立場新聞 Stand News

由 Bitcoins 價格貼近萬美元 看過氣領導講話的價值

2017/11/28 — 21:28

資料圖片:bitcoin

資料圖片:bitcoin

相信有不少讀者間唔中都會去一啲論壇,聽下一啲智者嘅至理名言。最近去過幾個論壇,都聽到有啲不再在位的專家話Bitcoins的價格如何離譜、需要規管等。

聽一次你覺得好發人心省,聽多兩次嘅話,相信你都忍唔住,淨係集中火力同朋友 selfie 一下,喺IG、微信、Facebook晒吓自己有幾勁,又或者可以喺度釣下魚(有幾次好激,個moderator 係咁喺台上面闔眼瞓,真係無奇不有)。

簡單啲解釋,就係即使你老婆貌若天仙,結咗婚七年之後,你都真係未必提得起勁。

廣告

而如果想文雅啲解釋,利用經濟學101的concept <<Law of diminishing marginal returns>>(邊際報酬遞減定律)正好解釋這個現象。

其實,唔知幾時開始,亦唔知係咪在位啲官唔夠勁,搞到香港的所謂高峰論壇,嘅重量級嘉賓通常都係過氣監管機構、央行、政府領導人。

廣告

這些領導人在位的時候當然把炮,因為佢哋每一句說話都會畀傳媒放大一萬倍,同時又可以俾賣方分析員作為分析的要點。正正就係這些穿鑿附會的機會,造就了賣方分析師賺錢賺到盆滿缽滿的年頭。亦正因為佢哋以前的勁,分析師們一般都有張同呢啲神枱級領導影嘅相旁身,回顧一下他們曾經擁有的美好時光。

但係,當這些猛人離開權力的核心位置,他們的光環亦會隨之而散去,但好多時佢哋仲係口水多過浪花,成日要走出嚟老噏。

這些人可能對於環球經濟、股票市場、樓價走勢、企業動向都有唔同嘅獨特見解,主要因為他們係唔同企業嘅非執行董事(INED)。但是,他們又可曾想到其實這些企業叫佢哋做INED,真係唔係因為諗住喺佢哋身上攞啲乜 insights,而係要令班股民相信佢哋管理層係好有料到、好值得信任。

又或者,佢哋覺得佢哋當權嘅時候啲𡃁,而家就係各個不同監管機構的領導層,所以佢哋都會聽吓佢哋嘅意見。咁不如你問下陳德霖仲有冇得閒打個電話畀任總,問下佢點睇美國加息、資金流向、英國脫歐等形勢。

礙於這些猛人及社會的期盼與事實的不符,導致了很多deadweight loss(無謂損失),令到社會上的資源錯配越來越嚴重。

講真,聽呢班大帝從 2013年開始話樓市有泡沫,今年初又講 Bitcoins 的存在是非理性、騰訊嘅股價估值又偏高等,咁就真係冇乜運行。

從這個角度作為切入點的話,真心希望特首除了聽三座靠山的意見之外,亦希望能夠『真.廣納賢能』,聽取不同持分者的意見。亦希望一啲商家,唔好搞埋曬啲離地seminar,自己圍威喂上枱傾偈。

如果商家佬真係想幫香港經濟長遠發展,又或者想令到青年人有啲希望,我有三個建議:

1) 直接畀錢啲學生(包括 Band 1、2、3),等佢哋去外國或內地見識;

2) 如果係要搞seminar,請多啲貼地、年輕的企業家,讓年青人真的有共鳴;及

3) 同政府政策並行,貼錢輔助青年創業(唔使一定高端產業) 。

有啲嘢,真係唔講好過講… 或者,我這篇文就係最佳例子。
 

發表意見