立場新聞 Stand News

無業可創?

2015/3/30 — 6:30

關於搞startups,好多事情,都是眾說紛紜。一致同意的屬少數,其中一樣,是每個時候,總有可創的業,總有有得做的題目,永不枯竭。

另一種講法,是無論未來邊一年,總會有人創業成功。聽起來,好多人都會同意,覺得好合理,甚至好明顯,但實際想創業的時候,就會覺得無業可創,可以做的,都一早被人做了。

一種想法,是消極的先入為主,聽人講覺得有錢人大財團早已把所有商機榨盡。不是說世上無乜乜霸權,而是就算有霸權,依然有好多業可以創。未試就投定降,是中了計。

廣告

另一個可能,是確實嘗試過,而發覺好難搵到個好題目,因為搵不到,所以就覺得無。的確,總有好題目是一回事,自己搵得到是另一回事。就例如六合彩總有人中是一回事,自己中則是另一回事。

想像一下,每人眼前,總有好題材飛過,不過飛過的時候,不會大聲通知,也不會好清楚展現出來,要落足眼力去望,而且要自行拆解領悟。好題材飛過捉不到,事後未必一定知。

廣告

自己經驗,錯過而知的,例如好幾年前去北海道自由行,網上找民宿,幾難搞,語言不通,俾錢落訂過程又麻煩,之後歐遊也是類似經驗,其實絕對可以發現民宿市場有得顛覆,結果還是靠airbnb做紅後,大家才如夢初醒。

再遠少少,讀大學時,有份搞了份網上雜誌,其中一個欄,是借時裝為名,找來靚女同學影模特兒相,當時每出新一期,不需怎麼宣傳,同學之間就會病毒式瘋傳,而且訪問歷史顯示,個個都是直接連入「時裝」那個欄。後來回想才發現,Facebook的點子,其實就這樣在我面前飛過,不過要到幾年後的某個Zuckerberg才捉到住。

你是甚麼人,就有甚麼題材飛過。當全世界大部份startup創辦人,都是二十至三十歲背景相近的發達國家男人,所揀的題材就有傾軋。中年老年人的需要,女人的需要,非英語人的需要,都應該有好多位未填。

何況好多行業,科技人未滲透到。時常講,一畢業出來就創業,未有市場行業打滾經驗,題材只侷限於中學生大學生的題材,而其實好多行業都有顛覆位,不過通常只是行內人先知道。但行內人又未必懂科技,所以要跟科技人合作,這樣的配搭難得,一旦搭上,威力可以好大。

創業不成,可以有千百個合理理由,但「世上再無好題材」肯定不是其中一個。

刊於蘋果日報,金融中心版

發表意見