立場新聞 Stand News

ViuTV,點解要遷就林日曦?

2016/5/2 — 23:50

(圖片來源:《跟著矛盾去旅行》網上截圖)

(圖片來源:《跟著矛盾去旅行》網上截圖)

今晚 ViuTV《跟著矛盾去旅行》到萬眾期待的林日曦、蔣元秋去首爾。我買定花生,擔定凳仔,金睛火眼咁睇,結果狂打呵欠,悶到一個點呢。

林日曦是《100毛》主腦,蔣元秋經常講好多無用的說話,兩個人擺在一起,點計都應該充滿火花,花生滿瀉掛?點解最後搞到咁悶?源於出發前林日曦的一個提議:全程不跟蔣元秋直接交流,有咩嘢要講,就由編導出手代勞做翻譯。

廣告

然後,這兩個非常矛盾的人,就在這個setting之下「交鋒」。火花未見,冷場不斷,觀眾多多少少有點失望。起碼我係咁囉。

我不會怪林日曦。早兩日我見他在面書解話,講返點解會參與《矛盾》。佢話,本來知道另一嘉賓是蔣,「一秒拒絕咗」電視台的邀請。直至編導多番游說,他為了「希望更多人會應承參與佢哋啲節目」,便答應,但有一前提:「如果你哋安排一個翻譯畀我,等我全程唔需要同尊貴議員直接溝通,咁我就應承。」

廣告

作為節目嘉賓,出發前你提出什麼要求,都好正常。你話要有裸女同遊,都可以,幾過份都得。個問題係,電視台接不接受啫。

結果,ViuTV 又受了。就如林日曦事前預告:

「如果你哋真係決定星期一、二買定花生睇,就真係地獄喇。好悶㗎。一來大家冇講過嘢,二來我覺得導演同編導等人係畀尊貴議員噴到六神無主,基本上全程冇乜引導去討論過啲比較有益嘅話題,hea下hea下咁,剪得出兩大集嚟計,導演都真係神剪,向佢致敬。」

林提議的這個安排令兩人幾乎沒有什麼交流,更遑論火花或矛盾。

以今晚一集為例,大家各有各影證件相,各有各答問題,然後……各行各路。有無矛盾?無。有無火花?無。有無花生?我手上有一包,食唔落。好唔好睇?非常唔好睇。

身為觀眾,我不是太明白為何 ViuTV 要咁做。你要拍節目,不是想節目好看嗎?當嘉賓提出了這要求,你真係仲覺得個《矛盾》show 可以拍落去?尤其是,假如你真的想突出這兩集節目本來想探討的主題,廢青與尊貴議員,現在做到嗎?既然做不到,為何當初要遷就林日曦?有無其他選擇?諗唔到,我比個提議你,游學修會不會更好?

更大的可能是,因為《100毛》同林日曦都多 fans,有話題。但節目質素呢?究竟 ViuTV 係咪真的想觀眾睇到好睇的節目?還是只求炒炒花生、博博收視?如果是後者,我勸你們早日回頭是岸,因為花生呢,好快炒哂。炒得多都無味啦。

好自為之。

發表意見