立場新聞 Stand News

專家可以恐怖過恐怖份子!

2019/1/28 — 15:45

資料圖片,來源:Aziz Acharki @Unsplash

資料圖片,來源:Aziz Acharki @Unsplash

LIBOR(倫敦銀行同業拆進利率)是影響全球 370 萬億美元金融合約的利率基準。好似空氣咁,無咗佢真係瓜得!問題係平時唔會有人覺得空氣重要,就算專家同你講就快無空氣,你只會當佢對住空氣講嘢!同理,LIBOR reform 其實好大鑊,但完全得不到應有的關注。

簡單介紹,英國監管機構九月已發信給主要銀行及保險公司,要佢哋採取適當行動,在 2021 年底時要由 LIBOR 過度到其他利率基準。一般人無興趣理,諗住監管機構同銀行咁專業,仲有成三年時間慢慢處理,梗無問題。但我堅信,如果 2021 年底 LIBOR 真係無咗,後果會比 2008 年環球金融風暴更恐怖。但英美專家似乎真係想消滅 LIBOR,所以我覺得專家有時真係恐怖過恐怖份子!

由於 LIBOR reform 太技術性,我選擇講隻故仔,試圖讓讀者感受一下 LIBOR reform 係乜東東。純屬主觀描述,但已盡力貼切。如果要 map 番件事:「空氣」指 LIBOR、「安全氣體」(安氣)指 Secured Overnight Financing Rate、「科學家」是金融機構/組織、「專家小組」我唔好意思開名、「拉波星人」是市民大眾。

廣告

「拉波星」空氣污染事件

「拉波星」的空氣受污染,鷹、尾兩大國領導其他國家成立專家小組,研究如何化解災難。專家小組認為受污染的空氣會損害健康,不能用。他們發明了一種新的安全氣體(安氣),聲稱能代替空氣,讓拉波星人健康呼吸。其他科學家非常擔心:安氣怎可能代替空氣?就算可以,又怎可能有足夠安氣讓拉波星人使用?

廣告

科學家的疑慮有理:安氣嘅含氧量比空氣少好多,要吸得好急速,而且安氣要透過好多拉波星人使用才能不斷循環製造。問題是拉波星人仍在呼吸空氣,又唔知安氣係乜,只知要吸得好急,所以唔肯改吸安氣,而無人肯用就唔會有足夠嘅安氣。咁點算?專家小組似乎狗急跳牆,發出嚴厲警告,話空氣好快會在星球上消失(但除了被專家小組消滅之外,空氣根本無理由會消失)。專家小組要求所有科學家制定應變措施,即使三年後空氣絕跡都可以順利過渡!專家嘅蠱惑邏輯是:科學家要用三年時間逼令所有拉波星人轉用安氣,唔准用空氣,到時自然無問題!

科學家驚到震,心諗專家小組可能癲咗:點逼拉波星人轉用安氣?點可能停用空氣?到時無足夠安氣就闔家安好?又或者到時發現安氣原來唔 work,都係闔家安好?科學家哀求專家小組:「空氣污染雖然嚴重,對健康唔好,但唔死得人,繼續用多陣得唔得?」點知專家小組鬧爆,堅持空氣會消失,鬧科學家太依賴空氣、太無道德、太無危機感。科學家啞子食黃蓮,因為過往幾年已經有好多科學家被裁定污染空氣,被罰了很多錢,所以佢哋唔敢咁多嗲。

點解拉波星人唔出來反抗?拉波星人每一秒都在呼吸空氣,知道有污染,但唔認為有問題。而專家小組和科學家都將個問題講到超複雜,根本無人有興趣了解,唯有當無聽過,但叫佢哋轉用安氣就睬你都傻。

隻故仔去到呢度,如果專家小組得個樣,三年又三年,專家小組繼續扮改良安氣、科學家繼續扮準備應變、拉波星人就繼續呼吸空氣,呢套係浪費時間和金錢嘅笑片。但如果專家小組堅有料,變態到 2021 年消滅 LIBOR 空氣,咁就一定係災難片!

 

原刊於貼地風管 Facebook

發表意見