立場新聞 Stand News

精英 old seafood

2019/1/25 — 16:45

近日這個社會常常討論到我的年齡組別,60 至 64 歲,雖然重點在於從事勞動工作的基層人士,但大家對這一個「中年/老人」組別的健康狀況工作能力經濟需要的種種討論,都聽到我顛 L 咗。皆因有種「黐立立」的 stigma, 瀉到一地都係,搞到我幾乎又仆佐係條街。

有65 歲的羅致光說如果人會活到120歲,60歲只是中年,除咗病到五顏六色,沒理由不工作,其實大家可以去做地盤/做保安/執垃圾執紙皮執頭執尾,自食其力,繼續貢獻社會。羅局長和他那位快將62歲的老闆林鄭又親身示範60多歲是如何充滿活力, 可以做特首做局長做高官,只是你要像他們一樣精力充沛/英明神武/高瞻遠矚/才高八斗/學富五車、月入也可以有幾十萬,香港就是這麼公平的社會,只怪你自己唔夠叻,怪不得我們要被這一批60多歲的「精英 old seafood」主宰我們的命運,就係唔夠人地醒。

今天聽到香港大學首席副校長譚廣亨教受即將離任,surprise surprise! 好幾位朋友都把眾新聞的報道傳給我,可能知道我會捨不得 Paul Tam, 又會 “a bit emotive”!哎,Paul Tam 沒有回覆過我的公開信就下了台,我當然覺得有點遺憾。誰知當我看到這個「一人之下千萬人之上」的位置即將由經濟學講座教授王于漸暫代,我就更加 emotional! 人家 66 歲,還有人「翻兜」他,又再做多一轉首席副校長,真是可喜可賀啊,又忍不住自慚形穢。

廣告

Obviously, 他也和 Paul Tam 一樣已經得到65 歳之後的另一個 extension。大佬,人家已經大大方方告訴你自己是66歲,沒有扭扭令令,難道你又要問人60 - 64 歲發生了什麼事?65 歲之後又怎會比其他人得到更多?八婆,這些問題,你問完又問,想點!得到王于漸,你仲想點?

記得2016 年的特首選舉,王于漸組織了團隊參加高教界選舉委員會,當時我們的團隊 「Politics 1001: 學者抗命」正上演扻頭埋牆,但是不忘留意建制派的隊伍。話說有一次在校園派單張時,見到王于漸 and friends。嘩!王于漸曾做過任首席副校長,又是董建華的團結香港基金顧問,都會企係街派單張,勁呀,我們馬上加油!

廣告

在高等教育界有65人競逐30個席位,結果由民主派協調的「高教界民主行動」名單全取30席。王于漸得 1,010 票而落敗。大家都輸了,有點親切感,所以如果明天在學校碰見,或者我可以開口問問他extension 得到幾多年?

還有還有,2015 年 11 月港大校委會委員選舉,陳祖為和 Timothy O’Leary 競選校委會的教職員代表時候,他也是八位候選人之中其中一位。結果是陳祖為和 Timothy 以三百幾票高票當選,王于漸都只得179票。Strangely enough, 他在選舉上一次又一次失敗,但他依然不會放棄,似乎要在各個大小權力遊戲中佔一席位,可見為人好積極。最近又見王教授與37名學者發表聯署聲明,支持林鄭月娥的「明日大嶼」願景,他的積極程度,實在不能不佩服。

念在大家一齊派過單張,在民主選舉中碰過面,可能我可以弱弱的一問:

「王教授你申請 extension 肯定得好多年喇,如果好似我只得一兩年貨仔,你老細會話你時日無多,點會委以重任呀!你知唔知一條女可以怎樣被全面封殺呀!我由 56 歲開始,為了迎戰 60 歲大限,真係冇啖好食。呢,不過最近我在東邊街發現咗一間 cafe, 個老細對我不知幾好,知道我係港大教授,即刻俾個折我,仲可以訂位!王教授如有趣去西營盤食個 lunch,見吓外面的世界,可以考慮呢間,首席副校長,或者都有九折!」

發表意見