立場新聞 Stand News

2020 年前唔死得嘅理由

2019/2/1 — 16:54

文中含有經典美劇《Game of Thrones》同《Breaking Bad》劇透。

理由得一個,唔係我要結婚。

Netflix 同 ESPN 合作,製作咗套 1998 年公牛隊第二次完成三連霸、米高佐敦拎最後一次冠軍嘅紀錄片:

廣告

“The Last Dance”

廣告

2020 年播,共十集。

佐敦、公牛、連霸,即使百睇不厭,呢個題材已經畀人拍咗一千次。好咧,“The Last Dance”嘅重點:

A film crew was granted unprecedented access all season long.

嘩,有新內容內幕,好大機會有佐敦屌鳩隊友嘅真實片斷。

預告片顯示,紀錄片訪問哂團隊重心人物 — 佐敦、栢賓、洛文、教練積遜、現任勇士教練嘅卡爾 — 如果卡爾今日做球員,憑佢射術應該入選全明星賽;如果卡爾無任教勇士拎咗三隻冠軍指環,套紀錄片未必會訪問佢。希望訪問埋古高、哈柏、球星攝石布朗,同公牛 1998 年決賽嘅對手、唯一一隊喺總決賽兩次面對公牛嘅爵士隊成員,馬龍、史托頓、羅素(機會甚微,腿張開畀你灑鹽咩);至於爵士隊教練史龍,早兩年患咗老人痴呆症(去你的政治正確「腦退化症」),應該無緣上鏡了。

最想睇嘅唔係洛文,而係佐敦/栢賓同古高嗰陣嘅關係。故事一疋布咁長,大概係:

  • 公牛隊 90 年初簽咗嚟自克羅地亞王子古高,畀唔到高薪栢賓;
  • 佐敦同栢賓喺 92 年巴塞羅那籃球賽美國對克羅地亞時,先後防守古高,名為試下佢有幾多料(當時古高仍未向公牛報到),實為報復;
  • 93-94 球季,佐敦退休、古高第一年加入公牛,當時公牛以栢賓為領導;
  • 93-94 球季季後賽,第二圈公牛對紐約人賽事,教練積遜居然將最後一擊交畀古高射。栢賓嬲到拒絕上場……點知古高又射入咗仲贏埋。

落入中國人手中又會變成球場宮廷劇。你唔好理,95 年佐敦復出,幾條友又一齊拎到冠軍。但栢賓張約始終搞唔掂,98 年攞埋冠軍,夏季佐敦退休,栢賓就被送往侯斯頓了……後嚟幾條友應該無事,栢賓入選 Hall of Fame,古高亦獲邀到場。

希望 The Last Dance 可以交代下佐敦/栢賓同古高嗰陣嘅關係。

2020 年前,我唔想死住。

我同朋友講咗,萬一我有意外,要燒成 DVD 再燒畀我。

希望唔好訪問埋啲無謂人等,例如同 1998 年決賽無關係嘅人(如巴克利)、1998 年仲未入 NBA(如 LBJ、Curry)、甚至未出世嗰班人(如 Luka Doncic)。

希望唔好訪問埋啲無謂人等,例如同 1998 年決賽無關係嘅人(如巴克利)、1998 年仲未入 NBA(如 LBJ、Curry)、甚至未出世嗰班人(如 Luka Doncic)。

✽ ✽ ✽

只有 90 年代嘅人和事,先可以隔咗廿年,依然震撼到人心。

近排 Netflix 播嘅《高分少女》,故事背景係 90 年代初,配上當年打機熱潮 — 街霸 2、餓狼、豪鬼、1943、Final Fight,然後 PC Engine,超任出街霸 2,Play Station vs Saturn……一路睇一路眼泛淚光,故事主角戀愛情節頓時變得次要。如果將呢堆街機換咗頭文字 D、高達,甚至乎換上 Counter Strike、LoL、PAD、神魔、FGO,會有同樣震撼同感動嘅效果嗎?

