立場新聞 Stand News

睇屍殺列車前速成班(一)喪屍片分類

2016/9/13 — 17:54

屍殺列車劇照

屍殺列車劇照

編按:- 放心,冇劇透 -

自從George Romero 1968年嘅元組喪屍片Night of the Living Dead 面世之後,喪屍片一直都係B片嘅一個大種類。大約去到Dawn of the Dead重拍版,喪屍片先至能夠有大片budget同格局製作。後來,改篇漫畫嘅美劇The Walking Dead,出呼意料大收,都算係喪屍片光宗耀組嘅時候。

如果你少睇喪屍片,我大約可以用以下分類幫你速成一下。以喪屍形態分類的話,有四大類:

廣告

1. 行路喪屍

呢個係祖師爺George Romero 嘅____ of the Dead n部曲嘅設定,好多年來喪屍片都係跟呢個設定(包括港產片生化壽屍),後來嘅The Walking Dead系列都係。生化危機就除咗啲飛簷走壁怪物之外,啲喪屍都係慢慢行嘅。

廣告

行路喪屍片通常有個附加設定,就係啲人死咗會翻生變喪屍再咬人,所以通常係醫院最先出事。(生化危機係怪物片,唔算)

2. 跑步喪屍

28日後系列、Dawn of the Dead重拍版,啲喪屍跑得叻過人(因為佢地唔會攰,而且好似瘋狗症咁)。不過,通常跑步喪屍片有個設定,就係啲人死咗唔會翻生變喪屍,一定要係感染咗先會變。

3. 跑步加層層疊喪屍

畢比特套World War Z應該係有史以來最大卡士嘅喪屍片,但劇情仲hea 過B片。不過,佢最大貢獻係發明咗層層疊喪屍,即係啲喪屍會好似入camp 玩team-building咁疊高到以戰勝高牆,個畫面真係幾震撼。

最近好heat嘅屍殺列車就係跟咗World War Z 呢個設定。

4. 跑步兼有意識嘅喪屍

1985年Return of the Living Dead,裡面啲喪屍識講嘢,仲識用計引人上釣,都算係好另類。呢套嘢裡面啲喪屍,爆頭都唔會死。

後來有套Warm Bodies,變咗羅密歐與茱麗葉咁,隻喪屍係羅密歐sosad,作為原教旨影迷我真係接受唔到。

祖師爺George Remero嘅故事裡面出現過個別發展到些少智力嘅喪屍,不過係極少數。

同場加映:

大家可能會問,點解個社會出現喪屍之後會變世界末日?

如果喪屍係第2至4類,只要啲喪屍夠大力爆門、跑得夠快,而感染到病發時間夠短的話(即係唔夠時間隔離感染者),咁喪屍係可以好快導致社會崩潰。

如果係第1類,咁慢慢行點會有事?所以佢地加入咗人死翻生會變喪屍嘅設定,若果喪屍出現之後,政府控制得唔好,社會陷入大規模騷亂,咁就會更多人死同變喪屍。當去到臨界點之後,社會制度崩潰,有槍嘅就變軍閥,到嗰個時候,就係人恐怖過喪屍,The Walking Dead 系列就係講呢樣嘢。

下次先真係講屍殺列車。

 

作者 facebook

發表意見