立場新聞 Stand News

投資車位 隨時做儍仔

2016/11/27 — 11:43

政府網站

政府網站

樓價爆升後,政府橫空出招提高印花稅,打窒炒家度氣,有人見樓價咁貴,炒賣成本咁高,於是走去炒車位,搞到呢期車位價勁升,隨手屋邨車位要百幾兩百萬,個別地方仲炒到幾百萬,貴過新界住宅單位。

好多懶醒嘅人話,車位投資好過住宅,事關車位唔使裝修,管理又容易,更加唔使擔心有租霸。冇錯,全中,不過你要問吓自己,買車位投資係為乜,所謂投資,梗係想有個理想嘅租金收入,然後揸得三幾年,車位升值,咁就財息兼收。

回報得兩厘

廣告

事實係咪?你要睇睇車位租金現時收幾多回報,除咗個別屋苑外,可以話俾大家知,一般都係得兩零多啲啲;唔好忘記,車位一樣要俾管理費、差餉同地租,扣減埋呢筆開支,息率隨時只係得兩厘,甚至更低。

你要諗,特朗普上場後,美元強勢到爆,息口預期不斷升溫,十年期長債由1.8厘急升到現時2.35厘,你就知美國明年加息步伐有機會快好多,香港可能短期未必跟,但中線嚟講都走唔甩,投資車位只係攞區區兩厘回報,你話吸唔吸引。

廣告

炒賣好易中伏

再者,車位價再係咁上,租金回報會進一步下調,到時跌低過兩厘,更加冇肉食。你可能會話,加車位租金咪得攞,但可以話俾大家聽,除非你個屋邨嚴重車位不足,加上周邊冇任何供應,否則唔係你話加租就加;特別車位唔係好似樓咁係必需品,車主可以將架車擺喺不同地點;又或經濟唔好或負擔重咗,隨時唔要部車,所以租金升幅唔係好似住宅或舖位咁話上就上。

當然,你話買嚟炒嘅,咁又另當別論,喺現時較熾熱氣氛,你博短期有機會再上,但亦好大機會接火捧。若然話買嚟投資收租,可以話俾你聽,過兩年銀行利率回升,你會發覺車位利息回報簡直係可耻,若然你係做按揭,到時扣埋供款,所剩無幾,喺息口趨升時,無謂貪兩厘回報而縛住兩三百萬現金。

發表意見