立場新聞 Stand News

弱智投資大觀園 - 師奶炒股錄(下)

2015/10/9 — 19:09

上回提要:師奶炒燶股,求救於史。(上回二千八百字,用九個字就總結到,證明我真係好多廢話)

炒輪、投資嘅錢已經輸咗一半,師奶仔聽人講亂撚去買股。佢坐多一日貨,就擔心多一日。

結論:唔可以坐落去,壯士斷臂,要即走。

───

我望一望錶。3:49,距離收市仲有11分鐘。

廣告

「仲有十分鐘,你打去經紀度沽撚咗佢啦。」呢個時候我開咗自己嘅股票戶口。沽,即係賣。

「下?我輸咗一半錢喎。」

廣告

「唔走你連淨低嗰一半都冇埋。」

「er……」

「幾皮嘢當買個教訓啦。」

「唉,好啦。」

阿霞就收咗線。喺叫佢沽貨嘅同時,我登入咗自己嘅股票戶口,睇住輪12345嘅買盤同賣盤。In case你唔知,你可以喺網上或者一啲股票機,睇到每隻股票嘅賣方同買方,用乜嘢價錢排隊想買幾多股票。

我望住兩條隊個庄都幾仆街,買賣差價好闊(你可以想像為找換店買入同賣出外幣嘅價位差好遠)。由收線3:50到4:00收市,買賣雙方嘅盤無郁過,亦無成交;即係話,阿霞無賣到。

其實我並唔驚訝:

第一,當你輸咗一半錢,一日未賣,都只係帳面輸,未realized;你一放,就即刻realize,服仇無望。呢點唔係無道理,即係……你覺得即使女友劈腿同其他人上埋床,只要一日唔正式分手,你哋都仍然係一齊、仲有機會令佢回心轉意。

第二,你輸咗一半,心態上已經麻目咗。你會覺得無埋嗰一半都冇所謂。呢個心態都啱……直到你真係輸埋嗰一半。

第三,你可以聽你朋友一句意見,用幾十萬買股票,你已經無乜理智同智商可言,所以你嘅行為並唔係用常理可以推測。

第四,好多時啲人問你意見,只係想你講啲佢啱聽、佢想聽嘅嘢。你講啱心水,佢哋就會話「我都覺得係咁」,然後去做(仆咗街就賴你);你講嘅嘢唔啱心水,佢哋自動會過濾咗,聾撚咗咁,當無呢回事。呢點同女友、大腦細、執行倒屎,一鳩樣。

最後嗰點最重要。已經分別有心理學、認知科學、經濟學研究指,人類選取資訊時,有偏聽嘅傾向-即係只要聽取一啲啱自己取向嘅嘢,而呢啲資訊會加強咗佢哋呢啲取向,相輔相乘。所以,唔係蘋果日報令讀者親泛民,而係親泛民嘅人先會揀蘋果,而蘋果嘅資訊又會令佢哋親泛民嘅傾向更加堅定。

周而復始,萬丈更新。

即係乜嘢?如果你係一個經紀,要搵大錢,你要嘅並唔係必中嘅投資錦囊、無敵嘅技術分析,而係要識睇個客眉頭眼額,知道個客想點。佢想沽,你咪建議佢賣;你想入,你咪慫恿佢買。反正佢有95%唔記得你畀過建議(遑論記得你嘅建議),所以,好似AV女郎咁,都要隆胸嚟迎合觀眾嘅口味,你迎合到啲客,咪搵到錢囉。

言歸正轉,儘管我有建議,但阿霞喺骨子裏根本唔想賣。既然畀咗意見,佢唔賣,硬係要攬住隻股票沉船,我都無計。惟有心裏面希望佢蝕鑊甘,蝕到仆街。

[font 1000]我講真嘅。我真係好希望阿霞蝕鑊甘,最好佢連乜嘢時間值都唔識,一味長渣,渣到最後一個仙都冇,輸撚晒,回報率-100%。唯有係咁,佢下次先唔會咁輕易聽個朋友講三兩句就拎十幾廿萬、甚至乎一百幾十萬去買一隻佢完全唔知係乜嘅投資工具。[font 1000]

蝕一次十萬八萬,可能幫你慳咗之後幾百萬,呢個投資抵到爛。所謂嘅Beginners’ luck,就係因為第一次贏錢,之後輸凸畀賭場;如果第一次入賭場就輸錢,咁呢個痛苦嘅第一次就會令你以後都唔賭,一件好事嚟。正如我當年無喺大學時候爭過四萬咭數,畢業後爭嘅可能係四十萬、甚至乎四百萬。

不過,以上嘅嘢係建基於一個好重要嘅前設:

人類係會從錯誤中學習。

我從來無喺錯誤中學習到:其實,人類從來唔會喺錯誤中學習。呢幾句嘢,係咪好有哲學性?明唔明?

