立場新聞 Stand News

弱智投資大觀園-師奶炒股錄(上)

2015/9/11 — 20:55

網絡圖片

網絡圖片

主修經濟、金融或者BBA嘅人,十居其九有同一煩惱。

每逢見到親戚朋友,三句唔埋,佢哋就會問:

「買邊隻股票好?」

廣告

───

大半年前,阿媽嘅朋友陳生嫁女,叫埋我去飲。

廣告

陳生喺旺角街市附近開報紙檔,以前同阿媽去嗰頭買餸,最中意去陳生檔口狂睇公仔書。當年嘅香港仲有好多日資百貨公司,喺尖沙咀新世界中心地牢嘅東急百貨,我放暑假日日都去睇公仔書、特攝書。即使到咗今時今日,我仍覺得喺崇光頂樓間日本旭光書店做,係一份dream job,仲dream過做記者。

陳生有兩個女,大女阿霞細我一年,細女阿玲……我都唔知年紀幾大,但應該大唔過我。去陳生報紙檔嗰陣,會見到阿霞同阿玲幫手睇檔。我嗰陣沉迷於漫畫堆中,乜嘢《龍珠》、《星矢》、《三眼之迷》,全部係喺陳生個報紙檔睇嘅。因為掛住睇書,完全無理會到佢哋兩姊妹。當年出老翻《龍珠》嘅雅景出版社,有錢到可以喺電視台嘅劇集賣植入式廣告。因為掛住睇漫畫,我無show到佢兩姊妹(又重複)。

自從上咗中學,我就無陪阿媽去街市,亦無再聯絡過陳生阿兩姊妹。對上一次見佢兩姊妹,已經廿年前,喺街見到都1000%唔認得。不過,阿媽仲有去街市、周不時見到陳生,從我不時會從阿媽嘅口中聽到阿霞阿玲嘅近況,我估陳生都喺我阿媽口中知道唔少史兄嘅嘢。

───

廢話少講,陳生請飲,去到婚宴。阿霞早七八年嫁咗、仔都三四歲,今次陳生請飲係細女阿玲嫁人。

見到新娘阿玲。佢見到我嚇一跳,就大叫:「你係阿史?乜你而家咁靚仔?嗰陣點解我無迫你同我一齊?」

後面嗰兩句梗係我想像出嚟。阿玲幾靚,細細粒,身材似乎幾好,有少少似大埔Lu Lu,不過唔係我中意嗰類型。我硬係覺得身高五呎差一吋嘅女仔,不幸地做咗我女朋友,個頭會成日畀我用咗嚟lon手。食煙嗰陣,隻手就放喺佢個頭度,膊頭順便放個煙灰盎用嚟放煙灰。哈哈哈哈哈哈。

無幾耐,家姐阿霞出現。嘩,一睇:阿霞細我一年,但望落去已經成為一個非常稱職嘅師奶:唔高、中等身材,略肥,條腰唔見咗,戴住副好老土眼鏡。皮膚粗糙、又黑又黃,阿霞十足十一楝日久失修、殘破不堪、甩皮甩骨、準備畀玄牛放火嘅旺角唐樓咁。

阿霞一坐低,當然學佢個妹咁重複「你係阿史?乜你而家咁靚仔?嗰陣點解我無迫你同我一齊?」呢幾句。

「係呀,我都唔想生得咁靚仔。」

大家吹咗兩句水就開席。成場婚宴,我只係同阿霞阿玲講咗幾句嘢,影咗張相,就走人。至於張相,我無諗過有得拎返。挑!佢叫你「影」相渣嘛,無話會畀返張相你,正如政府嘅「問」責制,同「負」責制係唔同,你可以問責但無人要負責,所以咁耐都冇人負過任何責。下一次張相重見天日,我諗喺萬一阿玲離婚嗰陣執嘢見一見到。

───

婚宴後星期一。

下午三點幾,阿媽打畀我。

「陳生嗰女阿霞想拎你電話。」

「吓,阿霞?喂,人妻、人母我唔啱嫁喎。」

「神經病呀你?人哋阿霞咁叻,連女都生埋。」阿媽會以「結婚」、「生仔」嚟量度一個人嘅成就,兼不斷畀說話你聽。

「我知呀,所以我咪話人妻、人母我唔啱嫁囉。」

阿媽唔耐煩:「咁點呀?畀唔畀?你唔好亂講埋啲無謂嘢。」阿媽!我先係你個仔呀!!

「得啦,畀啦畀啦,畀埋我條命佢。」

───

三分鐘後,電話響。

「阿史,我係阿霞呀。死咧,我上星期五聽朋友講,買咗12345呢隻股票,點算好?死咧。」阿霞聲線顫抖,講嘢非常快,顯示佢出擔心同焦慮。

一聽12345,五個號碼,我就知呢鑊仆硬街。喺港交所交易嘅證券,一般公司股票,最多都只係四位數字(例如最憎大家憎嘅李嘉誠旗下嘅港燈,股票編號係2638、創業版嘅編號係8xxx)。只有衍生工具-窩輪、牛熊證-先係五個號碼。

枱頭無bloomberg,於是去咗www.etnet.com.hk睇。(不收費植入式廣告)

仆街,呢隻係銀河娛樂(27)嘅call輪。當時只係開咗市10分鐘,呢隻12345銀河娛樂嘅表現係:

