立場新聞 Stand News

最有型職業

2015/3/16 — 6:30

以為大部份女人都會討厭葉朗程,但根據半年前某個「市場調查」,似乎不應過份悲觀。雖然極度懷疑這個調查的準確性,但也不得不說聲「謝謝」。2014 年十月,女性時商雜誌 Cosmopolitan 選出「六種女士眼中的有型職業」,如果你未看過有關內容,以下是節錄。

第六位是「職安真漢子」,例如建築工人和水務工人。Cosmopolitan 說:「人家強而有力的臂彎予人無限安全感。」完全不感驚訝,很多「成人藝術電影」的第一句對白,都是一個渾身男人味的大隻佬跟女主角說:「Hi,我是來幫你通渠的。」

第五位,是廚師。「看着你的愛人在廚房為你炒啊炒、煎啊煎,只為呈上一頓愛心晚餐,無畏無懼將自己弄得一頭煙,多麼催淚啊!」Exactly,識搞,梗係去廚房搞。

廣告

第四位和第三位都是「師」,卻不是律師和會計師,而是攝影師和插畫師。「不論你樣貌是周秀娜還是周融,他都可以為你拍出周慧敏那種清純美感。」周秀娜和周融變周慧敏都唔難,周梁淑儀都變到周慧敏,咁就真係耍家啦。至於插畫師,「最最最吸引之處,是可以命令他畫你。」畫唔畫你,純粹
睇吓你著幾多衫啫。

來到第二位,竟然是社工。我說「竟然」,因為從來沒有想過男士當社工可以讓女生有血脈沸騰的感覺。「他們還有一顆正義的心,光是看着他,血管已經感到熱血,跟他走在一起,更是整個人充滿正能量,那沒法擋的魅力,叫女生神暈顛倒。」

廣告

登登登凳,第一位,iBanker。呢本 Cosmopolitan 真係畀面:「或許要多謝葉朗程,令iBanker 這個身份如此落入凡間,卻依然保持一個神秘的距離,女生都幻想自己能找到這樣一個魅力爆棚的男人。」葉朗程是女人的幻想對象,ok,not surprised,呢個事實我由高中開始已經知道。Cosmopolitan 繼續:「說實在,這份職業在女生眼中絕對是魅力非凡,高薪厚職帶來物質享受之餘,還會幫助你投資理財,加上西裝筆挺的外表,跟他手拖手在中環逛街,那份自信心無限放大,局外人看在眼中只有羡慕的份兒。」

唔同意唔同意,好多嘢都唔同意。西裝筆挺?中文水平一般,但我斷估「西裝筆挺」即係話著套西裝著得好好睇啦。事實係,唔好話西裝,有啲 bankers 連一件恤衫應該點樣著都未知。恤衫領應該高過西裝褸幾多,恤衫袖口又應該長過西裝袖口幾多,呢啲太高深,唔好講,因為宜家有啲 bankers 仲係老土到件恤衫個心口位會有個袋畀佢插支筆入去,好救命。

恤衫有個袋都唔緊要,起碼著住件西裝就乜都睇唔到,但好多人連對鞋都唔識襯,呢樣真係頂唔順。啡色皮鞋應該襯乜嘢色西裝?呢條唔係 IQ 題,係常識題。黑色同深灰色嘅西裝只可以襯黑色鞋,深藍色同淺灰色西裝就襯黑鞋同啡鞋都可以。帶唔帶錶都係其次,但係一對鞋可以表達好多 messages,襯都襯錯嗰啲,你點可能同佢喺中環好有自信咁手拖手行街?