───

收咗市。

排除咗阿霞係想約我打友誼波,我深信阿霞只係要一個人同佢講嘢,根本無重視我嘅意見,因此我都冇將佢同佢啲股票放喺心上。賺同蝕,我都冇份,再者,呢啲咁嘅電話同咨詢,閒閒地一年三五十個。佢主動嚟搵我,我咪幫下佢;佢唔嚟,我主動摟屌咩。講咗「人妻、人母我唔啱嫁喎」!

隔咗一星期,無端端收到一個whatsapp。呢個電話冇喺電話簿。

「點解銀河娛樂係咁跌?我隻輪得返$0.25,點算?」

我諗咗諗,

嘩,原來係阿霞。

乜.原.來.佢.仲.未.賣.隻.輪?輸時間值都輸死。

為咗你緊記「一串光陰一串金」呢個道理,窩輪有所謂時間值。最簡單講,即使正股嘅股價唔郁、我對林嘉欣嘅愛一樣、阿霞嘅戇鳩值不變,窩輪嘅市場價值都會隨時間而慢慢下降。呢點同女人嘅青春一樣,價值隨時間一點一滴咁流失,時間越耐,越唔值錢。詳情請參照赤大Bachelor of Accounting and Finance 3001 How-to-lose-money-as-quickly-as-possible 課堂的第二份powerpoint.

唉,開返隻12345嚟睇。上次之後反彈過幾日,但之後大市又開始跌,銀河都跟住江河日下。

「隻嘢嗰日上返$0.5,你冇走到?」

「無呀,我諗住再上多少少、蝕少啲呀嘛。」

「有傳銀河嘅業績好差,而家畀基金佬借勢狂質,好麻煩喎。」

「哎呀,咁點算呀?」

仆街,上次叫你走都仲有$0.4,而家得返$0.25,而家問我點算?

「你叫你個經紀幫你做止蝕,$0.2好走晒佢,

你以後唔好再買呢啲嘢啦。」

「ok!」阿霞係訊息發咗一個“ok”手勢嘅emoji。

隔咗陣,我電話又震。

「其實,我仲有好多股仔未返家鄉呀!乜嘢3988、342、631、276,坐晒艇呀!點算?」

好幾年冇認真掂股票,好多號碼都唔記得。3988係中國銀行,市值三千幾億,並唔係股仔;342同631都唔識……276……呢組數字好熟……

276?
276?
276?

呢隻咪係傳說中嘅妖股「蒙撚能源」?關於呢隻蒙撚能源,我都唔知由邊度講起。http://zh.wikipedia.org/…/%E8%92%99%E5%8F%A4%E8%83%BD%E6%BA…

「唉,你啲股票我唔係好識,不過有反彈好走咧。」

「隻3988我坐咗幾年咧。」

「講多次,銀河就嚟出業績,你自己睇路咧。」

「下?乜就嚟出業績咩?好差?唔好嚇我呀!」又附送兩個驚嚇嘅emoji icon。

大佬,我再早前幾個訊息咪講咗銀河出業績囉!電訊盈科,咪話撚咗你知。https://www.youtube.com/watch?v=-sv6XvoDlPw

「係呀,出業績。」我嗰陣好忙,唔得閒回佢。

───

隔兩個鐘再睇,佢已經連珠爆發。

「咁隻輪我排$0.24走咗佢。」但我明明叫佢$0.2止蝕,即係跌到落$0.2就會賣咗佢。

「$0.24走唔到,排咗$0.22。」

「嘩,我一路排佢一路跌,而家得返$0.21。」

「呀~~得返$0.20……$0.197……$0.195」

「$0.195都走唔到,點算呀?????」

「$0.175沽晒。」

到我晚睇,先知佢$0.175走晒。比起佢購入嘅價錢$0.79,足足輸咗接近80%。若果佢買10萬,得返2萬,都算輸淨條底衭。

無錯,幾星期無咗$80,000,就係因為你一個朋友,或者一個會賺你佣嘅經紀,叫你買一隻股票。係咪好容易、好過癮呢?又有啲人好中意睇報紙專欄,睇完人講個市嘅升跌、拎冧把買股票,買完又嚟問我,「呢隻股票好唔好」。

