立場新聞 Stand News

數字不會講大話

2018/7/20 — 16:13

背景圖片來源:pexels.com

背景圖片來源:pexels.com

Men lie, women lie, incapable managers lie most, but numbers don’t,即係數字不會講大話,畀人拆穿西洋鏡,就弊傢伙。

邊間機構忽視數字嘅重要性,唔重金投資於自家專才人才電腦器材,唔將 Management by Data 放在眼內,妄想憑藉腦細高層有錢佬嘅感覺,獨斷行事或者掩掩藏藏,畀錢外間企業顧問策略大師神棍,掩飾自己財大氣粗嘅無知無能,寧願信任僱傭兵,都唔相信自己人,即係外行領導內行,黑人黑夜捉烏鴉,瞎子摸大笨象,市場最終都會懲罰呢啲九流公司。對付呢啲嘥時間兼無嘢學嘅垃圾公司,只有一個方法:趁後生,仲有討價還價能力,早撇早著。

相反,有志於做生意或企業管理,須知魔鬼盡在細節之中,深入瞭解數字嘅背後意義,就可以無師自通或一點就明,分得清楚邊個講大話,邊個童叟無欺,邊個係龍或邊個係蟲,就算腦細高層有錢佬不學無術之輩,唔識唔想唔敢做數據收集分析預測,你都要盡你嘅最大能耐,靜雞雞做宏觀市場統計、銷售趨勢、顧客調查、財務分析、現金流預測等,仲要開誠佈公,同有關人員分享,等同僚下屬可以依據數目字辦正經事。問題係,你有無膽量加能耐呢?

廣告

撫心自問,你知唔知最新市場形勢?競爭對手近期攪作?產品利潤高低?銷售額高咗定低咗?市場佔有率排第一定九十九?公司科技先進定差人十萬八千里?客戶投訴?部門員工流失率?人事變動?工作流程重組?

再試問聲,收入唔知,支出唔知,毛利 EBITDA 純利 ROE 唔知,公司做成點唔知,入不敷支瀕臨倒閉唔知,唔知己亦唔知彼,乜鬼都唔知,好似盲頭烏蠅,點同人競爭?點力爭上游做到最好啫?上頭話呢啲係商業秘密喎,呢啲狡辯吞噗嘅說話,三歳細路都唔信,你信?話唔埋,腦細高層中層個個都唔知,齊齊等死等運到。

廣告

至於我有無咁做?做咗 32 年咁上下,好短,可以隨口噏出有關行業數據小數點後一個數目字,就算人人擘大口𠵱𠵱哦哦,只有我可以輕描淡寫講兩句,機會就喺不經意間爭取返嚟。有人問我:點解你咁好記性?咁好運?咁多發展機會?咁識把握機會嘅?我笑而不語。

祝君好運!

 

原刊於作者 Facebook

發表意見