立場新聞 Stand News

Clockenflap 在中環海濱 首日評價:冇西九咁好

2016/11/25 — 23:59

主舞台 Harbourflap 台

主舞台 Harbourflap 台

【文:一先令】

全年最大型嘅本地音樂盛事 Clockenflap (雖然好多人話鬼佬多過華人,所以唔叫本地)今年落戶中環海濱搞,一路玩呢,一路啲 Whatsapp Gp 都有朋友問「今年中環搞正唔正啊?」「聽講爛地喎(下面有圖)」見大家咁有興趣,快快手寫番幾點,評評分。

first of all,唔好以為佔領過中環你好熟嗰頭,唔好以為海富龍和出就冇死錯人,唔好制。香港站出係最近入口嘅。你金鐘出,就行到你扒喺度。

廣告

入到去,見到人龍都唔該你先幫手帶黑卡增值,今年增值地方感覺上少咗。隔離有個merch站,唔好見到增值要排隊,merch冇人排就行過。sorry,no cash,do do do transaction only。

merch 價目表,記得增值先

merch 價目表,記得增值先

廣告

入正題。無錯,今年Clockenflap好多爛地。應該話係碎石地,即係你去行山有時要行嗰種,一粒粒石嘅地。以往大家喺西九嗰面,好多草地比你座啊瞓啊,今年,都有,但少咗好多。石仔地為主,起碼今年嘅大台  Harbourflap Stage 同二號台 FWD Stage —帶,都全部係碎石地,唔好預計可以舒服坐低。

其次喇,因為全個地方比西九嗰面係細咗,平時入場人數較少嘅週五晚,感覺已經好多人。黎緊兩日一定仲逼。去台同台之間,要預多啲時間,Miss 咗你鐘意嘅樂隊嘅開頭就唔好啦。尤其呢,今晚盧凱彤表演完,全世界走去 KEF Stage 嗰程路,好窄好多人。雖然西九嗰幾年,喺台同台之間行走都會逼逼地,都有人行花叢路,但今年會更加。

其實唔洗個頂都得啦

其實唔洗個頂都得啦

條路都窄架

條路都窄架

講起 KEF Stage,都有少少唔高興。個台已經細,今晚 Tfvsjs 表演好多人睇,完全唔夠載,個有頂蓋,又唔知係咪必須架呢?起碼我自己覺得都幾影響觀眾睇Show啊。仲有,兩個大台之間嘅聲都好疊,呢個冇辦法,同埋過往都係咁,唔可以話中環海濱選址造成呢個效果。Sigur Ros 今晚玩靜歌慢歌為主,所以以上情況會明顯。黎緊兩晚壓軸樂隊都會比較upbeat(好似係),唔知會點喇。

另一張 harbourflap 台

另一張 harbourflap 台

草地還是有的

草地還是有的

讚番兩句,今年廁所多過以前,成晚去兩次解手都唔洗排隊(我是男仔),著背心仔嘅職員都友善同熟悉運作。現場仲有好多型男同美女。同埋啲觀眾質素都好高,一般都好合作,又好少人會長期舉機影相。我知道大會係冇得再用西九個場,先會用中環海濱,不過,中環海濱真係會被西九比下去,大會都冇辦法。香港,到底仲有冇其他位,可以搞呢啲大型嘅活動呢?

希望大家黎緊兩日玩得開開心心。聽日見。

碎石地佔大部份

碎石地佔大部份

 

作者簡介:窮撚一條。

(原題為〈【開箱文】Clockenflap @中環海濱:如果真係要比,就冇西九咁好囉囉囉〉)

 

發表意見