立場新聞 Stand News

貴妃出浴省招牌 — 光昌燕窩行

2015/2/19 — 4:25

今天上環只剩下數間售賣燕窩的老字號,光昌行算是最聞名的一間。打從二戰後開業至今已逾七十年歷史。每次經過店舖,都會見到老闆陳熾謙和伙計圍在桌面上埋頭苦幹,「啲燕窩返來要執毛,分盞分等級,好多工夫做㗎。」陳老闆娓娓道來原委。至於店中掛有「光昌行」三個大字的搶眼招牌,卻是來頭不少,原來出自書法名家區建公手筆。「個招牌自開店就有,聽聞係我父親託朋友介紹搵佢寫,佢唔係個個請就寫,好有性格,當時好多人話,搵區建公寫招牌,間舖就唔會執笠。」陳老闆說來沾沾自喜。

除了售賣名貴燕窩和此靚招牌外,原來光昌行還有一寶;就是沿用了數十年的「貴妃出浴」包裝彩盒。盒面上畫上貴妃和侍婢,一層薄紗,隱約透出玲瓏浮凸的身材,令人想入非非,即使今天看來,仍然非常大膽奪目。「有啲人客直情無用呢個盒都唔買,記得個陣個畫師同我父親保證,呢個盒裝一定掂。」果然不出所料,此個包裝風行半世紀,歷久不衰,人見人愛。

多年來,燕窩被視為養顏滋補的貴價食品,女士恩物。隨著國內經濟發展,不少國內買家更會趨之若鶩,專程來港搜尋「正貨」,據陳老闆所言,今天八成都是國內買家,反觀昔日本地和日本買家相對減少。正如老話一句,豈有豪情似舊時。

廣告

 

原刊於Simon Go Facebook Page

廣告

發表意見