲可以令你失望(例如王晶嘅近十年拍嘅任何戲)。又諗真啲,呢啲你無期望但仍可以令人失望嘅戲,就好似香港嘅舊泛民議員咁。爛係一個實際同預期水平之間嘅比較,係好主觀嘅嘢嚟。我覺得吳清源爛到核爆,但依然有人覺得好睇。

一套戲爛與否,與拍攝成本關係甚微。無畢直、卡士唔夠吸引、演員演出差勁(Janice Man in《大追捕》/《寒戰2》、莊思敏in《導火新聞線》)、拍攝水平低,可能令套戲唔好睇,但唔會搞到佢爛。

2. 關於港產爛片雜談

只包括2000年後,又已經落畫嘅港產片。斷人衣食,尤如殺人父母;由於夫妻如衣服,斷人衣食再等同殺人夫妻,話一套上緊嘅戲爛,一次過令人冚家剷太陰質,所以我只講落畫嘅港產片。限定2000年後係因為講得太遠古嘅嘢,冇人會記得,而其實90年代更加多爛片,淨係一套《超級學校霸皇》都夠講十日。

───

《阿嫂》(2005年)

電影資料:
導演-黃精甫
編劇-司徒錦源、吳煒倫

主演-曾志偉、任達華、黃秋生、方中信、劉燁、劉心悠、林嘉欣、廖啟智(客串)、元華(客串)、謝君豪(客串)、羅仲謙(客串)

官方劇情簡介:《阿嫂》是黑社會江湖電影,敘述香港社團大家族恩仇。

───

***文章有劇透***

啲人寫一個系列嘅文章,最正最勁最好睇嘅放喺最後(正如超人都係最後先出絕招),但今次呢套《阿嫂》,簡直站喺港產爛片嘅頂峰,遙遙領先,前無古人後無來者。《阿嫂》係港產片中爛嘅第一名,《寒戰》系列連車尾燈都見唔到。

《阿嫂》真係痴撚線,痴撚線地爛。當年喺nowTV爛片台睇,覺得爛,每次睇廿分鐘就要熄電視,最後分開四次先睇得晒(呢套嘢首播嗰陣仲要係每月大片嚟);十年又過去,舉止仍像少女,呢兩日睇返依然覺得勁爛。

套戲嘅最大問題(唔係唯一問題),係故事無厘頭到極點,基本上除咗曾志偉死咗、跟住好多人死咗、到最後劉心悠死埋之外,我講唔出套戲做乜。主角之間有乜動機、佢哋之間點解有衝突,最後點解又會回心轉意,完全無交待:點解黃秋生要恐嚇兼錯手殺死曾志偉?何解任達華要假傳聖旨?劉心悠唔識食魚同套戲有乜關係?元華同夢遺大師係咪親戚?小紅帽個故事做乜?曾志偉究竟點死?曾志偉點解要賣人情畀廖啟智?劉心悠搭超長電梯見班大佬講咗啲乜有乜結論?林嘉欣想劉心悠生定死?中間啲過場動畫想表達啲乜?最尾撞車嗰幕做乜鳩?呢啲問題,正常觀眾會問,但套戲無畀過任何蛛絲馬跡等你去搵答案。

《阿嫂》唔係偵探片,偏偏越睇越多問號,越睇越無厘頭,我變成羽田若希咁,不斷問「點解嘅?」「點解嘅?」「點解嘅?」「點解嘅?」「點解嘅?」,啲疑問全部無答案。到最尾撞車嗰幕,簡直將我嘅疑問(同我自己)推向懸崖。炒車呢幕事出突然、毫無伏線,無端端一大班人渣住堆黑色車,喺公路撞嚟撞去,啲車飛呀衝呀撞呀炒呀,撞足十分鐘,最後撞死咗劉心悠。你跟本唔知係邊路人馬對決,完全暴走嘅一幕。

呢幕似係導演差唔多拍完套戲,發覺有幾百萬畢直未用完,於是堆咗場撞車戲嚟洗埋啲錢佢……情形似每逢二三月好多公司就要想盡辦法洗埋之前預留嘅畢直,唔洗咗佢就唔心息。如果我係投資者,試片見到呢幕,一堆車(同自己啲錢)無厘頭咁燒法,真係心都寒埋,流血不止。

喺你鬆一口氣以為整個故事已落幕之際,眾人再嚟為劉心悠送殯(目測老臨過百,呢幕又洗你十幾萬)。林嘉欣講出咗佢演藝事業中最爆嘅一句對白:

「佢改變咗呢個世界。」

嘩!我屌!當年睇到呢幕,真係屌咗出嚟。套戲我已經要喺爛片台分四次睇。劉心悠改變咗乜嘢?純粹一個白痴妹走出馬路畀車車死之後無人要負任何刑責……樂觀啲,我淨係知呢套戲令呢個世界多咗一套爛片。

