立場新聞 Stand News

當陳啟宗仲發緊神洲商場夢時 王健林已經講輕資產大數據

2016/9/25 — 11:13

資料圖片:陳啟宗

資料圖片:陳啟宗

超級梁粉陳啟宗最近又開火罵人,今次矛頭係中國首富王健林,佢喺中期年報話大陸有啲發展商項目唔掂,臨急就章,專起劣質商場,唔似恒隆啲商場千錘百煉,個個係四五星級。

雖然老陳冇話明係邊個,但有媒體就話佢指嘅係王健林間大連萬達,事關萬達喺中國擁有最多商場,項目落成速度又超快,陳啟宗好明顯係衝住王健林嚟批評。

過去十幾年,陳啟宗對大陸推崇備至,乜都大陸好大陸掂,將幾百億資金全掟入內地起商場。初時適逢中國入世貿,經濟起飛,恒隆喺上海嗰兩個商場年年租金大升,證券界更加大吹特吹,恒隆股價連連上升,陳啟宗風騷到不得了,成日話人短視唔識返大陸發展。

廣告

錯失香港樓市黃金十年

好喇,十幾年過去,到今日只起到八個商場,除咗上海兩個商場仲係穩定外,今年中期業績見到,八個商場中有六個出租率下跌,無鍚出租率只係得7成幾,大連更加得6成,租金方面,瀋陽同無鍚更急跌兩成。

廣告

呢啲商場每個投資動輒七到八十億,除上海外,唔少每年都係收緊幾億租金,唔好忘記商場吓吓百幾兩百萬呎,管理同維修你話幾係嘢,扣埋呢啲費用,有幾多錢落袋,我真係好懷疑,特別今日內地商場林立,競爭激烈到爆,未來恒隆啲商場能唔能夠殺出重圍,真係唔敢講。

反而若陳啟宗當初將呢筆錢投入香港地產市場,買地發展,肯定贏到開巷;點知佢因為低價時執咗機鐵九龍站塊地,起咗「君臨天下」後就目空一切,以為自己眼光奇準,成日話恒隆喺別人買貴地時唔會郁手,樓市見底時時先入市。點知呢次佢等吓等吓,過咗十幾年香港樓市都未見底,反之仲升爆,可以講佢平白錯失香港樓市嘅黃金十年。

眼光仲停留做收租佬

其實佢當初若將啲資金放喺大陸市場起住宅樓,唔係獨沽一味起商場,以呢十幾年大陸樓市井噴式上升,亦唔會執輸過香港樓市幾多。不過老陳一方面睇唔起啲大陸發展商,認為佢哋只識起啲標準化嘅樓盤,另外可能佢又唔多識點喺大陸市場起住宅,於是又錯失埋大陸樓市爆升呢一個千載時機。

今日老陳反而批評王健林,講真,𠲖家王健林都話唔擁有商場,要以「輕資產」模式發展,即只負責設計、建設、招商同營運,物業反而讓別人投資,自己再按商場租金比例分成。另外,王健林更加要做「大數據」,以佢內地咁多商場及會員,可收集顧客資料、喜好及購物模式,利用呢啲數據進一步拓展其它業務。反之你陳啟宗仲講緊起乜乜五星級商場,點靚點正,層次同視嘢仲停留做收租佬,唔怪得人哋係首富,恒隆今日連新世界發展(0017)個市值都比不上。

最終王健林成功定陳啟宗失敗暫時未知,但大家唔知記唔記得十幾年前美國英隆(Enron)單世紀做數嘅醜聞?當年英隆其中一位獨董,咪就係陳啟宗囉,咁你就知佢嘅眼光去到邊個水平喇!

發表意見