立場新聞 Stand News

百富環球:Strong Sell

2016/8/15 — 16:00

蘋果動新聞片段截圖

蘋果動新聞片段截圖

十幾年前,合和(0054)主席胡應湘唔滿意分析員對公司看法,於是叫佢哋「Bloody分析員」,有一陣子,恒隆(0101)主席陳啟宗亦覺得啲分析員未夠水準而發晦氣話:「佢咁叻,叫佢坐我個位」;但咁多年從未見過有公司趕分析員出場,仲要係由首席財務官(CFO)咁高層出面。

上周百富環球(0327)CFO怒趕分析員一幕,成為中環熱話,見微知著,即使百富環球(0327)份中期業績穩定,但Loser肯定唔會買佢股票,事關投資股票睇長線,公司咁處事,長遠隨時出問題。

危機處理教人懷疑

廣告

堂堂一個CFO,可以咁冇EQ同咁唔大體,我會問點解?有理由相信呢個係公司文化,啲高層啱聽就冇嘢,稍為有啲唔順耳嘅聲音,唔接受不特止,更會大發雷霆。喺咁環境,試問公司員工又點敢開口建議,最後係人人揣摩上層喜好,錯咗都冇人出聲,公司又點會有進步。

好喇,推展到業務往來,你會諗公司係咪對客戶都係咁?即係話啲客有唔滿意向公司反映,佢會唔會咁回應:「唓!啲友都唔識嘢,我哋啲嘢咁正,唔使理佢。」以呢次處理分析員手法,有可能對客都係咁傲慢無禮,長遠無疑會得失客戶。

廣告

仲有,一間公司唔會永遠順風順水,倘若有危機出現,佢哋有冇能力應付,我真係好懷疑?今次分析員寫你唔好,都唔係好大件事,你咪嘗試去解釋,又或加強溝通,點解要強硬到打走佢,可見公司處理危機嘅能力同情商都十分之低,未來若碰上大問題,真係擔心佢點處理。

身有屎怕俾人踼爆?

再諗深入啲,CFO點解會咁唔大體落到台趕人走,Loser諗係咪公司真係有問題,所以個高層先會咁大反應,否則你盤數都叫做有交待,使乜嘢咁動氣;你咁介懷,梗係有啲嘢俾人講中,公司先至咁驚,怕嗰位分析員喺會議中問吓問吓,連其它出席者都察覺留意到,咁到時咪好大劑,於是防範未然,先將個禍源剔走,以策萬全。

事後個CFO發表聲明,話唔係因為對方批評公司差而唔接受,而係希望分析員就事實部分要盡責,要認真。究竟個分析員認唔認真,睇返今年4月麥格里份報告,給予百富環球「跑輸大市」評級,目標價係6個3。當時百富環球股價大概7個幾,4個月過去,上周收市報6.61元,明顯個價都幾符合麥格理預測,相比其它幾家大行個目標價8至15蚊,麥格理分析員嘅預測絕對認真。

發表意見