立場新聞 Stand News

一隻你值得考慮持有的股票

2016/10/23 — 15:40

中銀航空租賃公司網站

中銀航空租賃公司網站

Loser唔多講股票,事關有名俾你叫,自己炒股多年輸多贏少,怕累人輸錢。之不過時有啲心水都會跟大家分享,今次同大家介紹隻中銀航空租賃(2588),今年中以42蚊上市,上周五收42.45元。你會問,航空業好咩,國泰(0293)份業績差到貼地喎。

大家有所不知,航空租賃跟經營航空公司係兩門生意,航空租賃簡單講係租飛機,即係好似你買層樓租俾人,每年就係收租金,只要不斷有需求,你就有租收。今天亞洲國家日漸發達,單就中國人外遊就以幾何級數上升,未來出外坐飛機愈嚟愈普及,市場對飛機需求不斷增長,於是乎飛機租賃特別好生意。

超人純官都搞呢門生意

廣告

呢門生意唔使好似航空公司咁,要俾油價拖後腿,因為佢只係提供飛機就得,油嘅嘢就交返俾航空公司自己諗喇。所以你睇李嘉誠都買咗幾十架飛機,鄭家純間新創建(0659)亦買咗幾十部,就知呢們生意有得做。

好喇,行業有得做,都要睇睇公司好唔好。中銀航空租賃係亞洲最大飛機租賃公司,亦係全球第五大,即係話佢喺亞洲係龍頭,食正亞洲經濟上升個浪。公司機隊有483架飛機(當中218在訂購),出租率係百分之一百,若然以租樓術語講,即係冇空置率。

廣告

佢持有啲飛機全部係靚嘢,機齡平均只係三年,十分之新淨,大家有所不知,飛機失事最大原因,十之八九係機齡老化,中銀航空機隊咁新,租值相當高,出事機會亦十分低。

中銀係大靠山

公司公布嘅中期業績,盈利上升兩成有多,兼夾有息派,財政狀況十分健康,業務及財務上都理想,𠲖家市盈率都係8.7倍(按中期業績年度化),可以講抵買,佢最唔好係新上市,大家要睇定啲,但可以講,若佢公布多兩份靚靚業績,個價就唔止係現時咁。

仲有,佢阿媽係中國銀行,要借錢買飛機,可以攞到比別人平嘅利息,而最重要嘅係中國銀行做大靠山,執笠機會十分十分低,揸得安心,所以都唔怕披露,自己喺40-42蚊都吸咗一啲股票。當然,好公司未必係好股,最終股價係點,Loser都冇保證架。

發表意見