立場新聞 Stand News

最簡單投資賺最高回報

2017/4/23 — 10:28

金庸武俠小說《天龍八部》的喬峰,在聚賢莊以簡簡單單的「太祖長拳」就力敗多位武林高手;原來投資世界裡面,也不用甚麼吸星大法、北冥神功或六脈神劍,一樣可以取得最大回報。

點解咁講,Loser喺某大基金公司有一個強積金戶口,間公司有十個基金供你選擇,當中有隻恒指基金,你估係買乜?冇錯,就係All-in盈富基金,你會問咁同自己買盈富有乜分別,問得好,答案係有分別,分別係你每個月要俾多間基金公司百分之1.01管理費。

最佳基金All-In盈富

廣告

咁你又會問,你咪唔好選擇呢隻基金,買其它表現好啲嘅咪得囉,咁你俾管理費都俾得條氣順啲。咁你又錯喇,因為你左睇右睇,發覺咁多基金中,過去1年(截至今年3月底止)呢隻嘅表現最標青,簡單講係表面有好多選擇,事實係冇選擇,最後侷要俾多百分之一買盈富,死未。

唔好以為呢家基金公司做得差勁,早前睇過某報道,2016年大陸在海外成立運作嘅對沖基金排名榜中,排第十嗰隻睿智華海基金,全年回報都係百分之五點零五。你想想,喺內地云云咁多對沖基金中,能夠排十大都唔簡單,但回報都係區區5%,其餘基金表現點,大家心裡有數(雖然唔知個統計準確度及計算方法,但能夠被引用,點都有啲代表性)

廣告

Less is more

相反,若然你去年初買盈富基金,持有到今年3月,回報都超過百分之十,跑贏好多基金。唔好忘記,對沖基金又Long 又short,又用期權期指,買賣頻繁,搞咁多大龍鳳,都唔夠你買隻盈富基金咁乾淨俐落,兼且唔使俾咁高管理費同表現費。

投資原來只係咁簡單,唔使炒出炒入,唔使咁多花巧,更加唔使靠專家,亦唔使聽股評人天天話買乜買物,只要買隻盈富基金,然後不用日日望住報價機,亦唔使擔驚受怕,只要長線持有就可以。當然,醒啲嘅人會喺大市回調某個水平先吸納,長線你肯定可以跑贏九成基金,又何須俾錢人賺。

發表意見