立場新聞 Stand News

致「出一點」:多行不義必有業報

2018/7/26 — 12:51

「出一點」的書展攤檔

「出一點」的書展攤檔

【文﹕Au Wing Yiu】

兩年前,接了一單散job幫補吓生計,幫部電影出本小說,聯絡人係那時「出一點」出版社的負責人 Gary Lai。當時他說時間趕急、想書展出,所以寫完先再簽約。基於信任便寫左幾萬字,趕起咗本書。

本身Deal過話有稿費加版稅,後來他提出不如全部都係版稅,約8-10%,而他言詞間表達得對出版行業好有熱誠,所以我覺得錢方面容後再談都OK。

廣告

書寫完,但Gary一直說唔得閒搞份約,我都保持禮貌,只係間唔中問下「hello幾時簽約呀?」但他就一直說遲啲,無幾耐,更話自己已經無做,pass左俾一個叫Lewis嘅同事。我都覺得似乎唔應該一直係我做主動不停追問,但「出一點」又真係無再聯絡我,咁我都係不時問下Lewis幾時簽約?而佢一直各種理由話未得,拖到後來書展也完,我恰巧不在香港兩三個月,就更加一拖再拖。

廣告

我講低過隨時可以Send email俾我,而佢當然都完全無咁做啦,一直無簽約,也一直無同我提過錢。我知道版稅呢回事好多時都係半年清算一次,或許亦有可能一年。我仲保持了對人性嘅少少信任,無再不斷不斷追。

事隔年半有多,「出一點」都依然無任何聲氣。

我上網search下,嘩,本書仲賣緊!就算銷量得一本,你都要俾返個幾蚊我吧?但年半了,「出一點」一直無聲無息咁袋錢唔出糧,心諗衰到咁?今年年頭,我再WhatsApp那位Lewis,雖然想鬧,但字眼都好禮貌咁問佢,點解你地咁做呀?而佢就覆我話佢都無做份工喇,會幫我pass俾佢啲同事...

結果~當然都係無再覆過~....

早排,因為眾籌咗一名叫「作者」嘅作者嘅書《捉姦》(希望你已經簽咗約,分得返錢),見到他在facebook出post話本書出得成,我check返個眾籌page,驚見原來負責嘅就係「出一點」,同埋Lewis -- 你又話已經無做!!!???

因為自己蠢,無簽過約,我知搵到你都無用。勢估唔到,I am not alone,睇到報導先知有成大班幫呢間出版社寫野嘅writer都係咁,齋寫無糧出!咁根本就係大規模詐騙啊!

難以置信的是,你們仲要在書展大搖大擺擺檔,仲要以眾籌出版社之名招謠撞騙。其實係食咗咩藥令你地夠膽咁沙塵、咁無恥???負責人被詢問時讓大聲說「兩年前啲數已經清哂!」,咁抵死!?我都仲生勾勾喺到,可以證明你地又講大話。

出一點 Chapter One (所有負責人),你地真係文字工作界嘅渣滓啊。就算避得過法律責任,多行不義必有業報~

促請你們:
盡早收手,別再欺騙作者們;
站出來正面交代事情;
及向所有合作過或合作中的伙伴處理清楚返數目。
別再打算蒙混過關不了了之,否則會考慮循民事索償。
面斥不雅! 

(原文刊於作者 FACEBOOK,無題,現題為編輯所擬。)

發表意見