「挑!寫專欄條友同你好熟咩?」

唔撚係呀?我知道大市升,唔自己買撚晒,話你知等你去買?

順帶一提,呢啲事每日喺經紀行發生緊,仲可能喺你老竇老母、阿婆阿爺身上發生。

萬世輪迴,千秋不滅。

───

又過咗幾個月。當我已經淡忘咗阿霞同佢嘅英勇事蹟,某日又收到佢嘅whatsapp。

「我買咗天工國際,但係佢做假數,今日跌到停牌,點好?」再次附加幾個好驚嘅emoji公仔。

縱橫股市十幾年,阿霞令我真心感到好恐怖、好驚。恐怖嘅地方有三個:

第一,佢居然仲敢買股票;

第二,佢居然買中一隻被人發現做假數嘅股票;

第三,佢居然會以為隻股票跌到停牌。

留意,香港嘅股市係無跌或者升到某一個幅度就要停牌呢回事,只有大陸先有漲停/跌停(上下波幅10%);美國道指期貨,喺海融嗰陣都因為pre-trading跌得太勁而停止交易。股票價格同升跌,只係反映市場嘅供求,如果你加漲停/跌停,會削弱市場價格傳遞訊息嘅功能。如果你覺得有人造市、造謠、或者啲high frequency/auto trading有機會出錯令股價大起大跌,你係應該去打擊呢啲敗類或者加強對呢啲行為嘅監管,而唔係戇鳩地禁止股價上落。

只有弱智如港交所,先會認為港股加入漲跌停板機制,有助防止港股A股化;相反,引入漲跌停板機制,先會削弱市場嘅效率,令港股A股化。最撚好笑係蘋果日報,將呢個建議放喺A1,全部內容都係支持,笑到我仆街。師兄,壹傳媒公司門口仲有個佛利民像嫁。佢老人家泉下有知,得知香港呢個資本主義最後嘅堡壘,佢個股市居然搞呢啲價格管制,真係掉筆三嘆。(http://hk.apple.nextmedia.com/news/index/20150704/)

公司上市要符合某啲法例同要求、經紀要考牌,而一般散戶乜春都唔識都可以買股票,同樣不負責任。有呢啲不負責任嘅無知人士,先造就咗各式各樣嘅投資陷阱。畀幾十萬出嚟,完全唔知自己買咗乜,以為啲錢好易賺。

今次,阿霞居然以為隻股票係跌得太多而跌停牌,我終於忍唔住講:

「買乜燈乜,你唔好再買股票咧。真係,求神拜佛,唔好再買票股咧。」

「哎呀,點算?」

「你幾多錢買……」又係一樣嘅對白。突然間覺得自己好似妓女,每個客嚟,每次都係同樣招式應付,毫無感情,只得個軀殼喺度甩下甩下。

「你記住我講乜啦,唔好再買股票咧。」

「係啦,次次都係咁。使唔使止蝕?」阿霞臨尾都要拎個尾彩。

「反彈少少好沽咧。」

最後呢句,真係求其亂吹,打字嗰陣自己都笑咗。因為而家隻嘢停咗牌,即係無得交易呀!!!咁反彈乜春呀?你估以前抽蛋機嗰啲$1彈彈波,會彈呀?

