立場新聞 Stand News

阿叻做招牌,無綫唔死至怪

2016/8/30 — 18:18

資料圖片:陳百祥,圖片來源:Yes娛樂片段截圖

資料圖片:陳百祥,圖片來源:Yes娛樂片段截圖

【文:蘇哈】

無綫巨額投資搞奧運直播,以為可一振頹風,贏取日漸下滑的收視,怎知公眾兼廣告客戶反應空前冷淡,巨額投資誓必蝕到入心入肺。無綫最大敗筆,是奧運前台戲的重頭宣傳,竟可贑居至以公眾形象差劣的阿叻為領隊,唯恐公眾不夠嘔心,還當日夜艱苦操練的本地運動如無物,搵阿叻代表香港去傳遞聖火,消息一出全城媽聲四起,就是在這樣惹人反感的爛招牌下,無綫揭開獨家轉播奧運的序幕。咁咪死硬囉!

選港姐搵阿叻、台慶搵阿叻,踢過兩下足球以及可能和高層關係良好,奧運團隊首領又係搵阿叻,觀眾反感,即使無台轉也可玩其他東西,最難受的是眼巴巴看著老細把榮耀盡歸行外人的無綫專業體育團隊。又是找個三流的百搭主持,公眾唔洗睇就都知節目係乜貨色,即使大部份奧運節目由專業評述員負責,但壞印象一早建立,公眾不如上網睇或乾脆走去捉寵物小精靈算數。

廣告

同阿叻同時間出道的明星,由周潤發、劉德華、梁朝偉都各領風騷,即使親密拍擋如曾志偉,拍廣告和電影(包括一些認真的電影)的機會,比他不知多幾多倍。這個阿叻有幾叻大家心中有數。很多很多年前阿叻形象流行,不是因為佢真係好叻,而係佢代表我地香港人日常接觸那一類又寸又無料之輩,公眾最大的喜悅是他寸完之後就衰咗,就正如當年顏國梁扮演那勢利貪婪無品的陳積一樣,往往給本地觀眾有份「梗有一個喺左近」的現實又怪異地有點親切的香港感覺。

阿叻的悲劇是其形象之受落,是他代表著我們香港人日常生活中既討厭又確實存在的「丑人」,但他卻未有那智慧明白當中原因,還以為自己形象流行,是因為自己真的很叻,繼續以寸自我標榜。現實是,可能除了無綫幾個不思進取的大老板外,沒有人覺得他叻,如果不是討厭的話。

廣告

隔了不知多少個十年,仍然搵阿叻做招牌,無綫確是人才凋零,這也歸咎管理層不長進。今天企業如果仍抱殘守缺,沒反省和思變能力,實難以生存,何況是搞要緊貼時代的娛樂事業?看來,無綫的廣告推廣部,應集中那些「免審查即刻批人壽保險」、或者「你用咗未白髮變黑染髮水」,可能是唯一出路。

阿叻成為無綫招牌,反映出漠視公眾看法,只求跟上頭打好關係,令自滿自大的高層感覺良好,這心態和運作模式,又何嘗不是梁振英政治的縮影?

 

發表意見