立場新聞 Stand News

ifc Dymocks?執咪執囉…做乜 jack

2015/1/12 — 14:29

ifc 嘅 Dymocks 話會喺今個月25號結業。據聞依間舖月租57萬,因為輸俾agnes b. 嘅77萬開價而不得不執笠。

消息一出,好多人又話唔捨得,又控訴地產霸權,又批評港人無文化,又話乜都變晒名店,乜乜乜。夠晒戥 Dymocks 唔忿氣,進而加多句「香港已死」,云云。

老實講,我覺得,執咪執囉,做乜jack。

廣告

喂,依間書店喺 ifc 㗎喎,佢同每月出得多過佢20萬嘅agnes b. fight 喎。在商言商,你無得揀㗎喎。除非你叫香港放棄奉行自由經濟,將 ifc 收歸國有啦。咁你就可以喺 ifc 放幾間書店都得啦,開埋國民教育補習社都仲得。

唔喺,咁咪價高者得囉。

廣告

唔好誤會唔好誤會,我唔係話自由市場大晒,有錢就乜都得。事因我都係睇唔過眼地產商同領匯好多所作所為嘅人。我只係想提醒一句:你知唔知依間 Dymocks 喺邊度先?ifc 喎。香港 CBD 嚟㗎喎,中環價值核心中嘅核心喎,自由市場嘅聖殿喎。你有無必要喺 ifc 開一間書店先?你諗唔諗到 ifc Dymocks serve 乜野客先?當佢地嘅客──果班比得起錢出入 ifc 嘅人──已經用佢地嘅自由經濟選票(錢),投向 agnes b 而放棄 Dymocks,老實講,我依啲窮苦寒酸書蟲,食個劈他望 J (PRÊT A MANGER) 都嫌貴嘅阿伯,何苦同佢地一般見識呢?

退開一步諗啦:你估班中環友想睇某本書,會唔會因為 ifc Dymocks 執笠而買唔到呢?

我寧願關注樓上書店。佢哋夠執得勁啦,仲勁添。就喺上個月,旺角博學軒就執笠啦。其他樓上書店近年都喺愈搬愈細、愈偏僻,但又有幾多人戥佢可惜?關注嘅人數可能只喺 Dymocks 嘅十份一。

第一,樓上書店唔喺同你乜乜乜呃你啤 (agnès b.) 爭喎,甚至唔喺同緊藥房金舖爭喎,佢只喺想喺草根社區一個不為人知嘅樓上角落生存咋喎。咁都唔得喎!最尾都喺要執笠!如果對 Dymocks 執笠感到可惜嘅人真係咁愛書愛文化,咁關注香港閱讀風氣,咁係咪更應該正視旺角嗰邊呢?

Ifc 開唔到書店,好簡單嗟,咪唔好去 ifc 買囉。但當連旺角樓上書店都要執,我地喺咪預左要有日要上天台買書,或者要行上飛鵝山頂呢?(無錢買車)

較之於依啲問題,ifc Dymocks 執笠,算得喺乜呢?你唔由得佢執,又噪乜呢?

計我話,ifc Dymocks 執,點解會咁多人關注?兩點:一係因為佢喺 ifc,二係因為佢係 Dymocks。二合一,一句講晒:品味嘅標誌。我唔係一竹篙打一船人,但係我相信好多人係鐘意嗰一「ifc 執笠啦,sigh」嘅 feel,多過真係關心,書店執笠其實係乜野一回事。

你問我點救書店,好簡單嗟,長遠方案各一:長──推翻香港自由市場經濟;短──買書。唔係去ifc果間買,係去旺角樓上書店買呀。

發表意見