《阿嫂》嘅劇本,係屬於不知所謂嘅高級。

套戲有一大堆毫無個人特色、作用等同跑龍套嘅配角(劉燁、謝君豪、元華),完全唔需要存在(呢幾個人又用你一百幾十萬)。即使全套戲唯一稱得上有性格嘅人物-洛華姐/林嘉欣,都好似患撚咗精神分裂咁,性格唔撚連貫,做嘅嘢突然前後矛盾,完全相反:作為黑社會大佬嘅林嘉欣,喺套戲頭三十分鐘明明好想殺死佢殺夫仇人個女(劉心悠),每次見到佢都面目猙獰、咬牙切齒咁款;中途開大會都對劉心悠露出一種敵意、恨意、惡意、不屑同恥笑;點知一個屈尾十就坐喺後花園同劉心悠促膝詳談,面目慈祥、循循善誘咁解釋大道理佢知,又通水佢知係黃秋生殺咗方中信,最後仲要幫佢搞埋個喪禮。 

係,劉心悠改變咗林嘉欣,但點解改變、點樣改變?恕晚生廢柴,我睇咗好多次都睇唔出林嘉欣嘅心路歷程,只可以想像林嘉欣中途去咗福島/切爾諾貝爾(套戲無交待 of course,不過嗰陣明明福島未爆),中咗大量幅射後,個人性情大變。

套戲都恐怖嘅係:期望落差。既然有大量影帝影后級人馬坐陣,最忌嘅唔係佢哋人工貴(因為實貴),而係拉高晒觀眾對電影質素嘅期望。你只要有些少差池,一定畀人屌到飛起。當你有曾志偉任達華黃秋生林嘉欣廖啟智元華去演-that are 4 best actors 7 best supporting actors combined in the history of Hong Kong Film Award-仲有劉燁謝君豪方中信,觀眾會預計你套戲嘅其他配套有咁上下,例如劇本、拍攝、導演。《阿嫂》就話畀你聽唔好有錯誤期望,死還死、七孔流血還七孔流血。

我發現,近年每逢三個或以上影帝級人馬參與嘅港產片,幾乎必爛:

寒戰2:周潤發、郭富城、梁家輝(當然1都好爛,但2更加爛)

賭城風雲III:劉德華、周潤發、張家輝(當然成個賭城風雲系列,睇trailer都知爛;同埋都唔可以叫港產片)

越大卡士,爛嘅機會越高。

去返《阿嫂》。套戲搞成咁,導演黃精甫要負最大責任。好明顯,《阿嫂》沿用《江湖》(劉德華、張學友)嘅拍攝手法,充斥住大量扮晒嘢、無意思嘅鏡頭同攝影手法:將鏡頭打直(劉心悠見完林嘉欣喺街度行一幕)、打斜(林嘉欣離開寺一幕)、幅牆/不透明物件佔咗畫面80%+(幾乎成套戲),你想表達啲乜嘢?最撚搞笑係夢遺大師元華,神出鬼沒咁以極上武功打倒一眾黑幫人士,嗰幕似足古代無線拍金庸故事,主角要以閃身術快速移動嘅畫面……其實元華個角色應該由劉以達做。

電影又用上動畫嚟作過場-我從來冇諗過睇戲都有廁所位-作用不明、語焉不詳,除咗將套戲浪漫化,似乎只係為咗顯示導演有能力將唔同嘅表達方式溶入套戲度(btw,幾條動畫都要三幾十萬)。浪漫化嘅另一個證據,係導演刻意所有主角死亡「致命一擊」嘅畫面全部避開-有槍聲然後曾志偉倒地、鏡頭搖下搖下方中信就死咗……………諗真啲,拍黑幫片拍得咁搵馨,黃精甫應該改拍《真情》。

總結嚟講,《阿嫂》呢套戲唔可以用文藝片或者商業片嚟分類,咁分簡直係侮辱咗黃精甫。我會將《阿嫂》定性為一場行為藝術-黃精甫執導呢套戲係一個行為藝術、一場成功地將投資者幾千萬嘅錢倒落咸水海嘅行為藝術。佢希望透過令呢班有錢投資電影嘅人血本無歸,揭起一場反資本主義嘅運動。

如果你想知點解2005年以後,香港無人再出錢搵新進導演拍戲、又者只係畀雞碎咁多錢就想拍套戲,請睇一次《阿嫂》,再向黃精甫追究。

(唔知幾時會再連載)

───

《平行時空裏的2017》月曆
製作單位:小確幸城市生活

價錢:每個$148(包郵費)
眾籌日期:10月1日至11月25日
付運:12月中
詳情請睇以下網頁:
https://www.proj.hk/CalendarPrologue

───

(1)史兄新書《史詩式愛情》,已經正式上架
https://goo.gl/hvCG2E

(2)Project HK第二波:《平行時空裏的2017》月曆
https://www.proj.hk/CalendarPrologue

──────────────────
不要問,只要like,仆街史兄的專頁同IG。
Facebook : https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/
Project HK 專頁:https://www.facebook.com/PROJ.HK/

 

作者 facebook

發表意見