立場新聞 Stand News

準確預測4月見頂 林一鳴:救市唔係咁救 後市一浪低於一浪

2015/7/8 — 18:06

資料圖片:林一鳴,圖片來源:公開大學

資料圖片:林一鳴,圖片來源:公開大學

港股今年4月憧憬大陸資金南下,成交額爆升,股份炒過不停,滬港通作用顯現,但港股大時代的好夢,如今已成泡影,大陸救市失敗,牽連港股重創,埋單計算,港股A股化是禍是福?資深投資者林一鳴向《立場》指出,長遠計,港股與A股融合,無論資金、成交量、投資者數量都會顯著增加,「唔好嘅當然令到波動、非理性⋯⋯當大家成熟咗,就一定是好事,但唔係今日。」

預測恆指一浪低於一浪

林一鳴4月時曾準確預測恆指在28000點見頂,並且將會進入「熊市」,因無論是經濟因素、企業盈利等也未如理想,很多成份股連11倍的市盈率也不值。他上月底再準確預測中央救市勢加速熊市來臨。林一鳴預計,港股今日確認「熊市」後,將會再階段性下跌,未來的走勢會一浪低於一浪,「有時會有明顯反彈,但反彈完就會散,每一次的底,都會低過上一次的低。直至大部分投資者比較絕望嘅時候先至會跌完。」

廣告

林一鳴相信,A股化對香港市場是有好處,但需要一段學習過程才能反映出來,「長遠計,一定好,但需要一個學習過程。我諗成個遊戲的參與者好多唔係咁成熟,唔係好知道市場點樣運作。」他批評,連中央當局等也用一些蠻力、暴力的做法去救市處理,「(投資者)需要交學費。當大家成熟咗,就一定是好事,但唔係今日。」

林:救市失當 加速熊市

廣告

林一鳴指出,A股化引致波動,香港監管機構難以處理,投資者面對如此市況要「睇通啲」。他提到,過去兩個星期,香港很多分析員錯以為人行減存款準備金率等一系列招數能「救到市」,「好多香港分析員對金融市場要自己了解多啲,中國政府學點出招?環境會點樣?對市場的反應點樣?香港很多投資者、評論員還要學習。」

他認為,中證監等救市策略失敗,引致熊市加速來臨,「救市唔係咁救」。上周末21家券商宣布用1200億元人民幣買股救市,是一大失策,「救市唔應該講銀碼出嚟。大鑼大鼓講咁多,會影響個行動。」

林一鳴指出,最理想的救市方法是「借力」,而非用「蠻力」,「救市最適當做法,是等跌到殘,跌得七七八八,有少少自然反彈,再輕輕(出招)托一托,托返上去。救市才有效。」林形容,中央救市的做法,是反其道而行,救得太快,只會加速市場恐慌,杯水車薪,「令到(股民)當救市行動是水泡,大家不停咁沽,更加令投資者無信心,加速下跌。」

發表意見