不過,如果 Cosmopolitan 指的只是葉朗程,而不是所有 bankers 同業,那當然另當別論。但無論如何,有一點必須澄清:葉朗程其實是 private banker,而不是 iBanker (investment banker)。兩者之間存在巨大分別,但三言兩語很難交待。如果你嘅 concern 係錢,邊個搵得多啲?是乎個別情況而定,但一般而言,都係 iBankers (喺好景嘅時候)搵多好多。

至於工作性質,真的是完全兩回事。可以咁睇,iBankers 對住嘅客,通常都係 institutional clients,即是唔係一個人,而係一間公司。但 private bankers 要面對的,多數是一個人,或一個家庭。兩種客戶最大的分別,就是「公司」追求的是高回報、高回報和高回報。但現在如果和一些亞洲超級富豪討論投資方向 (我所指的,是在家族層面上的投資方向,而不是從企業角度看的那種)的話,他們已經不太在乎逐年的回報,尤其是金融海嘯之後,他們對風險兩個字已經開始有全新的注釋。

有些親戚問我:「我個仔都想做你個行,識吓啲有錢人,有冇得介紹吓?」剛剛畢業的學生,真係好難「介紹吓」。對於一家真正超大的私人銀行來說,要從頭開始培育一個人才是成本很高的事,而今時今日的銀行已經不會這樣浪費時間。現在一家私人銀行的請人途徑,通常就是從另外一家私人銀行找人過來,貪呢啲 bankers 可以順便扯埋班客過嚟。(咁當然都有失敗例子,就係扯到個 banker 但係扯唔到個 client 過嚟)

「吓?咁其他本身唔係做 private banks 嘅人點入行呀?」咁又唔係間間 private bank 都會喺同行裏面搵人嘅,因為畢竟高薪挖角呢個撬人方法係一件成本好重嘅事,所以有啲私人銀行都會請啲有其他 banking 經驗嘅人過嚟。有唔少人做咗 commercial bank 好耐,都會轉嚟 private bank 碰碰運氣。雖然咁樣請人就低成本好多,但係就高風險囉,因為真係好易請唔啱人,而且請咗佢哋返嚟之後,一定要畀好好嘅 support structure 同埋指導佢哋,如果唔係坐唔夠兩個月,好容易就做到冇癮。

一句到尾,做得 private bank,唔單止要好了解乜嘢係 banking,仲要好識同人溝通。「我同人傾計,包保冇 dead air 㗎,好多人聽到我講嘢都係咁笑㗎。」呢啲係普通嘅社交吹水,唔係溝通。何謂識溝通?唔係同人嘻嘻哈哈,而係你要知道喺乜嘢位去 impress 人,喺乜嘢位問人問題 (一啲好私人嘅問題),或者喺乜嘢位要停一停,寧願今次講少啲,都唔好失咗下一次嘅溝通機會。

某個偶然情況下,我識咗個地產代理。由識佢嗰日開始,佢就開始煩我。「葉生,有啲乜嘢盤啱?」X 千萬樓下,九龍塘區,最緊要抵。得得得,冇問題,有好多。跟住三、四日,佢就每日 whatsapp 轟炸我,又圖又字,煩到嘔電。佢真係有荀盤嘅話,我都唔介意佢煩,但係佢嗰啲唔係兩萬蚊呎,就兩萬五蚊呎,再唔係三萬蚊呎都有。

「三萬蚊呎都話抵?」葉生,宜家個市,好抵㗎啦。「你 send 咗九千幾個盤畀我,邊個算係抵?」好多個都好抵喎,你慢慢睇,唔使急。睇完佢咁講之後,我即刻 block 咗佢。我 block 咗佢,唔係因為佢畀唔到荀盤我,而係佢呢種同客人嘅溝通方法。你覺得佢日日 whatsapp 轟炸我,好勤力,好進取?我覺得佢係好無能,好冇心。

我畀份功課你做,叫你搵個荀盤;你就畀番一堆資料我,叫我陪你一齊搵個筍盤出嚟。咁即係你叫我同你一齊做功課?你真係 short 得幾勻循。By the way,神級經紀阿熹幫我喺九龍塘搵到個盤,係萬幾蚊呎。

世上的有型職業, 又何止 Cosmopolitan 提及的六種, 而 ibanker 更肯定不是什麼所謂最有型。只要你記着兩句話,無論做甚麼職業,就算你唔係最型,都肯定唔會係最豬嗰個。別在勤力的人面前裝勤力,這只會顯得你更懶。別在聰明的人面前裝聰明,這只會顯得你更蠢。

刊於蘋果日報,金融中心版

發表意見