No disrespect for anything, but everything in 90s is just the best and will remain the best in human history.

地球人類文化、民主政制、世界經濟增長、科技發展,最快最強嘅十年。一個沒有互聯網嘅年代,你時間多得很但資源好少 — 不論係金錢、資訊定係實際娛樂渠道。於是一期 Jumpshoot 你會翻睇四十次(我仲記得 Jumpshoot 第一期有張圖下面寫住「小心今季的騎士隊」、但圖裏面明明係公鹿隊嘅球員)、《稻中兵團》喺同學之間傳到爛(「沒希望了,睡覺吧。」「誰來給我關燈呀?」)、郭富城一首《對你愛不完》唱足幾年、大家心甘情願排幾個鐘入書展買動漫精品(sorry 原來到今日依然有人排隊)、PS 隻實況一個版本無間斷踢足一年、電台 DJ 播新歌你要捕喺收音機前面準確按下 play + recording 掣,然後拷貝幾餅雜錦帶。班中最有價值嘅同學,係屋企有兩部錄影機嘅肥仔 — 佢可以將 ATV World 播嗰場剪咗廣告嘅明星賽 VHS 量產 — 人人有波睇。

今日睇返,當年消費非常集中:整個社會,一段長時間可以集中幾個項目、幾個歌星(四大天王)、幾首歌、幾個遊戲(龍威三十部街霸)、幾個牌子(Boy London Body Glove Bold 袋 Timberland Levis501 JPG銀包 Polo Shirt MD 地圖袋)、幾套電視電影(雙周一成 — 你明就大鑊了 — 周星馳周潤發成龍)。

嗰個年代,時間量多(相對娛樂項目同渠道而言),資訊不足,你投放好多時間喺某兩三樣娛樂度,時間邊際上唔值錢而每樣娛樂嘅邊際價值高。每樣娛樂你都記得好清楚,清楚到隔咗幾十年仲記得 — 上面寫嘅每一樣歷史事件同回憶,我唔使 google、唔使搵資料,根本係生命嘅一部份。而我肯定,好多朋友對於 90 年代嘅人和事,一樣如數家珍。google 乜春?我哋就係 google 了。

相反,而家有寬頻 + 智慧手機,隨時搭通天地線,一心萬鳩幾用,時間少(相對娛樂項目同渠道而言),已經無可能將專注力放喺某一兩樣娛樂上,邊個仲會花時間重複睇同一套戲幾次 — 嗰五六個鐘嘅時間成本係幾乎另一整套 Netflix 網劇咧。就算係同一項娛樂,花樣五花百門 — 你有冇聽過試過同人討論 Netflix 有乜嘢好睇,然後發現大家覺得好睇嘅,有 90%+ 嘅係唔同?

你留意下,而家好多電視劇同電影,故事設定喺 80 年代尾、90 年代初,例如 Netflix 嘅 Stranger Things、之前提及嘅《高分少女》、港產片《某年某月》、台灣套《我的少女時代》。而家通訊咁方便,點會唔穿橋?古天樂同劉若英於《生日快樂》中互相走訪對方大學宿舍,結果一齊摸門釘;如果呢樣嘢發生係 2018 年,觀眾點會唔𠝹櫈?「戇鳩嘅咩,唔識 send message?」

相比起 90 年代,而家嘅時間非常值錢但每樣娛樂嘅邊際價值超級低、低到賤、賤到根本唔會有人肯畀好多錢。

【對唔住我又講咗 economics。唔使深奧數學,同一條邊際價值遞減曲線(diminishing marginal value),數量多了,總體價值上升,邊際價值下降;要用時間作為消費嘅成本,時間用得較有效率,於是每一個單位嘅時間所能消費嘅娛樂多咗,時間嘅價值-不論係邊際同總體-同樣上升。】

世界充斥娛樂,Youtube Netflix Facebook Medium 抖音不斷爭取你用多幾分鐘、ASOS Zara H&M Amazon Prime 淘寶最怕你唔來,2010 年打後簡直係消費者嘅黃金時代。時間用得超有效率,人類整體生活水平超高,結果係:對每樣嘢嘅邊際價值接近零。以前 game 書有個最期待即將推出遊戲嘅投票,當刻 Netflix 嘅片庫要窮盡我一生先睇得哂(at a cost of $98 per month),我仲邊有空間同時間期待未來嘅事?

