立場新聞 Stand News

大陸財團盲搶地 海航隨時「瀨嘢」

2016/11/4 — 15:14

背景圖片:啟德發展區(無綫新聞片段截圖)

背景圖片:啟德發展區(無綫新聞片段截圖)

大陸佬搶貴香港地又一傑作,啟德第1K區塊地以88.37億賣出,每呎樓面地價1.35萬,比起市場預期高出接近一倍。早前中國海外(0688)新盤啟德I號首批單位平均呎價都係1.44萬,即係話麵粉幾乎貴過麵包價,簡直匪夷所思。

今次盲搶地間大陸公司係海航集團旗下的海航實業,集團喺香港最教人熟識係持有香港航空同廉航香港快運。海航集團近年四出收購,呢幾年喺海外高價買咗幾千億嘢,整個集團債務不輕,不斷利用財技集資,有啲似係建喺浮沙上嘅王國。

難道十九個地產財團都睇錯?

廣告

海航回應媒體查詢時話,相當看好香港地產前景。但大家諗諗,若然加埋建築及財務成本,按兩成利潤計,未來落成要賣每呎2.5萬,與現時同區樓價比,你相唔相信3年後樓價會升超過五成?

今次有二十個財團競投,即係話其餘19個地產大佬都唔相信可以做到呢個價,唔通人人睇錯唯獨你海航咁有眼光?唔好忘記,財團當中包括香港幾家超大型發展商外,大陸最大嗰幾家開發商包括萬科、恒大、萬達、中國海外同華潤置地都有參與,聽聞好多開價每呎樓面地價喺1萬以內,佢哋喺香港或內地打滾咁多年,難道都係盲嘅唔識計數咩?

廣告

海航英國買樓即蝕大錢

海航喺地產市場眼光好唔好真係唔敢講,但集團旗下喺香港上市間海航國際(0521),今年4月以1.3億英磅喺英國金絲雀碼頭買咗幢瑞信大廈,當時講到自己幾咁有眼光,又話倫敦係歐洲商業核心,甲級商廈前景無可限量,兼夾有4.8厘回報,冇得輸,點知買咗冇耐英國脫歐,成個倫敦樓市前景即時逆轉,最慘係英鎊喺幾個月跌咗成幾,即係短時間冇咗兩億港紙,3年租金回報付諸流水。

好喇,大陸首富王健林,貴為地產界超級大佬,按理都好有眼光,但大家睇睇,佢間萬達酒店(0169)早前買咗間西班牙酒店,近日賣出,輸咗成億,你就知大陸人呢幾年喺內地做地產咁掂,純係機緣巧合,適逢中國經濟起飛,09年中國政府又喺市場注入4萬萬億資金,令中國樓市爆升,呢班大陸佬贏咗大錢,以為自己真係好天下無敵,怕且佢哋啲海外收購遲早做寃大頭。

海航高價搶地幫其它區內發展商抬橋,佢哋啲項目即時水漲船高,但海航塊地幾年後先落成,未來息口環境同香港與大陸經濟係點大家唔知點,但Loser敢講,海航呢舖好大機會「瀨嘢」。

發表意見