立場新聞 Stand News

朱國樑請下台

2016/8/22 — 13:05

資料圖片:國泰航空

資料圖片:國泰航空

國泰航空(0293)曾經係港人引以為傲嘅航空公司,安全度滿分,服務優越,年年業績表現理想,小小香港有間咁出色嘅企業,經營者應記一功。點知呢幾年唔知發生乜事,國泰服務竟然淪落到變咗間廉航,業績又跑輸大市,就連過去透明度都冇埋,你話邊個要負責?

如果近兩年你坐國泰,肯定覺得有好大唔同,例如有啲航班冇咗上機後嘅花生同飲品,又有啲航班連電影都Cut埋。講到服務(都唔講空姐個樣),更加係大跌Watt;我可以分享一吓經驗,有次坐飛機問空姐攞毛氈,佢話冇晒,咁都算,你估佢跟住講乜,佢話可以俾張別人用過嘅俾我,吓!咁都得,我好想問問,係咪可以退返部份機票錢呢。

國泰變咗廉航

廣告

又有朋友試過(唔單止一位)寄艙行李唔見咗,然後搵國泰理論,佢哋效率慢不特矣,客戶服務部仲愛理不理,奉旨要你打電話去追,然後回應又毋寧兩可,最終要好幾天先搵返,你話幾激氣。

點解會出現咁情況?聽聞係管理層見航空市場競爭激烈,要開源唔容易,新嗰位CEO朱國樑上場後咪只好勁節流,但一減資源,服務肯定首當其衝受影響,結果慳嗰少少錢,國泰經營幾十年個金漆招牌就咁剝落,你話值唔值,真係見仁見智。

廣告

最慘係你減咗成本,業績有啲起色都好,點知班管理層睇市準過沈大師,買期油對沖勁輸錢,剛公布份業績竟輸咗45億(其實上年度對沖時已蝕80億),雖則話油價大插好難料,但貴為一家世界級企業,錯得咁利害,作為管理層真係要認真檢討,查找不足。

透明度衰過3線公司

業績表現差都算喇,管理層喺企業透明度上仲差過啲3、4線公司,早前中期業績記者會,有媒體問業績咁衰點解唔發盈警,國泰CEO朱國樑話每月有數據公布,投資者應該察覺到。吓!如果你係百富環球(0327)呢啲咁嘅公司,我可以原諒,但你係堂堂國泰航空,藍籌公司,全球十大航空,企業管治曾經「冧巴溫」,竟然講呢啲咁嘅話去敷衍公眾,朱生有冇羞耻之心?

國泰每月公布資料,只係啲營運數據,但呢兩年國泰業績差,主要衰喺油價對沖上,試問佢地有冇公布每月期油對沖盈虧數目。況且一般小股民又唔係分析師,邊有咁心水清識得解讀呢啲專業數據,你係咪有責任發盈警提醒一下公眾。

咁喇,既然國泰甘心做一間服務唔到位嘅廉航(但佢收嘅費用係全服務航空公司價格),管理層對全球經濟掌握得咁差勁,又冇透明度兼夾賴皮,我只好喺度祝佢好運囉,要我買國泰股票,No Way!

發表意見