所以,我好慶幸世間仲有一兩個節目同電影,畀自己期待下。

✽ ✽ ✽

如果 2017 年你問我,有咩原因令我唔想死,我會答你 Game of Thrones Season 8;苦等兩年,Game of Thrones Season 8 今年 4 月終於上。個人認為最好嘅結局係:

1. 人類們奮戰,將喪屍軍團(或異鬼大軍)殺個片甲不留;

2. 臨殺鬼頭時(夜王 aka Night King;畀我譯叫「鬼頭」好過「夜王」),死剩種人類呢個時候鬼打鬼;

3. 鬼頭剩機覆桌,取得最後勝利。

呢個結局正到爆,鬼頭代表嘅獨裁統治(畢竟只有鬼頭一個人有智慧,能操控所有鬼仔嘅行動),打贏人類代表嘅西方社會文明。即係乜?中國/俄羅斯終成最後贏家。民主在退潮呀。sorry 每遇到呢啲大結局我就會忽上腦:〈技術文:Thanos 計錯數?〉

鬼頭勝利呢個結局好黑暗 — 其實 Game of Thrones 一直黑暗,壞人作惡得戚嘅時間,肯定長過正義佔上風。Joffery 條仆街仔玩串個 party 幾季,毒死嗰段得五分鐘。較 BBQ 埋尾同爛尾嘅結局,係鬼頭同 John Snow 傾個 soft Brexit,人類畀些少地同資源鬼頭,大家快快樂樂永遠幸福生活,人類繼續自己鬼打鬼(即係去返成個故事嘅起點)。

又或者講,鬼頭其實係人類嘅負面因素嘅副產品(包括污染地球、道德墮落、心靈空虛)……詳情請睇楳圖一雄嘅《漂流教室》裏面狂食嘢嗰隻蜘蛛怪。

Open ending 亦有可能-暫時殺退鬼頭,然後 John Snow 一句「佢哋十年內應該唔會再南下」作終結……詳情請參照《火影忍者》第一部完結自來也話曉應該三年來唔會再出嚟搞事。萬一 HBO 業績唔掂,Game of Thrones 2 都不是沒有可能,睇下(反正外傳已宣布會開拍)……《火影忍者》班主角嘅仔女,一樣有套漫畫,設定同故事背景,第一第二集倒模咁倒。

Game of Thrones 第六七季已經無咗頭幾季嗰種出奇不意 — 第一季阿爸畀人殺、第三季鮮紅婚禮(the Red Wedding),翻睇幾次依然震撼 — 同一樣嘅震撼,我呢幾年嚟只係喺 Breaking Bad Season 6 Episode 14 Ozymandias 搵到(Mr. White 個舅仔 Hank 畀人隊冧嗰集;重睇過三次。Breaking Bad 拍咗 6 季,為嘅係舖排呢一集,將 Mr. White 做人製毒嘅最高原則 — 唔可以傷害屋企人 — 徹底打破)。整體嚟計,Game of Thrones 肯定係殿堂級美劇,排頭三甲了。

Game of Thrones 係極少數西方電影劇,大部份男主角身高唔夠六呎:Kit Harrington(173 cm)、Peter Dinklage(135 cm),肥仔都只係 17x;女主角們更矮,Emilia Clarke(157 cm)、Maisie Williams 自拍第一集就未高過(155 cm)。希望編劇完結前可以話我知 Stark 死咗嗰個細佬喺套劇有乜用。另外,個人估計 Peter Dinklage 應該死喺閪婆 Cersei 手上,然後 Jamie 殺死 Cersei — 呢三個人應該係殺破狼嘅關係,相沖相剋。