-25%

無錯,呢隻嘢跌咗25%。即係你尋日用買$10,000嘢,而家得返$7,500。上年年頭,雜總上台,全力打貪,高官唔可以咁輕易去澳門賭錢同洗錢(呢個洗錢唔係買嘢食飯行街睇戲嗰隻洗錢),於是啲賭業股一洩如注,江河日下。

銀河娛樂嘅高位係$83.35,喺舊年1月下旬出現…..亦即阿霞就打畀我嗰幾日。

───

我已經慣咗呢啲情況,大概知佢想點、會問乜。喺佢問我之前,我要先下手為強,解決三大fact-checking:

【點解佢會買呢隻股票】

「你……點解走去買呢啲嘢呀,窩輪呀、牛熊證嘅嘢唔啱你玩。」其實我預知佢會答乜。

「我鬼識乜嘢輪呀、證咩,我朋友話呢隻嘢會升呀嘛。」阿霞答。

「哼,你知唔知你買咗乜嘢?」我冷笑一聲。

「我一個師奶,鬼識咩……唔知呀……朋友話呢隻嘢會升呀嘛。」阿霞又再無意識咁重複。

「你買咗窩輪喎,師奶!點解真金白銀買咗嘢,你好似可以咁抽離咁?你畀錢買嘢,乜可以唔知自己買乜?」。

「哎呀,朋友話升,我咪買囉,我唔識乜嘢撚呀、證呀,而家點算?」連粗口都講埋,佢應該都堅係心慌意亂。我想講「屌你老母你去問你朋友咪得」,但諗起阿霞個老竇陳生,成日留啲百佳印花啊、乜嘢coupon呀畀我阿媽換煲換盛,又諗起細個睇佢唔少龍珠星矢,所以我收埋咗呢句。

阿霞個朋友,真係好朋友嚟。情形同戴志偉話足球係佢好朋友,但不斷用腳踢鳩個朋友,踢足90分鐘、踢咗廿幾年一樣。

好咧。知道咗佢純粹係聽朋友老點買股票,自己做建議嗰陣可以懶少少,唔怕畀佢反問啲公司票績、前景嘅嘢。你老味你知唔知本港嘅上市公司有千鳩幾間?邊有可能記得晒佢哋啲嘢。淨係記到個名都當你贏啦。


【幾錢買入】

「你幾錢入?」

「$0.79」

我幾乎喺聽筒另一邊暗叫:「唔撚係呀嘛?」

因為隻嘢得返$0.4,即係佢已經無輸咗一半錢……再睇隻輪嘅「52周新高」:

「$0.79」

Bingo,無錯,阿霞就係喺呢隻股票嘅歷史高位買入。即係如果有人為呢隻輪寫一本傳記,阿霞就會記錄為「以人類史上最高價錢買入此證券嘅人:阿霞」。

今日再輸25%,累計已經無左近一半……我同你講,數學乘數最有趣係,你有$1,輸咗9成,得返$0.1;喺$0.1嘅情況下,你仍然可以再輸9成……變成$0.01……再可以繼續輸多一次9成,變成$0.001,如此類推,去到天荒地老都唔會變零。

即係話:任何時候,你買股票都可以輸9成錢。

【買咗幾多錢】

「你買咗幾多?多過五萬,少過五萬,港幣。」大部份人對於自己有幾多身家,都諱莫如深。五萬以上就大鑊啲,五萬以下我會叫佢算鳩數。你有留意,人哋嚟問我嘢,我多數叫人「算鳩數」。

「多過。遠多過。六位數字。」

佢對住一個完全唔熟嘅人,居然唔介意講佢買咗好多錢,我知佢已經跌入咗個panic state、shock mode,好驚好緊張。

大撚鑊了。幾多錢買,再搭買咗幾多,可以估到佢輸咗幾多錢。是但一樣唔多,即係佢輸好少錢,叫佢斬纜容易啲;但高位買入、又買得多,咁就大鑊啲。講建議要好小心。

我細細聲自言自語:「我等錢洗,不如你過住十皮嘢畀我。」

「下你講乜嘢話?我買咗唔止十皮呀!」

我諗如果有朋友叫你買十萬蚊西瓜,話聽日西瓜會升值,你睬鳩佢有味;但佢叫買十萬蚊窩輪,你唔單止唔會屌柒佢,會諗一諗之餘,好大機會會畀十皮嘢出嚟買窩輪。

「咁你朋友有冇買?」我忍唔住問。

「有啊。佢買咗仲多,佢已經喺$0.6嗰陣溝咗貨。」

我心諗,佢朋友算係咁,無淨係叫佢買。不過,我想講股票喺本質上同女係唔同:

『你老味,股票唔係女呀-
女,可以亂溝;
股票,唔可以亂溝。』

呢幾句嘢,係我大學同學兼好朋友卡爾嘅名句嚟(係,即係婚姻這種邪教裏面個火爆卡爾)。

結果呢,卡爾真係亂咁溝女。

至於阿霞嘅故事,擇日再講埋佢,下回再續。

───

<廣告:史兄 x HKTVmall文妓合作計劃>

如果你想去HKTVmall買嘢,可以用呢個code,有$50折扣:

ARRELGI (全部大楷)

參加完可以玩大抽奬,詳情請看:http://on.fb.me/1VRvzYH

 

發表意見