立場新聞 Stand News

樂視快執笠?

2016/9/18 — 11:14

樂視在香港舉辦發佈會,宣傳其電視業務(圖片來源:Letv HK樂視)

樂視在香港舉辦發佈會,宣傳其電視業務(圖片來源:Letv HK樂視)

繼天價投得英超轉播後,樂視又搶埋NBA獨家播放權,市傳超過10億元,樂視出手之豪跡近瘋狂,仲未計佢啲推廣計劃,例如訂英超就連個電視都送埋俾你,香港人R爆頭都諗唔明,唔好講賺錢,可以打和都偷笑,有啲人仲話樂視唔使幾耐要執笠。

喺港人觀念上,做生意冇盈利,兼夾不斷燒錢,係冇可能嘅事。佢哋仲會話呢啲大陸佬做生意好贛Q,淨係識做大做強,要威要面,最終只有係蝕本離場。

如果我哋咁諗就錯喇,樂視最終係咪會執笠暫時我唔敢講,但好肯定賈躍亭一啲都唔係儍仔,佢呢隻中國影視娛樂界嘅獨角獸,隨時可以吞食埋香港個電視市場。

廣告

媒體中的獨角獸

所謂獨角獸,係公司以互聯網或相關技術為核心,不斷透過融資而迅速擴大,過程中唔介意瘋狂燒錢搶客戶,並通過收購吞併去打跨行業對手,務求要壟斷整個行業,到獨佔市場時,就係收成期,講衰啲係可以隨意宰割客戶。

廣告

唔好以為係單純玩財技,Google、Facebook、阿里巴巴呢啲巨企,當初都係經過呢個模式去發展,嗰時年年蝕大本燒錢吸客,但就迅速蠶食晒成個市場,𠵱家每年盈利數以百億元計。

你睇樂視今日,好明顯係走呢個模式,觀眾最愛睇乜,錢唔係問題,唔理幾貴先搶咗返嚟,總之要短時間內迅速上客,以本傷人,打低其它競爭對手,遲啲先講盈利。

矛頭隨時直指TVB

今次樂視搶走英超同NBA,遲啲好大機會搶埋歐聯,大家都知收費電視靠體育食糊,冇晒體育,收費電視台生存空間大打折扣。好喇,趕絕收費台後,下一步講唔埋會挑戰無線一哥地位。

今日無綫只有一條護城河,就係啲師奶劇集仍然有一定收視,過去競爭對手要搶拍劇集,邊有咁多明星。但樂視唔同,絕對有能力瘋狂挖角,況且佢隨時可以搵啲內地超紅明星合作,甚至搵韓星,製作啲更高水準劇集,嗰時連無線最後一道防線都變得汲汲可危。

你會話王維基都唔成功,樂視得咩?你要諗魔童有幾多子彈,樂視規模遠遠大於香港電視,又能透過融資平台或風險基金集資,隨時集到龐大資金,一個唔覺意TVB都俾佢打殘。諗諗都好吊詭,𠲖家啲人咁仇視TVB,遲啲唔知會唔會倒轉槍頭支持無線去對抗啲大陸佬。

發表意見