Game of Thrones 係極少數西方電影劇,大部份男主角身高唔夠六呎:Kit Harrington(173 cm)、Peter Dinklage(135 cm),肥仔都只係 17x;女主角們更矮,Emilia Clarke(157 cm)、Maisie Williams 自拍第一集就未高過(155 cm)。希望編劇完結前可以話我知 Stark 死咗嗰個細佬喺套劇有乜用。另外,個人估計 Peter Dinklage 應該死喺閪婆 Cersei 手上,然後 Jamie 殺死 Cersei — 呢三個人應該係殺破狼嘅關係,相沖相剋。

✽ ✽ ✽

文章開頭提起米高佐敦,NBA 明星賽又快舉行。我寫咗好幾次 — 而家嘅明星賽已淪為浪射三分、花式入樽賽、零防守,等同浪費時間,連精華都唔會睇。當年 1994 年栢賓紅鞋兒嗰屆,屋企餅 VHS 睇到花哂都仲要睇啊;1991 年魔術手嗰屆,第一節好睇過而家總決賽呀,淨係湯馬士嗰陣錯腳錯手上籃已經值回票值(以下篇文裏面有 link:〈技術文:七個令NBA更刺激(或無咁沉悶)嘅方法〉)。

對於近幾年嘅 NBA,我只得一句評語……要令 NBA 更刺激(或無咁沉悶),聯盟要認真考慮以下方法。

撇除明星賽唔好睇,「入選 NBA 明星隊」作為球員當年表現同球技質素指標,仍極具參考價值。當有人話呢條友係某年 All Star,佢嗰年表現應該係全聯盟最好 30 人之一。

至於明星隊正選十人,係咪應該全部依照公投結果,唔使再後補球評同記者投票?

得呀,如果你擔保以後唔會再有大陸人打 NBA、又確保唔會再有 Zaza Pachulia 事件再出現,咁咪全部公投囉。如果班蠻荒人翻牆狂投王治郅、易建聯、周琦,明星賽打正選,問心,咁嘅明星賽你睇唔睇?呢個唔係 DQ 唔 DQ、有冇選委會嘅問題,而係投票要建基於嗰樣嘢同你有關係,結果對你有影響;否則睇票數只會淪為垃圾場,大家鬥搞事。盲目求票數,性質同傳媒只追求眼球注意力、like/click/view 數一樣,累鬥累,一同跌進沉淪的國土。講明先,我係有投 Derrick Rose 同 Luka Donicic,純粹係支持前者,感情分搭夠,同埋覺得後者打法幾過癮。兩者係咪去到明星級水平?

唔使講咁遠,今年叱吒,古天樂當選「我最喜愛男歌手」,大大個樣版你睇。古天樂做人甚有義氣,我喺唔少電影工作者口中聽講過佢出錢出力,一個人照起港產片;演戲做影帝就見仁見智。我覺得最遺憾係打得 botox 太多,佢已經唔識笑/笑唔出。

至於唱歌,唔好玩啦,古天樂自我介紹都未必會寫自己係歌手。你玩膠重唱《今期流行》,fine;你咁樣頒個奬畀佢,仲要只係合唱,等同一巴打落去啲有心唱歌、但冇乜觀眾緣嘅歌手度。即係乜?好多人真心寫文,但啲人去哂 like 啲 content farm 抄抄子標題黨嘅文囉。古天樂得,尹光都得 — 尹光喺歌壇嘅貢獻亦肯定畀古天樂多。

玩膠還玩膠,頒奬還頒奬。

無㗎,你個遊戲規則係咁,咁咪古天樂當選「我最喜愛男歌手」。林峯夠係亞太區最受歡迎男歌手啦。一個奬項、一個版匾、一個字頭有冇公信力,係睇有幾多人認同得奬者實至名歸。

唔記得邊個講過(好似係黃偉文),寧願攞唔到奬但好多人替你不值,都唔想攞到奬但啲人覺得你唔值。

明星賽,咪又係一樣。

 

作者 Medium

發表意見