立場新聞 Stand News

東尼老師

2015/7/28 — 16:34

有「亞洲股神」稱號的東尼老師(Tony Measor)謝世了,八十二,睡夢中安詳離開。

當年逢星期三買壹週刊,第一件事就係翻到老師嘅專欄「天下第一倉」,短短數百字,老師講下股市宏觀看法、投資點滴,偶爾會告讀者來信(讀者問題質素奇低),我反覆睇完又睇,其實只求學得一招半式。

看完第一倉,睇埋之後林振強(2003年前)、蔡瀾、大教授(200x年前)同李碧華嘅專欄,每週樂事也。說實話,呢幾個專欄值$20;至於楊社長、肥佬,仲有後來蔡東尼嘅,我只能講句:飛機我自己都識打。

廣告

老師喺壹週刊嘅投資推介,並非全部點石成金(註)。但投資建議次要,心法、概念及思考方法更為重要。在此而言,我喺老師身上,獲益良多(部份來自東尼老師的「投資十大心法」):

-唔好買基金、唔好炒IPO
-要知道自己問咗乜嘢公司同股票
-長期持有
-好公司的股票,不一定便宜;垃圾公司的,不一定買不過

廣告

多年來大部份時間遵從以上教晦,儘管偶爾有涉足短炒。

喺老師話畀我知,投資唔能夠得靠把口,一定要親自落場。老師推介嘅股票,自己真金白銀拿錢出來買,記錄在案;贏好、輸好,一清二楚,無得抵賴。

佢嘅100萬元倉,亦都係捐條毛做善事成樣嘢嘅藍本。

我同自己講,講任何嘅推介、建議-不單是投資,而是社會運動、捐款、善事-自己做唔到,唔好建議同推介畀人。

身體力行,係我喺老師身上最大嘅收鑊。我從來沒有見過老師,但老師嘅教晦,一生受用。

希望老師安息,並在天國生活愉快。

───

註:

-最經典、也是鄙人印象最深刻嘅,就是老師多年來一直推介瑞安房地產(272),並不止一次在專欄提及羅康瑞對小股東一向不薄。瑞安房地產現價約為$2.0;老師喺$3, $4時不斷推介股票。鄙人印象深刻,皆因我曾大量持有272,輸到仆街收場。

-老師喺「天下第一倉」曾推介中國民航信息網絡(696)。我看過它的年報,喺$4.5大量買入,一直放埋一邊,現價約為$9.5。

-另外,喺海嘯時,我以$0.5買入大量新意網(8008),那時候息率有接近10%。做過功課,我知道這間公司財政穩健(負債是零),收入穩定,值得持有,年來更偶爾增持。這全是老師的功勞。

新聞資料來源

原刊於捐條毛做善事 facebook page

發表意見