立場新聞 Stand News

一天光哂

2016/4/1 — 6:00

好多人以為,特別係華人,以為有一個叻人,有一道奇招板斧,所有問題就能迎刃而解,一天光哂。

又有好多自以為叻過人嘅人,不論華人定西人,以為憑一己之力,有破釜沉舟嘅毅力,有高瞻遠矚嘅能力,就能帶人出紅海,解決所有問題,一天光哂。

幾乎所有生意領導人,起跑線前過人,跑快過人,工時長過人,搏命過人,捽數狠過人,以為有錢使得鬼推磨,就能做長勝將軍,解決所有問題,一天光哂。

廣告

天下間邊有咁多叻人,邊有咁多奇招,我有好大疑問。單人短途賽,或者可能;隊際馬拉松長途賽,根本無可能。

做生意,集體長途賽,跑咁快做乜,鬥隊形,鬥靭力,鬥長命,死唔去,就有機會技術擊倒「散修修」嘅競爭對手,化危為機,就算雪上加霜,歷史新高一樣可能。

廣告

反其道而行,放低身段,各司其職,分工合作,不徐不疾,創意先行,平凡𥚃見真章,一天光哂反而有極大可能。

一字咁淺而有效啲管理方法,你唔信唔做,係都要做英雄,我都無你辦法。其實,越多人唔信唔做,突圍而出𡁻低對手,更加可能。

 

作者 facebook

發表意見