立場新聞 Stand News

王大導,唔係港味劇變牛雜,係你自己拍得渣

2015/7/2 — 13:29

《心情好又暖》宣傳照

《心情好又暖》宣傳照

據報,《風雲天地》王晶聲言,「港味」影視已失半壁江山,要保存是極奢侈。走純港味,會同牛雜檔一樣,變小眾味。

嗯。唔係港味劇變牛雜,係你自己拍得渣。講大陸?大陸而家都係仰望韓國。事實上東南亞以至外國,都睇韓劇。但韓劇有幾多香港牛雜味,王大導大概唔知?就講而家播緊呢幾部。《蒙面檢察官》,歹角講數場景專揀天台;《親愛的恩東》宣傳片抄王家衛又抄《甜蜜蜜》,報紙都寫過;《隱藏身份》同之前套《壞傢伙們》以致好多警匪片,無論由劇情套路到打鬥場面,都充滿港片港劇影子。

廣告

咁韓國人心目中的香港,地位又係點?《心情好又暖》裡面,富二代男主角黯然離韓,去唔成紐約,替補,就係去香港。其實有睇開韓劇都知,一到外遊,十之八九係去香港,我就冇記得有寫去北京同上海的。講電影吧。請王大導去問下韓國人,以致美英歐人,近年最中意邊套亞洲片?好多人會大笑著同你講,係星爺的《少林足球》同《功夫》!

以上通通都係港味牛雜,你說只是小眾嗎?唔係海外市場唔中意食香港牛雜,只係好多港劇港戲拍成豬餿。莫講牛雜,滷水夠小眾喇卦?去旺角肥姐小食店睇下,無時無刻的人龍,好多係講普通話!所以說,自己拍唔出香氣撲鼻的港味,就唔好倒果為因。

廣告

韓劇四處吸收別家的長處後,近年越見質高;海外市場有《星星》同《製作人們》,但同時不放棄韓味本土劇。今年百賞獎風頭最勁兩套劇《未生》同《聽到傳聞》,前者刻劃韓式職場文化,後者極盡諷刺韓國官商勾結的上等人社會,玩埋青瓦台。劇種之闊,內涵之深,都係少見於香港影視作品的。牛雜唔再香,係因為煮足幾十年都唔加料之餘,仲勁溝水嚟食老本;而當捧著產自香港這品牌,去撈內地油水,倒反而睇唔起港味了?咁係嘅,大陸十幾億人,就算得“小眾”收睇,人數都可能多過香港收視,自我感覺一定良好。但能入選米芝蓮的,只因好味,唔係因為賣鮑魚定牛雜;電影電視劇講出色,唔係大眾小眾,係講有冇共鳴。人性,只有大眾,沒有小眾。而且,王家衛就好大眾嗎?而又係要套套港劇拍到似法國電影嗎?

大陸市場大,要北望神州係好自然,創作人都要食飯,我理解。但就唔好將自己想搵快錢,同香港特色已死,混為一談吧。亦唔只大導一人。香港近年漸次失去特色同競爭力,正係因為各行各業有好多有權人士,用自己私心莽判香港死刑。

 

原刊於作者 facebook page

發表意見