立場新聞 Stand News

皆大歡喜食薯片

2015/2/25 — 16:14

鬍鬚曾個樣似薯片logo,他主理的預算案,也似薯片。有研究指薯片之所以食唔停口,不在於舌頭感覺的味道,而在於其口感,在口中脆片崩裂時發出聲音,刺激大腦。林煥光指今年預算「皆大歡喜」,人人有著數,就是一種感覺。

曾俊華的理財招數是港英傳統政務官一套,1)在量入為出下刻意保守低估收入,控制開支膨脹,所以年年估錯 2)控制經常開支增長與經濟增長接近 3)非經常收入增長用短期方法比番市民。4)撥備方式留作未來新政策開支。

廣告

但為何政務官一套理財哲學,在梁主政下愈來愈得到支持呢?梁刻意將施政報告押後至二月,十分貼近預算案,目的是將政府内部資源分配大權收歸特首,變相廢掉財政司,但結果是「奸有奸輸」。由於佢只關心政治鬥爭,對推動政策冇能力,而對影響深遠而又利益分化、具爭議性的民生政策如醫保、退保、標準工時又冇足夠政治能量拍板,於是每次施政報告都冇法提高特首民望,「高開低收」。收咗權但交唔到貨,包括房屋政策,結果捉蟲。

曾俊華反而因梁之政治鬥爭姿態乞人憎而得益,梁一開波就攻擊港大學苑,引起反感,曾對佔領反而輕描淡寫,用一套香港人習慣之語言去表態,自然冇咁惹火。

廣告

現今政局是鬥少犯錯、少惹火政策及言論,於是曾的政務官「穩陣波」,一對比梁之左風殺氣騰騰搵人開拖,公眾自然感覺較良好。加上曾仍控制住「收入」部分,即稅收呢一part梁冇得插手,佢可以自己決定用「退稅減税減租減差餉」實恵嘢現兜兜磅比市民。當然開支部分佢可以做嘅好少,因為大權在梁之手,反而令佢唔駛孭飛。

鬍鬚曾及預算案令人感覺良好,要多得梁振英!

 

原刊於作者facebook page

發表意見