立場新聞 Stand News

為政者要有鄭裕彤胸襟

2016/10/2 — 11:12

91歲鄭裕彤喺家中逝世,對佢同佢家人嚟講,未嘗唔係好事,皆因彤叔4年前已經開始昏迷,簡單講係植物人,加上佢年紀咁大,能夠醒返機會等同奇跡,死係一種解脫。

認識鄭裕彤嘅人都知道,佢最令人敬重係「唔計較」、「冇所謂」,笑罵由人。當李嘉誠要做世紀大慈善家時,鄭裕彤只愛跟老友「鋤大弟」,風花雪月,懶得別人說三道四,你話佢包養邊個明星,冇要緊,最重要係自己開心。

十幾年前新世界被剔出恒生指數成份股,喺好多有錢佬眼中係天大事情,但媒體問彤叔乜感受,佢回答三個字「冇所謂」,或許他有點失落,但回應得瀟灑俐落,沒半點拖泥帶水。

廣告

亦由於佢唔多計較性格,能夠維繫到好多富豪,人人睇佢做頭,大劉、楊受成等一眾有錢佬,都以佢馬首是瞻。於是乎經常喺媒體見到有乜新股上市,或者大型活動,鄭裕彤企喺中間,其它富豪一字排開影合照。

佢又樂意做和事佬,大佬中有乜爭拗,一出面包保搞掂,當年大劉同楊受成炒大鑊,都係佢兩邊說項,兩人馬上收聲。

廣告

由於彤叔樂於助人,自己遇到問題要解決,即刻一呼百應,十年前兒童基金計劃狙擊新世界,買咗唔少新世界股票,鄭裕彤立時配股攤薄兒童基金股權,嗰時李兆基二話不說拎錢幫手認購,你就知佢幾有人緣。

鄭裕彤因為不計較,唔理別人點睇,所以唔會因為別人批評而告人,佢話知你點睇,任媒體點寫點講,總之笑罵由人;呢一點,我哋梁特首就欠奉,動不動就要出律師信告人,沒有一點政治家胸襟。

為政者除咗能力之外,要有胸襟、要有人緣、要有親和力,呢幾點梁特首真要向鄭裕彤學習。

發表意見