立場新聞 Stand News

金像獎變預告片? 入圍電影未上映 谷德昭嘆「唔同咗玩法」

2019/3/12 — 18:16

圖片素材來源:谷德昭 facebook

圖片素材來源:谷德昭 facebook

第 38 屆香港電影金像獎頒獎典禮下月 14 日舉行,但《三夫》、《淪落人》、《G 殺》、《非分熟女》等入圍電影至今仍未正式上映,普羅大眾想睇都冇得睇。香港導演谷德昭大吐苦水,日前他在 facebook 上載一張與《三夫》女主角曾美慧孜的合照,並感嘆自己仍未看到她的演出,他說:「不是不想看,只是看不到」。

谷德昭直言,今年幾套獲獎呼聲高的港產電影都很難看到,要很「神心」才能看到,「因為只有特定的幾天、特定的幾場」。例如入圍最佳電影的《淪落人》要到下月 12 日才正式上映,目前大概一星期只有兩、三場特別場。難怪谷德昭話「神心都冇用」,因為找到場次後,還要看你有沒有成功搶到預售票,手快有手慢冇。像是谷德昭就是出手太遲。谷德昭說:「以往戲多唔覺,但今年幾齣攞獎呼聲高的港產電影不約而同都好難睇到,唔係好難睇,係好難睇到。」

廣告

如果識電影圈人又睇唔睇到?當然沒問題,還可以安排到優先場或口碑場。但谷德昭直言想要看公映場,「同業內人仕一齊睇戲,似開 OT 多過娛樂」。他表示,入戲院是想要和大眾一同感受一部電影。

最後,這位香港影人也不禁感嘆:「巿道艱難,小本經營」。他明白,若電影能在攞獎後才上映,當然會有較好票房,但「只怕金像獎會逐漸變成預告片,預告將會有什麼好片並已頒了獎項,普羅觀眾在之後才按得獎名單索驥」。普通觀眾不再是守著電視金像獎直播,緊張地等待公布結果,看看獲獎的是不是自己的心水電影。

廣告

「咁係咪唔得?又唔係唔得,因為符合了白紙黑字,只係唔同咗玩法。」谷德昭寫道。「2019 年,我感受最深嘅係——咩都唔同咗玩法。」

發表意見