立場新聞 Stand News

當沈大師話KO索羅斯

2016/8/28 — 11:19

資料圖片:索羅斯,圖片來源:維基百科

資料圖片:索羅斯,圖片來源:維基百科

提起沈大師,Loser可以講係又愛又恨,愛係佢曾經有一段時間擁有神級預測,只要你以佢嘅估計作參考,稍作調整,贏錢機會超過8成,準確程度教人驚訝!

點解恨佢?就係唔知幾時開始,佢嘅超能力突然消失,今次估中但下次又估錯,唔知佢開邊瓣,唔能夠用逆向思維投資,參考性大打折扣,教人無所適從。

姑勿論點,大師都可以話喺云云財經名嘴當中,提供好大娛樂性俾股民,其它唔好講,單係用玄學或風水去測市呢家嘢,為沉悶股市帶來輕鬆一刻,而佢平時一啲言論,亦教人開懷一笑。

廣告

最近大師就豪言壯語,話自己多次擊敗索羅斯,最經典一役係幾年前歐債危機,索羅斯叫一眾基金經理沽歐元,大師唔受佢「坤」,叫大家喺當時揸歐元,結果每歐元兌美元由1.21夾到上1.51,大師贏了漂亮一丈。

Loser絕對冇懷疑大師呢段文章,之但係咁,唔知大師有冇投入相當注碼去實踐自己嘅理念,根據佢內文咁講,只係叫大家喺當時水平揸歐元,咁即係話佢係口講多過做。呢啲紙上談兵,跟真金白銀去炒賣係兩碼子之事,事關你唔會有心理負擔,可以義無反顧咁下注,否則點解耀才早前股票比賽,位婆婆可以100萬贏咗52億(真實性教人懷疑,但姑且當真)。

廣告

仲有,大師段文講到自己好似跟索羅斯喺匯市大戰三百回合,結果將索老打到落荒而逃咁。坦白講,大師即使有投入資金,我諗都唔會好多,要離場或轉身冇難度,喺決策上自然輕鬆;相反國際基金投資龐大,要調配並不容易,考量點有好多,唔光係好似大師睇升跌就得,仲要睇實際點去操作執行。

好似大師咁講,喺紙上擊敗索羅斯,咁Loser過去亦曾經以大師估計對著幹,結果都多次擊敗大師;若然按呢個邏輯,沈大師擊敗索斯,我又擊敗沈大師,咁即係我肯定贏硬索羅斯。

發表意見