立場新聞 Stand News

一隻你千萬別持有的強積金

2016/9/4 — 10:43

最近因為太得閒,於是睇睇自己啲強積金(MPF)表現,竟然嚇了一大跳。對於MPF,一來每月供款唔算多,二來係好多年後先攞得返,好多人都愛理不理。

點知你唔理喇,十多年後發覺辛辛苦苦筆血汗供款,回報遠遠落後於恒指,雖然錢唔多,但諗到你每月仲要俾唔平嘅基金管理費,你話幾氣頂。

邊間MPF公司?我都唔怕開名講,咪就係獅子銀行囉!滙豐MPF嘅表現差已經素有聽聞,但估唔到其中有隻基金係廢中之廢,呢隻就係匯豐恒指基金。

廣告

永遠跑輸恒指

本來買得恒指基金已經冇乜期望,但求穩穩陣陣,馬馬虎虎過得去就算,勢估唔到恒指基金會跑輸恒指,回報仲要係輸好多。睇睇匯豐恒指基金今年上半年回報,係虧損3.04%,同期恒指只係跌2.57%。再睇睇2015年表現,基金跌咗4.73%,同期恒指只係跌4.06%。

廣告

跌嘅時候差少少,我哋不妨睇睇升時又點,2014年基金錄得回報4.17%,但同年恒指回報係5.3%,睇埋2013及2012,基金回報分別係5.51%同25.55%,期間恒指回報係6.36%及27.22%。簡單講,大市升時佢升少過恒指,但大市跌時佢就跌凸。

基金係睇長線,一次半次失手唔應該太介懷。於是睇睇累積回報,5年回報係5.91%,但恒指回報係10.89%,再睇10年,基金回報55.52%,同期恒指回報係78.22%。吓!回報道竟然可以相差咁遠,恒指高出匯豐恒指基金係整整4成。

基金賺少廿幾萬

好喇,買MPF要幾十年後先攞得返,我吔再俾機會佢,睇睇由佢2000年成立至今情況又點,當你一睇,累積回報係91.6%,都算唔錯丫;但再睇睇恒指表現,係144.13%,即係話嚴重跑輸恒指。

睇完成堆數字,可能你會好亂,但Loser簡單咁講,匯豐恒指基金係從來未跑贏過大市,年年跑輸不特矣,仲要係嚴重跑輸嗰隻。如果你由成立到今天累計投入50萬,你嘅回報係45.5萬,但恒指嘅回報係72萬,換言之平白少賺咗26.5萬。

點解恒指基金都會跑輸恒指,可能匯豐會解釋係因為要收管理費,所以埋單計數咪差過恒指。若然係咁,匯豐強積金唔應該提供恒指基金,事關你唔可以跟恒指同步,市民倒不如買盈富基金,使乜俾咁多管理費養你班咁高人工嘅基金經理。

發表意見