立場新聞 Stand News

啤雄

2016/4/13 — 15:36

時勢造英雄,這幾天在創業版誕生的英雄,數埋數埋,最少兩三個,而最年輕那位只有三十三歲。

一登 GEM board 這個龍門,這位英雄頓時升價十倍,首日掛牌後收市計,他的賬面身家是港幣十六億。

想尖叫。

廣告

我比這位英雄年輕五年,唔知醜講句,也勉強算是個企業家。但問自己,五年後有冇可能也在賬面錄得十六億?

午飯時間前,問會計同事攞公司盤數睇吓,輕嘆一聲:十六億?Yen 都未必得。

廣告

好在,雖然我的賺錢技倆未必很強,但自我安慰能力倒是讓自己挺驕傲的。嘗試盡量說服自己,這些創業版的神話,全部也是「啤」出來的。已經不知有多少做 corp fi 的朋友說過,香港的金融市場已經變成一個啤殼天堂。

起初不明白,什麼叫啤殼?

Corp Fi 朋友詳細解釋。

Samuel,即係咁,就當你而家搞個英國升學網站,專介紹英國中小學資料,你個 website 會點賺錢?

賣廣告囉。

Exactly,咁但係你有冇方法保證你每個月都有一百萬廣告收入?

有就發咗啦。

Exactly,但如果有十間公司,每個月輪流喺你個 website 落廣告,而 somehow,你收咗嘅廣告費,又會有辦法係可以畀返呢十間公司,然後下個月,the story repeats,佢哋又落廣告,跟住你又暗地裏畀返錢佢哋,咁你又點睇呢?

我蠢,所以我的回答是:「賺咗啲廣告費又畀返佢哋,咁咪即係冇賺過?」

Wrong,係有賺過,不過唔係實際上賺咗,係賬面上賺咗。賬面有數,就有 valuation,有 valuation,到時你想點上市都得。

明白,心寒。

心寒的原因是,啤殼人或養殼人不是有部印鈔機印銀紙的,亦即是說,他們的錢是贏回來的。既然有人贏,就一定有人輸。邊個輸?就是被你這個啤殼神話騙到的股民。

有些人會厚著臉皮說,啤殼咪啤殼囉,做得乾淨,都唔算係犯法喎。Alright,就當你唔係犯法,但有些事,不該做就是不該做,不想做就是不想做。正如在澳門經營賭場也不是犯法的,但為什麼李嘉誠從不沾手賭業?因為可能他覺得,賺到盡還賺到盡,有些生意他就是不想碰。

每個人都有自己的原則和底線。我稀罕十六億嗎?真心話,稀罕到流乾口水。但也是真心話,我的原則貴過十六億。

作者facebook專頁

發表意見