立場新聞 Stand News

毛記掛牌曾暴升近9倍 「專家」Dickson 敲鑼 6.38元收市仍升4倍

2018/3/28 — 9:43

【11:50更新內容,下午5時再更新收市價】

經營《100毛》及毛記電視的毛記葵涌(1716),今天首日掛牌暴升,開市時已高開6倍,報8.4元,其後曾高見11.76元,比招股價1.2元升幅達8.8倍,市值一度高見27億元。毛記葵涌下午升幅顯著收窄,收報6.38元,比高位跌近一半,成交高達15.14億元。

以今早約10元市價、每手2000股、不計手續費計算,每手賬面賺17,600元。股價其後曾大幅回落至5.61元,​最​終​收報6.38元,仍比招股價1.2元高出逾四倍,公司收市市值為17.23億元。

廣告

毛記葵涌全日成交活躍,大量股份在高位成交,全日成交股數最高的價位為8.4元,佔全日成交量約5.3%,其次為10元,佔全日成交量的4.6%。

毛記葵涌,圖片來源:蘋果atm片段截圖

毛記葵涌,圖片來源:蘋果atm片段截圖

廣告

上市儀式由毛記「專家」Dickson代表致辭和敲鑼:

「大家好,我係『毛記葵涌』嘅發言人,我叫專家Dickson。

喺2010年,望住賣$1張嘅《黑紙》,真係估唔到喺2013年會出現《100毛》依本雜誌;到望住賣$10本嘅《100毛》,我哋又估唔到,喺2015年,會出現『毛記電視』依個媒體;而望住$1都唔使畀就有片睇嘅『毛記電視』,當然亦唔會估到,喺2018年嘅今日,會出現『毛記葵涌』。

呢間就係一間咁樣嘅公司,一間甚至連創辦人自己都唔識分析、分析唔到嘅公司。

所以,到咗今日當公司要學人上市喇,我哋最想多謝嘅,一定係以下呢兩個人:

第一個,係Patrick,佢喺2012年,當依間公司仲係賣緊$1張《黑紙》嘅時候,竟然唔理咩業績,唔理咩分析,憑住自己敏銳嘅眼光,錯手入咗股;

第二個,就係一班從來都咁盲目睇好我哋嘅讀者同觀眾,你哋係我哋心目中『最蠢,但係睇得最準』嘅財經專家。多謝你哋。

最後,講開又講,『東方昇』加場,4月3號賣飛,自己留意返,多謝。」

以發言人身份出席上市儀式的Dickson,其後接受傳媒提問時被問到公司上市後會有什麼變化時,稱希望清理掉雪櫃內同事遺下的很多發霉食物。被問及對公司業績前景時,他表示自己只是「愛情財經投資專家」,希望自己的愛情指數會上升。

當被到問公司上市後會否爭取加人工,Dickson說「我每一日都爭取,最好日日加畀我」,而慶祝成功上巾的活動「我諗就係返工」。有記者問他作為員工,覺得「老細」林日曦今日心情如何,Dickson答道:「一貫作風,都係黑面,冇咩特別。」

最後有記者按捺不住問Dickson:「你哋公司會唔會有其他人,講到啲實際啲嘅嘢?」Dickson回應:「我諗有嘅,我哋公司都OK嘅。」

毛記葵涌在港公開發售超額認購6288倍,成為香港IPO歷來的超購倍數王。在回撥機制後,公開發售部分的佔比增至50%。散戶申購1手的中籤率僅0.8%,需要認購1000手,才可以穩獲1手,涉及資金240萬元。即使認購「頂頭槌飛」,最多亦只獲分發3手。股份以1.2元上限定價。

陳強(陸家俊)、阿Bu(姚家豪)、林日曦(徐家豪),圖片來源:蘋果atm片段截圖

陳強(陸家俊)、阿Bu(姚家豪)、林日曦(徐家豪),圖片來源:蘋果atm片段截圖

 

發表意見