「好。」

我真係唔知佢好乜嘢,果然妙問妙答。不過,由佢無問我彈到幾多先好沽,我應該講中咗佢心事,似乎係想升少少就走。

隔幾日後天工復牌,抽升兩成。我估阿霞應該執咗少少。因為……

───

又過咗半年。

無錯,阿霞又出現。阿霞嘅股市明燈,又再照亮整個港交所交易場。

「我想問下隻雷士照明(2222),停咗牌咁耐,最耐可以停幾耐?」whatsapp彈個訊息出嚟。

呢個問題,同上次佢買天工國際一樣,一樣咁恐怖。停牌,是沒有限期的;同樣,戇鳩,是沒有底線的。

我終於忍唔住回咗幾個好驚嘅emoji畀佢。

「我求下你,唔好再買股票啦。買親都領嘢……」

十五分鐘後。

「係啦,我都覺,算啦,當冇咗。」

自此以後,已經有一年多,我無再收到阿霞任何訊息……

阿霞彷彿消失於股壇中。

大概阿霞的確死了。

……但雷士照明到今日都仲係停緊牌。

───

去返最開頭「買邊隻股票好?」嗰條問題。

經過咁多年嘅訓練,我由唔識答、亂咁、鳩答,到講到真係(以為)講得準,再進化到求鳩其講到似層層,而家索性唔撚答,求其話「個市會大起大落,小心」呢類好似好有料嘅答法。

因為問你嘅人,你講乜佢都唔會理你。你叫佢唔好買,佢一樣照買;你叫佢唔好賣,佢即刻打電話沽。佢問,只係一種lip service。

唔好再浪費我時間。佢哋淨係中意聽消息,唔會睇任何fundamental analysis。好,就算要聽消息,都要小心啲閪選,要聽啲可靠嘅人講嘢:

1. 呢個人係咪經紀?你做買賣,佢有冇錢落袋?我睇到華爾街狼人,Matthew McConaughey一幕(https://www.youtube.com/watch?v=wM6exo00T5I),真係感動到爆。經紀係幫你買同賣而賺錢,信佢一成,閪足全程。

2. 呢個人揀股嘅track record如何?係燈定神?股神唔怕跟,做明燈(即係揀中都仆街嘅)都有佢嘅用途-佢叫你買嘅你千祈唔好買。

3. 嗰個人有冇買?我同一般人睇法唔同。叫你買,自己又唔撚買,屌你老味邊有說服力?

當然,你識咁諗,就in the first place唔會只係聽人講。聽日講號碼都有用,但只限於聽完號碼自己做功課。唔買,咪放埋一邊睇下佢之後係咪真係升。唯有係咁,要反複驗證,重視真偽,咁先有進步。

所以,喺某程度嚟講,阿霞根本應該連我講嘅嘢都唔好信。

再認真啲,我同你講某某你都冇聽過嘅股票會大升,你敢唔敢拎$100萬出嚟買?你最多咪買三幾萬,升你升一兩倍,最多都係十萬八萬,距離發達仲有好遠嘅路。反而,你學識做功課、睇市睇年報,呢啲學識同技能,一生受用。

學海無涯,你只能夠喺「學識廣、但每樣嘢都只係識少少」同埋「識嘅範疇非常窄,但知得深入」,二揀其一。喺投資上,即係你識大市升跌、未必識揀股;識揀股,又未必懂大市升跌。

我份人比較謙虛,選擇咗第三條路:

「我乜柒都唔識。」

───

最後,講多樣嘢。

幾乎讀親大學嘅人都會受到親戚朋友嘅恭維。

「David,你讀computer science,可唔可以幫我個仔裝隻window嘅翻版?同埋我有時睇youtube有廣告彈出嚟,你讀大學一定有教點樣整走佢。」

「文仔,你喺牛屎大學讀中史?咁啱咧,你知唔知二次大戰希特拉個副手叫乜嘢名?唔識?你唔係讀中史嫁咩,咁都唔識?」

「阿強,你係大學生?可唔可以幫我個女搵份暑期工?」

可以呀,有冇聽過個網站叫sex141. c o m?我幫你個女影輯相放上去好唔好?

聽過一個,仲好笑。

「咦,阿豬女,聽你阿媽講你喺英國讀fashion management and direction喎,
.
.
.
.
.
.
.
.
.
.

咁你知唔知邊度買Prada平?」

哈哈哈哈哈哈哈哈哈哈哈哈哈哈哈,屌你老味,我讀獸醫,唔通要識邊度食牛雜平靚正咩?你都烚戇嘅。

(完)

──────────────────

廣告時間:不要問,只要like。仆街史兄的專頁

 

發表意見